Na disurat si Mateus 28:1-20
28 Dung salpu ari Sabat, dung bissar mataniari di ari na parjolo di minggu i, lao ma si Maria Magdalena dohot si Maria na sada nai tu kuburan.+
2 Masa ma gempa na massai gogo, ai turun do suru-suruan ni Jahowa* sian banua ginjang. Dung i digulikkon ma batu i jala hundul ma ibana di atasna.+
3 Marsinondang do suru-suruan i songon sillam jala pakkeanna bottar songon salju.+
4 Hitir-hitir ma akka panjaga i alani biarna. Sappe puccat do bohina songon halak na mate.
5 Alai didok suru-suruan i ma tu akka borua i, “Unang pola mabiar hamu. Ai huboto do na mangalului Jesus na digattung di hau i do hamu.+
6 Dang dison be ibana, ai nungnga dipahehe ibana songon na dipaboa ibana hian.+ Beta, ida hamu ma inganan ni bakkena i hian.
7 Dung i pittor lao ma hamu. Paboa ma tu akka siseanna naung dipahehe ibana sian na mate. Ai nungnga parjolo ibana sian hamu lao tu Galilea.+ Idaonmuna do ibana disi. Ingot ma hatakki.”+
8 Hatop ma nasida lao sian kuburan i. Marlojong ma nasida mardongan biar dohot las ni roha lao paboahon i tu akka sisean ni Jesus.+
9 Toppu ma didapotton Jesus nasida jala ninna ma, “Horas!” Gabe didapotton nasida ma ibana, ditiop ma patna jala marsinggang tu ibana.
10 Dung i ninna Jesus ma tu nasida, “Unang pola mabiar hamu! Lao ma hamu mandapotton akka haha anggikku. Paboa ma tu nasida asa ro tu Galilea jala idaon ni nasida ma au disi.”
11 Tikki di pardalanan dope akka borua i, mulak ma deba akka panjaga i+ tu kota lao paboahon sude na masa i tu akka malim kepala.*
12 Marrapot ma nasida dohot akka pangituai,* dung i dilehon ma godang hepeng logam perak tu akka tentara i.
13 Ninna ma, “Dokkon hamu ma, ‘Tikki modom hami, ro do akka siseanna manakko bakkena i di tonga borngin.’+
14 Jala molo tarboto i tu gubernur, hupatorang hami pe tu ibana boasa masa i,* unang pola mabiar hamu.”
15 Dijalo nasida ma hepeng logam perak i. Diulahon nasida ma songon naung diparettahon i. Ujungna, sahat tu saonari rarat do barita i di tonga-tonga ni halak Jahudi.
16 Lao ma sisean na 11 i tu dolok na di Galilea.+ Nungnga dipaboa Jesus hian asa pajuppang nasida disi.+
17 Tikki diida akka sisean i Jesus, marsinggang ma nasida. Alai adong dope na ganggu rohana na tutu i Jesus.
18 Didapotton Jesus ma nasida jala ninna ma, “Nungnga dipasahat tu au saluhut huaso na di banua ginjang dohot na di tano on.+
19 Alani i, lao ma hamu, bahen hamu ma saluhut halak sian nasa bangso gabe siseanku.+ Didi hamu ma nasida+ di bagasan goar ni Ama, Anak, dohot tondi parbadia.
20 Ajari hamu ma nasida mangulahon sude naung huparettahon tu hamu.+ Ida ma, sai na donganakku do hamu sahat tu panutup ni jaman* on.”+
