Na disurat si Mateus 24:1-51
24 Dung ditadikkon Jesus bagas joro i, didapotton siseanna ma ibana jala dipatudu ma tu Jesus bangunan ni bagas joro i.
2 Didok Jesus ma tu nasida, “Parrohahon hamu ma akka bangunan i. Tutu do na hudok on tu hamu, na lao maruppak nama sudena i. Dang na lao adong be dison nanggo sada pe batu na martindi.”+
3 Tikki hundul Jesus di Dolok Jetun, ro ma akka siseanna mandapotton ibana. Tikki i, dang adong be halak na asing disi. Disukkun nasida ma Jesus, “Andigan do masa akka i? Jala aha do tanda ni harorom*+ dohot tanda ni panutup ni jaman*+ on?”
4 Dialusi Jesus ma nasida, “Manat ma hamu asa unang sappe lilu hamu dibahen halak.+
5 Ai lao godang do halak na ro mamakke goarhu. Jala didok nasida do, ‘Au do Kristus i,’ gabe godang ma lilu dibahen nasida.+
6 Begeonmuna ma soara ni na marporang dohot barita taringot tu akka parporangan. Alai unang pola mabiar hamu. Ai ikkon masa do akka i, alai dang i dope ujungna.+
7 “Marporang ma bangso tu bangso jala harajaon tu harajaon.+ Masa ma haraparon+ dohot gempa di godang inganan.+
8 Alai sudena i, holan mula ni hasusaan i dope.*
9 “Bahenon ni halak ma na haccit tu hamu+ jala bunuonna ma hamu.+ Jala sogo ma roha ni sude jolma mangida hamu alani goarhu.+
10 Godang ma halak na manadikkon haporseaonna,* mangulahon na jahat tu donganna, jala masihosoman na sada tu na sada.
11 Dung i, marroan ma godang panurirang na makkatahon na so tutu jala mangaliluhon godang jolma.+
12 Ala lam godang hajahaton, lam ngali ma holong ni godang jolma.
13 Alai paluaonna do manang ise na setia jala na martahan sahat tu ujungna.+
14 Jala dibaritahon ma barita na uli taringot tu Harajaon i di liat portibi on,* asa saluhut bangso mambege barita i.+ Dung masa i ro ma ujungna.
15 “Molo diida hamu akka na dihagigihon Debata na mambahen hancur jongjong di inganan na badia i,+ songon naung dipaboa Panurirang* Daniel (ikkon manat do on diparrohahon akka na manjaha),
16 ikkon lari do halak na di Judea tu dolok.+
17 Unang ma turun halak na di atap* ni jabu lao mambuat barangna sian jabuna.
18 Jala unang ma mulak halak na di ladang lao mambuat abit luarna.
19 Marjea ma borua na hamil jala na manusui poso-poso di tikki i!
20 Sai martangiang ma hamu asa unang masa i di musim dingin manang di ari Sabat.
21 Ai masa ma di tikki i hasusaan bolon+ na so hea dope masa sian mulai adong portibi on sahat tu saonari. Jala dang na lao masa be i muse.+
22 Sasittongna, molo dang diorui akka ari na susa i, dang adong na boi selamat. Alai alani akka na tarpillit i, diorui+ ma akka ari hasusaan i.
23 “Dung i, unang ma porsea hamu molo adong na mandok, ‘Dison do Kristus i,’+ manang molo adong na mandok, ‘Disan do!’+
24 Ai na lao ro ma akka Kristus palsu dohot panurirang na makkatahon na so tutu.+ Bahenon ni nasida ma godang tanda halongangan* lao mangaliluhon akka jolma.+ Molo boi, naeng dililuhon nasida do akka na tarpillit i.
25 Ingot ma! Nungnga hupaingot hian hamu.
26 Alani i, molo adong halak na mandok tu hamu, ‘Di padang gurun do ibana,’ unang ma lao hamu tusi. Manang molo didok, ‘Di inganan na buni do ibana,’ unang ma porsea hamu tusi.+
27 Ai dos do haroro* ni Anak ni jolma i+ songon sillam na marsinondang mulai sian timur sahat tu barat.
28 Molo disi adong bakke, tusi do ro lali marpungu.+
29 “Dung salpu hasusaan i, makkolom ma mataniari+ jala dang marsinondang be bulan. Mardabuan ma akka bintang sian langit jala humutur ma akka huaso na di langit.+
30 Dung i tarida ma tanda ni Anak ni jolma i di langit, gabe mangangguki*+ ma sude jolma* di tano on. Idaon ni nasida ma Anak ni jolma i+ ro di atas ni ombun na di langit, mardongan huaso dohot hasangapon na massai balga.+
31 Tarbege ma soara ni tarompet na massai gogo jala disuru ibana ma akka suru-suruanna lao tu opat suhi ni tano on.* Dipapungu akka suru-suruan i ma akka na tarpillit i sian ujung ni langit na sada sahat tu ujung na sada nai.+
32 “Buat ma parsiajaran sian tudosan taringot tu hau ara: Molo tubu dakka na baru jala marbulung, botoonmuna ma naung jonok musim panas.+
33 Songon i ma, molo diida hamu masa sudena i, botoonmuna ma nungnga naeng sahat*+ Anak ni jolma i.
34 Tutu do na hudok on tu hamu, dang na lao mate sude jolma na mangolu di tikki saonari on molo dang jolo masa i sude.
35 Lao salpu do langit dohot tano on, alai dang na lao salpu hatakki.+
36 “Taringot tu ari dohot jamna dang adong na mamboto i,+ nang akka suru-suruan na di banua ginjang, nang anak i, holan Ama i do na mamboto.+
37 Ai songon na masa di tikki ni si Noak,+ songon i ma na masa di haroro* ni Anak ni jolma i.+
38 Andorang so ro Aek na Sumar i, mangan minum do nasida, mangoli, jala marmulian. Songon i ma na masa sahat tu na masuk si Noak tu bagasan parau i.+
39 Dang diparrohahon nasida na masa sahat tu na ro Aek na Sumar i mangaup nasida sudena.+ Songon i ma na masa tikki ro Anak ni jolma i.
40 Di tikki i, molo adong dua bawa di ladang, diboan ma na sada jala ditinggalhon ma na sada nai.
41 Molo adong dua borua na manggiling mamakke panggilingan tangan, diboan ma na sada jala ditinggalhon ma na sada nai.+
42 Alani i, sai jaga ma hamu, ai dang diboto hamu andigan ro Tuanmuna i.+
43 “Pikkirhon ma on: Molo diboto parjabu do jam piga* ro panakko,+ tottu dungo do ibana jala dang pasombuonna jabuna dibongkar.+
44 Alani i, ikkon rade do hamu,+ ai toppu do ro Anak ni jolma i jala ro do ibana di tikki na so panagamanmuna.
45 “Ise do sasittongna naposo haposan jala na marbisuk, na pinillit ni tuanna lao mangaradoti akka naposona na asing, na mangalehon nasida mangan di tikkina?+
46 Marlas ni roha ma naposo i molo didapot tuanna ibana toktong mangulahon songon i tikki ro tuanna i!+
47 Tutu do na hudok on tu hamu, pilliton ni tuanna ma ibana mangaradoti sude artana.
48 “Alai, autsura didok naposo i di bagasan rohana, ‘Sundat do ro tuanki,’+
49 gabe dipukkuli ibana ma donganna naposo jala mangan minum ma ibana rap dohot akka parmabuk,
50 dung i, ro ma tuan ni naposo i di ari na so panagamanna jala di tikki na so pamotoanna.+
51 Borat ma hukumon ni tuanna ibana jala bahenonna ma ibana tu inganan ni halak na munafik. Disi ma ibana mangangguki jala makkarat ngingina alani murukna.+
Surat na di toru
^ Manang “hasusaan songon na ditaon sahalak ina na lao partus”.
^ Manang “na tartuktuk”.
^ Manang “di luat na adong pendudukna”.
^ Godang jabu atapna dosdos jala somal do disi nasida mangulahon akka ulaon.
^ Manang “mukjizat”.
^ Manang “mamukkuli dirina di bagasan arsak ni roha”.
^ As. “suku”.
^ Na nidokna, i ma sabola utara, sabola timur, sabola selatan, dohot sabola barat ni tano on.
^ Manang “nungnga di jolo ni pintu”.
^ Manang “parjabu do di giliran jaga na dia”.
