Na disurat si Mateus 10:1-42
10 Dung i, dijou Jesus ma 12 siseanna. Jala dilehon ma tu nasida huaso lao mangusir suru-suruan na jahat+ dohot pamaluppon sude sahit ni jolma.
2 On ma goar ni na 12 apostel i:+ Na parjolo si Simon na laos dijou si Petrus+ dohot si Andreas+ donganna saama, si Jakobus dohot si Johannes+ akka anak ni si Sebedeus,
3 si Pilippus dohot si Bartolomeus,+ si Tomas,+ si Mateus+ sijalo pajak, si Jakobus anak ni si Alpeus, dohot si Tadeus,
4 si Simon halak Kana* dohot si Judas Iskariot na menghianati Jesus di pudian ni ari.+
5 Disuru Jesus ma lao apostel na 12 i jala dilehon ma tu nasida tudu-tudu,+ “Unang ma lao hamu tu akka bangso na asing jala unang ma masuk tu kota ni halak Samaria.+
6 Alai, holan tu halak Israel+ na songon biru-biru na lilu i ma hamu lao.
7 Lao ma hamu tusi marbarita. Jala dokkon hamu ma, ‘Nungnga jonok Harajaon banua ginjang i.’+
8 Pamalum ma na marsahit,+ pahehe ma halak na mate, pamalum ma na marsahit kusta,* palao ma suru-suruan na jahat. Ala dang margarar dijalo hamu sudena i, lehon hamu ma i dang margarar.
9 Unang ma boan mas manang perak manang tombaga di bagasan tas inganan ni hepengmu.+
10 Unang ma boan dua baju,* manang sipatu, manang tukkot,+ manang inganan ni sipanganonmu di pardalanan. Ai tama do parkarejo mandapot sipanganonna.+
11 “Tu kota manang tu huta na dia pe hamu lao, lului ma na olo manjalo baritamuna jala disi ma hamu sahat tu na lao hamu.+
12 Tikki masuk hamu tu sada jabu, pakkulingi ma parjabu i.
13 Molo dijalo do baritamuna di jabu i, ro ma hadameon tu jabu i.+ Alai molo dang dijalo baritamuna disi, mulak ma hadameon i tu hamu.
14 Molo adong na so manjalo manang na so manangihon hamu, lao ma hamu sian jabu i dohot sian kota i. Dung i paspasson ma orbuk sian patmuna i.+
15 Situtu do na hudok on tu hamu, ubborat do hukuman tu kota i sian tu Sodom dohot Gumora+ di Ari Panguhuman i.
16 “Parrohahon ma on! Husuru do hamu songon biru-biru tu tonga-tonga ni serigala. Alani i, manat ma hamu songon ulok jala ias ma rohamuna songon darapati.+
17 Manat ma hamu tu akka jolma, ai boanon ni nasida do hamu tu akka pengadilan.+ Lissinganna+ do hamu di akka sinagoga*+ ni nasida.
18 Boanonna ma hamu tu jolo ni akka gubernur dohot tu jolo ni akka raja+ alani au. Paboaonmuna ma taringot tu au di jolo ni akka bangso.+
19 Alai tikki diboan hamu, unang ma marsak hamu mamikkiri aha na lao dohononmuna. Ai laos di tikki i do dipaboa tu hamu aha na lao dohononmuna.+
20 Ai dang sian pikkiranmuna sandiri hata na lao dohononmuna i, alai sian Debata do i na dipaboa marhite tondi parbadiana.+
21 Asing ni i, pasahaton ni na marhaha maranggi ma haha anggina tu hamatean. Jala songon i ma tong bahenon ni sahalak ama tu anakna. Aloon ni akka anakna ma natua-tuana jala pasahatonna ma nasida lao dipamate.+
22 Sogo ma roha ni sude jolma tu hamu alani goarhu,+ alai paluaonna do manang ise na setia jala na martahan sahat tu ujungna.+
23 Molo dibahen na haccit tu hamu di sada kota, lari ma hamu tu kota na asing.+ Situtu do na hudok on tu hamu, dang na tardalani hamu sude kota di Israel sahat tu na ro Anak ni jolma i.
24 “Dang untimbo sisean sian guruna, jala dang untimbo hatoban sian tuanna.+
25 Sae ma molo sisean dos songon guruna, jala hatoban dos songon tuanna.+ Molo digoari halak do nappunasa jabu i si Belsebul,*+ pasti urroa sian i ma bahenon ni halak goar ni akka donganna sajabu!
26 Alani i, unang ma mabiar hamu tu nasida. Ai na lao dibukka do sude na ditutupi jala na lao dipaboa do sude na ditabunihon.+
27 Na hupaboa tu hamu di na holom, hatahon ma di na tiur. Jala aha na huhusippon, baritahon ma i sian atap ni jabu.+
28 Unang ma habiari hamu halak na boi mambunu daging alai dang boi mangago hangoluan.*+ Alai, habiari ma Ibana na boi mangaripasson hangoluan dohot daging di Gehena.*+
29 Holan salimper* do kan digadis arga ni dua amporik? Alai, dang adong nanggo sada pe sian i na madabu tu tano na so diboto Amamuna.+
30 Gari obuk na di ulumuna pe nungnga dibilangi sude.
31 Alani i unang ma mabiar hamu, ummarga do hamu sian godang amporik.+
32 “Ganup halak na mandok mananda au di jolo ni jolma,+ au pe dohonokku do na hutanda ibana di jolo ni Damang na di banua ginjang i.+
33 Alai manang ise na maila mananda au di jolo ni jolma, au pe maila ma mananda ibana di jolo ni Damang na di banua ginjang i.+
34 Unang dirippu hamu na mamboan dame au ro tu tano on. Dang na mamboan dame au ro, alai mamboan podang do.+
35 Mambahen parbadaan do au ro, sahalak bawa mangalo bapakna, sahalak borua mangalo omakna, jala parumaen mangalo simatuana boru.+
36 Sasittongna, musu ni sasahalak i ma donganna sajabu.
37 Manang ise na umbalga holongna tu bapakna manang tu omakna sian apala tu au, dang cocok ibana gabe siseanku. Jala manang ise na umbalga holongna tu anakna manang tu boruna sian apala tu au, dang cocok ibana gabe siseanku.+
38 Asing ni i, manang ise na so manuhuk hau partinaonanna* jala dang diihutton ibana au, dang tama ibana gabe siseanku.+
39 Manang ise na marsitutu paluahon ngoluna, na lao mate do ibana. Jala manang ise na mate alani au, mulak mangolu do ibana muse.+
40 “Manang ise na manjalo hamu, na manjalo au do i. Jala manang ise na manjalo au, na manjalo na manuru au do ibana.+
41 Manang ise na manjalo sahalak panurirang* ala panurirang ibana, dapotna do upa ni panurirang.+ Jala manang ise na manjalo halak na mangulahon na sittong ala mangulahon na sittong ibana, dapotna do upa ni halak na mangulahon na sittong.
42 Situtu do na hudok on tu hamu, manang ise na mangalehon sacakkir aek siinumon tu sahalak sian na metmet on ala siseanku ibana, dang mago upana.”+
Surat na di toru
^ Manang “halak na marhiras ni roha”.
^ Manang “Unang ma boan baju gatti”.
^ Goar na dibahen tu Sibolis, raja, manang pamimpin ni suru-suruan na jahat.
^ Hangoluan na nidokna dison, i ma hangoluan na saleleng ni lelengna.
^ As. “sada asarion”. Ida Lampiran B14.
