Ebɛn Kwan Na Ɔsɛ Dɛ Yɛfa Do Bɔ Mpaa—Ewuradze Mpaabɔ No Nkotsee Na Ɔsɛ Dɛ Yɛbɔ Anaa?
Mbuae a Bible no dze ma
Ewuradze Mpaabɔ no boa hɛn ma yehu kwan a yebotum afa do abɔ mpaa nye ndzɛmba a yebotum abɔ ho mpaa. Ber bi, Jesus no suanyi bi kaa kyerɛɛ no dɛ: “Ewuradze, kyerɛkyerɛ hɛn asɔr yɛ.” Iyi na ɔmaa Jesus kyerɛɛ hɔn dɛm mpaabɔ yi. (Luke 11:1) Naaso nnyɛ Ewuradze Mpaabɔ, anaa Hɛn Egya A Ewɔ Sor mpaabɔ no nkotsee nye mpaabɔ a Nyankopɔn tsie. a Mbom no Jesus dze dɛm mpaabɔ yi maa dɛ nhwɛdo dze kyerɛɛ mbrɛ obi besi abɔ mpaa ama Nyankopɔn eetsie.
Dza yɛrebɛka ho asɛm
Ebɛnadze na Ewuradze Mpaabɔ no ka ho asɛm?
Yebohu Ewuradze Mpaabɔ no wɔ Matthew 6:9-13, na ɔsor mbrɛ Bible nkyerɛasee ahorow pii esi akyerɛ dɛm mpaabɔ yi ase. Ma yensusu no mu ebien bi ho nhwɛ.
New World Translation: “Hɛn Egya a ewɔ sor, wo dzin ho ntsew. W’Ahendzi mbra. W’apɛdze nyɛ hɔ wɔ asaase do tse dɛ sor. Ma hɛn edziban a yehia no ndɛ da yi; na fa hɛn akaw kyɛ hɛn, dɛ mbrɛ hɛn so, yɛdze akyɛ hɔn a wɔdze hɛn kaw no. Na mma mmfa hɛn nnkɔ nsɔhwɛ mu, mbom gye hɛn fi ɔbɔnfo no nsamu.”
Nwoma Krɔnkrɔn: “Hɛn Egya ewɔ sor, wo dzin ho ntsew, w’ahendzi mbra, wɔnyɛ wo pɛ wɔ asaase do dɛ ɔsor. Ma hɛn hɛn daa daa edziban ndɛ. Na fa hɛn akaw kyɛ hɛn, dɛ mbrɛ hɛn so yɛdze akyɛ hɛn akafo. Na mma mmfa hɛn nnkɔ nsɔhwɛ mu, na yi hɛn fi ɔbɔn no mu.” b
Nsɛm a ɔwɔ Ewuradze Mpaabɔ no mu no kyerɛ dɛn?
Ndzɛmba a Jesus kyerɛkyerɛe no, ɔnye Bible n’afa ahorow no hyia, ntsi yebotum agye edzi dɛ nsɛm afofor wɔ Bible no mu a obotum aboa hɛn ma yaatse Ewuradze Mpaabɔ no ase yie.
“Hɛn Egya a ewɔ sor”
Ɔfata paa dɛ yɛbɛfrɛ Nyankopɔn dɛ “hɛn Egya” osiandɛ ɔno na ɔbɔɔ hɛn, na ɔnoara so na ɔmaa hɛn nkwa.—Isaiah 64:8.
“Wo dzin ho ntsew”
Nyankopɔn ne dzin Jehovah no, ɔsɛ dɛ wodzi no nyi na wɔtsew ho, anaadɛ wɔyɛ no krɔnkrɔn. Sɛ yɛka Nyankopɔn no su ahorow nye dza ɔabɔ ne tsirmu dɛ ɔbɛyɛ daakye ho asɛm kyerɛ nkorɔfo a, nna yɛroboa ma ne dzin ho aatsew.—Ndwom 83:18; Isaiah 6:3.
“W’ahendzi mbra”
Nyankopɔn n’Ahendzi no yɛ aban bi a ɔwɔ sor, na Jesus na ɔyɛ do Hen. Jesus kaa dɛ yɛmbɔ mpaa mma dɛm Ahendzi yi mbra mbedzi tum wɔ asaase yi nyina do.—Daniel 2:44; Nyikyerɛ 11:15.
“Wɔnyɛ wo pɛ wɔ asaase do dɛ ɔsor”
Bɔn anaa owu biara nnyi sor, na dɛmara na Nyankopɔn pɛ dɛ nyimpa tsena asaase do wɔ asomdwee mu na wonya ahotɔ afebɔɔ.—Ndwom 37:11, 29.
“Ma hɛn edziban a yehia no ndɛ da yi”
Aber a nna Jesus wɔ asaase do no, nna paanoo yɛ edziban a nyimpa taa dzi paa. Ɔsɛ dɛ yɛkaa dɛ ndzɛmba a yehia ama yaatsena nkwa mu no, hɛn Bɔfo no nkotsee na obotum dze ama hɛn.—Asomafo Ndwuma 17:24, 25.
“Na fa hɛn akaw kyɛ hɛn, dɛ mbrɛ hɛn so yɛdze akyɛ hɛn akafo”
Kasafua “akaw” a wɔdze dzii dwuma wɔ ha no, ɔkyerɛ bɔn. (Luke 11:4) Nyimpa nyina yɛ ndzebɔnyɛfo na ohia dɛ wɔdze hɛn bɔn kyɛ hɛn. Naaso sɛ yɛdze afofor hɔn bɔn kyɛ hɔn a, ɔno na ɔbɛma Nyankopɔn so dze hɛn bɔn akyɛ hɛn.—Matthew 6:14, 15.
“Mma mmfa hɛn nnkɔ nsɔhwɛ mu, na yi hɛn fi ɔbɔn no mu”
Jehovah Nyankopɔn mmfa bɔn nnsɔ hɛn nhwɛ. (James 1:13) Mbom “ɔbɔn no,” Satan Abɔnsam na ɔsɔ hɛn hwɛ. Wɔsan so frɛ no “ɔsɔhwɛfo.” (1 John 5:19; Matthew 4:1-4) Dɛm ntsi yɛserɛ Jehovah dɛ, sɛ biribi a ɔbɛma yaayɛ bɔn etsia no sɔ hɛn hwɛ a, ɔmboa hɛn ma yɛntwe hɛn ho mfi ho.
Ehwɛ a ɔsɛ dɛ yɛkyer Ewuradze Mpaabɔ no gu hɛn tsirmu, na yɛka no aber biara a yɛrobɔ mpaa no anaa?
Jesus dze Ewuradze Mpaabɔ no maa dɛ yɛnhwɛ do nsua, ama yeehu mbrɛ yebesi abɔ mpaa. Ɔannka dɛ yɛnkyer no mu nsɛm no ngu hɛn tsirmu na yentsi mu nka. Ansaana Jesus rebɛka Ewuradze Mpaabɔ no ho asɛm no, nna oedzi kan abɔ kɔkɔ dɛ: ‘Sɛ hom rosɔr a, mma hom nntsi asɛm kor no ara mu nnka no mpɛn pii.’ (Matthew 6:7) Ber fofor a ɔrekyerɛ n’esuafo no kwan a ɔsɛ dɛ wɔfa do bɔ mpaa no, ɔsesaa ne nsɛm no mu.—Luke 11:2-4.
Ɔkwan pa a ɔsɛ dɛ yɛfa do bɔ mpaa nye dɛ yɛbɛka dza ɔwɔ hɛn akoma mu ho asɛm akyerɛ Nyankopɔn.—Ndwom 62:8.
Ebɛn kwan na ɔsɛ dɛ yɛfa do bɔ mpaa?
Ewuradze mpaabɔ no boa hɛn ma yehu kwan pa a yebotum afa do abɔ mpaa ama Nyankopɔn eetsie. Ewuradze mpaabɔ no nye kyerɛwnsɛm ahorow a ɔfa mpaabɔ ho no hyia paa. Ma yɛnhwɛ no mu bi.
Nyankopɔn nkotsee na ɔsɛ dɛ yɛbɔ no mpaa
Kyerɛwnsɛm: “Adze nyina mu hom mfa mpaabɔ nye nkotoserɛ nye ndaase mma hom ebisadze ndu Nyankopɔn enyim.”—Philippifo 4:6.
Dza ɔkyerɛ: Nyankopɔn na ɔsɛ dɛ yɛbɔ no mpaa, na nnyɛ Jesus, Mary, anaa ahotseweefo. “Hɛn Egya” na wɔdze hyɛɛ Ewuradze Mpaabɔ no ase. Asɛm yi kyerɛ dɛ Jehovah Nyankopɔn nkotsee na ɔsɛ dɛ yɛbɔ no mpaa.
Ndzɛmba a ɔnye Nyankopɔn n’apɛdze hyia no na ɔsɛ dɛ yɛbɔ ho mpaa
Kyerɛwnsɛm: “Sɛ yɛserɛ biribiara dɛ mbrɛ ɔpɛ a, otsie hɛn.”—1 John 5:14.
Dza ɔkyerɛ: Biribiara a ɔnye Nyankopɔn n’apɛdze hyia no, yebotum abɔ ho mpaa. Nyankopɔn n’apɛdze ho hia paa osiandɛ Jesus kaa dɛ “wɔnyɛ wo pɛ” wɔ Ewuradze Mpaabɔ no mu. Sɛ yesua Bible no a, ɔbɛma yehu siantsir a Nyankopɔn bɔɔ asaase nye nyimpa.
Yebotum abɔ ndzɛmba a yehia ho mpaa
Kyerɛwnsɛm: ‘Tow w’adzesoa kyen Jehovah do, na obosuo wo mu.’—Ndwom 55:22.
Dza ɔkyerɛ: Hɛn asɛm hia Nyankopɔn paa. Jesus kaa hɛn ehiadze ho asɛm wɔ Ewuradze Mpaabɔ no mu. Ntsi sɛ hɛn so yɛrobɔ mpaa a, yebotum ebisa ndzɛmba a yehia wɔ hɛn asetsena mu no bi. Afei so, sɛ yɛpɛ akwankyerɛ a yɛdze besi gyinae a no ho hia a, yebotum aserɛ Nyankopɔn dɛ ɔmboa hɛn. Dɛmara so na sɛ yerihyia ɔhaw ahorow anaa yehia bɔnfakyɛ a, yebotum aserɛ Nyankopɔn no mboa. c
a Jesus na n’esuafo no bɔɔ mpaa ahorow a nna no mu nsɛm no nnyi Ewuradze Mpaabɔ no mu.—Luke 23:34; Philippifo 1:9.
b King James Version no dze dɛm nsɛm yi wie Ewuradze Mpaabɔ no: “Na ɔwo na ahendzi, nye tum nye enyimnyam yɛ wodze daa. Amen.” Dɛm mpaabɔ a wɔdze yi Nyankopɔn ayɛw yi, ɔwɔ Bible nkyerɛasee ahorow bi so mu na wɔtaa frɛ no doxology (ayɛyinsɛm). Naaso, The Jerome Biblical Commentary no ka dɛ: ‘Ayɛyinsɛm yi nnyi nsaano nkyerɛwee a wobu no paa dɛ ɔyɛ nokwar no mu.’
c Hɔn a wɔayɛ bɔn bi a wohia Nyankopɔn hɔ bɔnfakyɛ no, hɔn tsibowa tum bu hɔn fɔ ara ma ntsi ɔyɛ a wonntum mmbɔ mpaa. Naaso Jehovah ka kyerɛ hɔn a wɔtse dɛm no dɛ: ‘Hom mbra ma yɛntoto ndzɛmba yie.’ (Isaiah 1:18) Sɛ obi yɛ bɔn na onu noho na ɔserɛ bɔnfakyɛ a, Nyankopɔn dze bɛkyɛ no.
Bi A W'enyi Bɛgye Iyi So Ho
ESSENTIAL BIBLE TEACHINGS
Aso Mpaabɔ Nyina Na Nyankopɔn Tsie?
Sɛ obi rekɛyɛ bɔn, na odzi kan bɔ mpaa dɛ Nyankopɔn mboa no ɛ? Anaaso okun bi yɛ ne yer ayakayakadze, na owie a ɔaabɔ mpaa aserɛ Nyankopɔn ne nhyira ɛ?