Na disurat si Mateus 23:1-39
23 Dung i, didok Jesus ma tu akka halak na disi dohot tu akka siseanna,
2 “Dihunduli siboto surat* dohot halak Parise do hundulan ni si Musa.
3 Alani i, ulahon ma sude na didok nasida, alai unang tiru pangalaho ni nasida. Ai dang diulahon nasida na niajarhonna i.+
4 Ditali nasida do akka boban na borat jala diappehon do i tu bahu ni halak.+ Alai anggo nasida, dang olo mandaisson jari-jarina tusi.+
5 Diulahon nasida do akka ulaon ni nasida holan asa diida halak.+ Dipabalga nasida do kotak* na marisi ayat na dibahen di pardoppahan ni nasida. Jala dipakke do i gabe jimat.+ Dung i, dipaganjang nasida do muse rambu ni pakkean ni nasida.+
6 Tikki di parpestaan, lomo hian do roha ni nasida hundul di inganan na sangap jala sai di jolo do nasida hundul di akka sinagoga.*+
7 Tikki dipakkulingi nasida di pasar, ikkon ussangap do nasida dibahen sian na asing. Jala las do rohana molo dijou akka halak nasida Guru.
8 Alai, unang ma olo hamu dijou Guru, alana sada do Gurumuna+ jala na marhaha maranggi do hamu sude.
9 Jala, dang boi dohononmuna Amang tu manang ise pe di tano on. Ai holan sada do Amangmuna,+ i ma na di banua ginjang i.
10 Unang ma olo hamu dijou pamimpin, ai holan sada do Pamimpinmuna, i ma Kristus i.
11 Alai halak na umbalga sian hamu, ikkon gabe parhobasmuna.+
12 Ai dipatutoru+ Debata do manang ise na pasangappon dirina sandiri, alai bahenonna do sangap+ halak na patutoru dirina.
13 “Marjea ma hamu siboto surat dohot halak Parise! Halak na munafik do hamu! Ai ditutup hamu do dalan tu Harajaon banua ginjang i di jolo ni jolma, hape hamu sandiri pe dang masuk tusi. Jala diabbati hamu do halak na mardalan tusi.+
14 * ——
15 “Marjea ma hamu siboto surat dohot halak Parise! Halak na munafik+ do hamu! Ai diseberangi hamu do laut dohot darat lao mambahen sasahalak masuk tu agamamuna.* Hape dung masuk ibana, gabe tu Gehena* do ibana dibahen hamu jala gabe unjahat dua hali loppit sian hamu.
16 “Marjea ma hamu panogu-nogu na mapitung!+ Ai didok hamu do, ‘Molo marsumpa sasahalak marhite bagas joro, dang adong guna ni i. Alai molo marsumpa sasahalak marhite mas na adong di bagas joro, ikkon diulahon ibana do isi ni sumpana i.’+
17 Na oto do hamu jala na mapitung! Dia do na uppetting, mas i do manang bagas joro i? Ai bagas joro i do na mambahen badia mas i.
18 Didok hamu do muse, ‘Molo marsumpa sasahalak marhite langgatan, dang adong guna ni i. Alai molo marsumpa sasahalak marhite silehon-lehon na di atas ni langgatan i, ikkon diulahon ibana do isi ni sumpana i.’
19 Na mapitung do hamu! Dia do na uppetting, silehon-lehon i do manang langgatan i? Ai langgatan i do na mambahen badia silehon-lehon i.
20 Sasittongna, molo marsumpa manang ise marhite langgatan, dang holan marhite langgatan i ibana marsumpa. Alai na marsumpa do ibana marhite sude na adong di atas ni langgatan i.
21 Jala, manang ise na marsumpa marhite bagas joro, dang holan marhite bagas joro ibana marsumpa. Alai na marsumpa do ibana marhite Debata na maringanan di bagas joro i.+
22 Jala manang ise na marsumpa marhite banua ginjang, dang holan marhite tahta ni Debata ibana marsumpa. Alai na marsumpa do ibana marhite na hundul di tahta i.
23 “Marjea ma hamu siboto surat dohot halak Parise! Halak na munafik do hamu! Dilehon hamu do saparsappulu sian suan-suanan mint, adas, dohot jintan na bottar,*+ alai dang diulahon hamu akka na uppetting na di Patik i. Dang diulahon hamu na tigor,+ dang dipatudu hamu asi ni roha,+ jala dang setia hamu tu Debata. Tutu, ulaon na penting do mangalehon saparsappulu i, alai unang ma alani i gabe tading akka na asing.+
24 Hamu akka panogu-nogu na mapitung,+ dipasisi hamu do agas+ sian siinumonmuna, alai diboddut hamu do unta!+
25 “Marjea ma hamu siboto surat dohot halak Parise! Halak na munafik do hamu! Ai dipaias hamu do makkuk dohot piringmuna sian luar,+ alai kotor do di bagasan. Holan naeng mambuat appuna ni halak do na sai dipikkiri hamu,+ jala holan naeng pasonakkon dirimuna sandiri do na dipikkiri hamu.+
26 Hamu halak Parise na mapitung, parjolo ma paias makkuk dohot piringmuna sian bagasan asa ias dohot na di luar.
27 “Marjea ma hamu siboto surat dohot halak Parise! Halak na munafik+ do hamu! Tudos do hamu tu kuburan na dicat na bottar.*+ Bagak do i sian luar alai anggo di bagasan gok do holi-holi ni jolma dohot akka na ramun.*
28 Songon i ma nang hamu, sittong do hamu idaon sian luar. Alai anggo di rohamuna gok do gabus dohot hajahaton.+
29 “Marjea ma hamu siboto surat dohot halak Parise! Halak na munafik+ do hamu! Dibahen hamu do kuburan ni akka panurirang* jala dipabagak-bagak hamu do kuburan ni halak na mangulahon lomo ni roha ni Debata.+
30 Jala didok hamu do, ‘Autsura mangolu hami di tikki ni ompunami, dang urupannami nasida lao pamatehon akka panurirang.’
31 Alai laos hatamuna i do patuduhon na pinoppar ni akka sibunu panurirang+ do hamu.
32 Alani i, torusson hamu ma akka ulaon naung dipukka akka ompumuna i.
33 “Akka ulok do hamu jala pinoppar ni ulok na marbisa.+ Boha ma bahenonmuna malua sian Gehena?*+
34 Alani i, suruokku ma akka panurirang,+ halak na marbisuk, dohot akka guru* mangurupi hamu.+ Alai na lao dipamate+ hamu do deba sian nasida. Gattungonmuna ma nasida tu hau, dilissingi+ hamu ma nasida di akka sinagogamuna jala dilele+ hamu ma nasida sian kota tu kota.
35 Alani i, ikkon martanggung jawab do hamu tu mudar ni sude halak na mangulahon lomo ni roha ni Debata na use di tano on. Mulai sian mudar ni si Abel+ sahat tu mudar ni si Sakaria anak ni si Berekia, na dibunu hamu di holang-holang ni bagas joro dohot langgatan i.+
36 Tutu do na hudok on tu hamu, alani sude dosa i hona hukum do sude jolma na mangolu di tikki on.
37 “Jerusalem, Jerusalem, dibunu ho do akka panurirang jala didangguri ho do halak na disuru Debata ro tu ho.+ Nungnga piga hali naeng hupapungu akka anakmu songon induk ni manuk na papunguhon akka anakna tu toru ni habongna, alai dang olo hamu.+
38 Alani i, na lao ditinggalhon nama* bagas joromuna i.*+
39 Hudok ma tu hamu, dang idaonmuna be au sian saonari sahat tu na didok hamu, ‘Dipasu-pasu ma na ro di bagasan goar ni Jahowa!’”*+
Surat na di toru
^ Manang “juru tulis”.
^ Kotak na gelleng na marisi surat na badia. On dipakke halak Jahudi gabe panjaga ni daging.
^ Ida Lampiran A3.
^ As. “sasahalak gabe proselit”.
^ Mint, adas, dohot jintan na bottar, i ma suan-suanan na metmet na tubu di ladang jala dipakke lao mangaloppa.
^ Manang “kuburan na dihapuri”.
^ As. “siboto surat”. Na nidokna dison, i ma akka sisean na mangajari di jolo ni godang halak.
^ Manang boi do “na lao tarulang ma dipasahat tu hamu”.
^ As. “jabumuna i”.
^ Ida Lampiran A5.
