Bɔn yɛ ndzeyɛɛ, atsenka, anaa nsusui biara a otsia Nyankopɔn ne mbra. Sɛ obi bu Nyankopɔn ne mbra do a ɔyɛ bɔn, anaa ɔyɛ adze a ɔnntsen wɔ Nyankopɔn enyi do a, ɔno so yɛ bɔn. (1 John 3:4; 5:​17) Bible no san so ma yehu dɛ, sɛ obi nyim adzepa na ɔannyɛ a, ɔyɛ bɔn.​—James 4:​17.

 Sɛ yɛhwɛ kasa a wɔdze kyerɛɛw Bible no a, nkasafua a wɔkyerɛ ase bɔn no, ɔkyerɛ dɛ “obi nndu biribi” anaa botae bi ho. Dɛ nhwɛdo no, nna nsordaafo bi wɔ tsetse Israel a wɔakwadar wɔ tsiabo no tow mu. Nna wɔnntow tsiabo ‘mmfom.’ Sɛ yɛrekyerɛ dɛm kasafua no ase tsenn a, yɛbɛka dɛ “wɔrommfom.” (Atsɛmbuafo 20:16) Dɛm ntsi, sɛ obi yɛ bɔn a, ɔkyerɛ dɛ ɔafom Nyankopɔn ne mbra a odzi mu no.

 Nyankopɔn nye hɛn Bɔfo, na ɔwɔ hokwan dɛ ɔhyɛ mbra ma adasamba. (Nyikyerɛ 4:​11) Yebobu hɛn ndzeyɛɛ ho akontaa akyerɛ no.​—Romefo 14:12.

Aso obotum aba dɛ yɛnnkɛyɛ bɔn korakora?

 Oho. Bible no ka dɛ “hɔn nyina ayɛ bɔn na wɔatɔ sin wɔ Nyankopɔn enyimnyam ho.” (Romefo 3:​23; 1 Ahemfo 8:​46; Ɔsɛnkafo 7:​20; 1 John 1:8) Ebɛnadze ntsi na ɔtse dɛm?

 Nyimpa beenu a wodzii kan bɔɔ hɔn nye Adam na Eve. Ahyɛse no, nna bɔn nnyi hɔnho. Siantsir a ɔtse dɛm nye dɛ wɔbɔɔ hɔn dɛ nyimpa a wodzi mu. Afei so, wɔbɔɔ hɔn wɔ Nyankopɔn no suban do. (Genesis 1:​27) Naaso woenntsie Nyankopɔn ma ɔno ntsi, wɔannkɔ do annyɛ nyimpa a wodzi mu bio. (Genesis 3:​5, 6, 17-​19) Aber a wɔwoe no, dza wɔdze gyaa hɔn mba nye bɔn na owu. (Romefo 5:​12) Ɔhen David kaa dɛ, ‘Wɔwoo me wɔ emumuyɛ mu.’​—Ndwom 51:5.

Aso bɔn ahorow bi mu yɛ dur kyɛn bɔn afofor bi?

 Nyew. Dɛ nhwɛdo no, Bible no ka dɛ nna mbarimba a wɔwɔ tsetse kurow Sodom mu no yɛ “ehuhufo nye ndzebɔnyɛfo.” Afei so, nna hɔn bɔn “ayɛ dur dodow.” (Genesis 13:13; 18:20) Ma yɛnhwɛ ndzɛmba ebiasa bi a ɔma bɔn yɛ kɛse anaa ɔyɛ dur.

1.   Mbrɛ osi kɔ ekyir fa. Bible no ka dɛ yenkwetsir bɔn a no mu yɛ dur tse dɛ ndwamanbra, abosonsɔr, adzewia, asabow, apempensi, ewudzi, nye esumansɛm. (1 Corinthfo 6:​9-​11; Nyikyerɛ 21:8) Bible no mmfa iyinom nntoto bɔn a obi nnhyɛ da ara yɛ ho, tse dɛ nsɛm a obi ka anaa ndzeyɛɛ a opira afofor. (Mbɛbusɛm 12:18; Ephesusfo 4:​31, 32) Naaso, Bible no hyɛ hɛn nkuran dɛ mma yemmbu bɔn biara adzeba. Siantsir no nye dɛ, obotum ama yaayɛ ndzɛmba ahorow bi so dze ebu Nyankopɔn ne mbra do.​—Matthew 5:​27, 28.

2.   Adwen a ɔtaa ekyir. Nyimpa binom yɛ bɔn ahorow bi, osiandɛ wonnyim dza Nyankopɔn hwehwɛ fi hɔn hɔ. (Asomafo Ndwuma 17:30; 1 Timothy 1:​13) Nyankopɔn mmbu n’enyi nngu bɔn a ɔtse dɛm do, naaso ɔmmfa nntoto bɔn a wɔhyɛ da ara yɛ dze bu ne mbra do no ho. (Nkanee 15:30, 31) Bɔn a wɔhyɛ da ara yɛ fi ‘akoma bɔn’ mu.​—Jeremiah 16:12.

3.   Mpɛn dodow a wɔdze yɛ. Bible no so ma yehu dɛ ɔsor bɔn a wɔyɛ no pɛnkor, nna ɔsor bɔn a wɔyɛ no ber tsentsenntsen. (1 John 3:​4-8) Hɔn a ‘wɔboapa yɛ bɔn’ no, sɛ ekyir yi wohu dza ɔtsen na wɔyɛ mpo a, wotwa bɔn a wɔyɛe no do aba.​—Hebrewfo 10:26, 27.

 Hɔn a wɔyɛ bɔn a no mu yɛ dur no, bɔn a ɔtse dɛm no tum hyɛ hɔn do papaapa. Dɛ nhwɛdo no, Ɔhen David kaa dɛ: “M’emumuyɛ emunam m’etsifi: ayɛ mo do dur dɛ adzesoadze durdur.” (Ndwom 38:4) Naaso, Bible no ma hɛn awerɛhyɛmu dɛ: “Hom mma omumuyɛnyi ndan no kwan ngya, na ɔbrakyewnyi ndan n’adwen ngya: na ɔnsan mbra Ewuradze nkyɛn na obohu no mbɔbɔr; na hɛn Nyankopɔn nkyɛn, na ɔdze befir mbordo.”​—Isaiah 55:7.