Matthieu 24:1-51
24 A nga bo na, éyoñe Yésus a mbe a kôlô’ô Temple, beyé’é bé be nga zu koone nye a liti nye Temple ase.
2 Yésus a nga jô be na: “Nga mi lôô biôme bise bi? Teke vaa nge beté, akok éziñe da ye ke li’i é bete akok avo’o yôbe teke tyamban.”
3 Éyoñ a mbe a too Nkôle Beolivier, beyé’é bé be nga zu koone nye vôm a mbe étam, a sili nye na: “Kate’e bia, éyoñ évé mame ma ma ye boban, a ndeme fé ja liti bia na ô ntoo valé,* a na memane ya émo* me kuiya?”
4 A nga yalane be na: “Taba’ané ntyele na, môt éziñ a du’u mia,
5 amu abui bôte da ye so é bela’ane jôé dam, é jô’ô na, ‘Me ne Krist,’ a da ye kee abui bôte mbia zen.
6 Mia ye wô’ô bôte be kobô’ô ajô bita a mefoé bita, te koané woñ, amu mame mete mese ma yiane taté boban, ve asu’ulan é ngenane teke bo.
7 “Amu ayoñe da ye wosan ayoñ avok, a éjôé ja ye wosan éjôé évok, a bemfumbale ya zaé a mimfô’ôsane mi si mia ye bo bevôme bevôm.
8 Mame mete mese me ne atata’a ya beta minjuk.
9 “Bôte ba ye kee mia na be tibili a wôé mia, a meyoñe mese ma ye vini mia amu éyôlé jam.
10 Nde fe bôt abui ba ye lume Zambe mvus, a bôt abui ba ye koñan, wua a koñe’e nyu mbok, ba ye fe feman, wua a feme’e nyu mbok.
11 Abui bekulu mejô minsose da ye so a kee abui bôte mbia zen.
12 Amu tañe bôte ba bo mbia be mame ja ye bo ve nenenen, nye’an abui bôte wo ye ke wo voé.
13 Ve môt a ye bo mbane ya jibi akekui memane nnye a ye nyiiban.
14 Mbamba foé ya Éjôé nyu a ye katebane be bôte bese ya si, mfa’a ya bo meyoñe mese* ngaa, éyoñe te nje asu’ulane da ye so.
15 “Nde éyoñe mia ye yene jôm é ne angôndô ja soo ntyamane nkulu mejô Daniel a nga jô je, é tele vôm a ne étyi, (môt a lañ a tuka’a fo’o fas).
16 Nde bôte be ne Judée be taté na ba tup a ke minkôl.
17 Môt a too nseñe ya nda yôp, a bo’o te sise na a ke nyoñe mbamba be biôme be ne nda jé été;
18 a môt a ne afup, a bo’o te bulane na a ke nyoñ éyé jé ya yôp.
19 Ngo’o binga ba ye bo mebum, a ba ba ye nyia bone melu mete!
20 Kelané ôsu a ye’elane na éyoñe mia ye tup é bo te bo éyoñ avep é ne nya ngulu, nge ke môse Sabbat;
21 amu beta étibila’a a ye boban, aval étibila’a da be tame kui nté ane si nyu é nga taté azukui éyoñe ji, téké’é, aval étibila’a éte da ye ke fe beta kui.
22 Amu nge melu mete ma bo te bo étun, teke môt éziñ a ye nyiiban, ve amu mintoban, melu mete ma ye bo étun.
23 “Nde, nge môt éziñ a zu jô mia na, ‘Tama yenan! Krist a ne va,’ nge na, ‘A ne li!’ Te mia buni de.
24 Amu Bekrist be ne minsos, a bekulu mejô minsose ba ye yené a bo beta mendem a bitua bi mame na, be kee ja’a mintobane mbia zen.
25 Tame yenan! Me maneya kate mia mame mete ôsusua na ma boban.
26 Nde, nge bôte ba zu jô mia na, ‘Tama yenan! A ne nkôte si,’ te kuané atan, nge ke na, ‘Tama yenan! A ne étune nda été,’ te bunané de.
27 Amu avale felevese ja vese mfa’a jôbe da tôô a ja faé akekui mfa’a jôbe da dim, avale te nde fe ntabane Mona môt a ye tabe valé* wo ye bo.
28 Vôme mbime jôm ô ne, vôm ate fe bendôé ba ye sulan.
29 “Été été, mvus étibila’a ya melu mete, nlô jôbô a ye dim, ngone ja ye ke fe beta faé, ateté da ye ko yôp été a mengule ya yôbe ma ye fô’ôsan.
30 Éyoñ éte, ndeme Mona môte ja ye yené yôp été, a meyoñe mese ya si ma ye yôn amu mintaé ya nlem, a ba ye yene Mona môt a so’o minkute ya yôp été, a ngul a beta étôtok.
31 A ye lôme beéngele bé, a beta nkobô toñ, ba ye tôkane mintobane mié, mi so’o bivuñulu binyin, ataté aku’u yôbe di, akekui aku’u yôp avok.
32 “Yeke’ané jame di éve’ane ya élé figuier, nné ane mintyaé mia bo bisôsoñ a na, mekaé ma taté na ma kui été, mia yeme na, ésep* é ntoo bebé.
33 Avale te fe éyoñe mia ye yene mame mete mese, yemané na Mona môt a ntoo bebé, a ntele mbé.
34 Ma kate fo’o mia na, a zen éziñ, miaé bôte wu wo ye ke mane wu ôsusua na mame ma mese ma boban.
35 Yôp a si bia ye lôt, ve mejô mame ma ye tabe nnôm éto a nnôm éto.*
36 “Mfa’a ya môs ôte a awolo éte, môt éziñ a nji yem, to’o beéngele ya yôp, to’o Mon, fo’o ve Ésa nnye a yem.
37 Ntabane Mona môt a ye tabe valé* wo ye bo fo’o ve avale melu me Noé me mbe.
38 Amu avale bôte be mbe be bo’o ôsusua ndône mendim, be mbe be ja’a a nyu, be lu’u binga, be va’a binga meluk, akekui môse Noé a nga nyiin arche,
39 be nji bisi akekui éyoñe Ndône mendim é nga so, a mane kee* be bese, nde fe ntabane Mona môt a ye tabe valé* wo ye bo nalé.
40 Nde a ye bo na, fam ébaé é too afup, Zambe a ye nyoñe jia a li’i ke nyi fok.
41 Binga bebaé be ko’o bidi ako’o ba ko’o de bidi, Zambe a ye nyoñe wua, a li’i ke nyi mbok.
42 Kelané ôsu a mombô, amu mi nji yeme môse Tate wônan a ye so.
43 “Ve yemané na, nge môt a nee nda a nga yem awolo ya alu ñwuwube wo ye so, ve a nga ye mombô, teke kañese na ñwuwup ô zu bu’u nye nda.
44 Amu nalé, taba’ané nkômesan, amu Mona môt a ye so awolo mi nji buni na a ne so.
45 “Za fo’o a ne ôlo ô ne mewôk a fek,* ñwô ôte masa wé a nga ve mbe’e ya ve bebo bisaé ya nda jé bidi mbamba éyoñ?
46 Meva’a me bo’o be ôlo ôte, nge masa wé a zu koone wô ô bo’o nalé!
47 Ma kate fo’o mia na, a ye telé wô ntebele ya biôme bié bise.
48 “Ve nge ôlo ô ne mbia nlem ôte wo jô nleme wé été na, ‘Masa wom a keya tabe ayap.’
49 A taté na a bôm alo avok, a di bidi, a nyu meyok a beta benyu meyok,
50 masa ôlo ôte a ye so môs a nji be a bunan, a awolo a nji yem.
51 A ye bo na a wô’ô benya mintaé,* a a ye lôme nye a ke tabe a bôte medu’an, nne a ye yône wôé a latane mesôñ.
Notes
^ Éfia Grec, “parousia.” Lañe’e Atinane bifia.
^ Lañe’e Atinane bifia, “Émo.”
^ Nge ke, “si ése.”
^ Éfia Grec, “parousia.” Lañe’e Atinane bifia.
^ Nkobô Grec, “éyoñe bidi bia yaé.” Ésep ya Palestine é mbe é kuik éyoñe mekaé ma taté na ma kui bilé a bilok.
^ Nge ke, “mejô mame ma ye ke jañ.”
^ Éfia Grec, “parousia.” Lañe’e Atinane bifia.
^ Nge ke, “mane jian.”
^ Éfia Grec, “parousia.” Lañe’e Atinane bifia.
^ Nkobô Grec, “ntyel.”
^ Nkobô Grec, “a ye tyi’i nye zañ.”
