Colosenses 3:1-25
3 Jumanakatejj Cristomp chika jaktayatäpjjstajja,+ kunanakatï alajjpachan utjki ukanak thaqasipkakim, uka alajjpachanwa Cristojj Diosan kupëjjapan qontʼatäski.+
2 Kunanakatï alajjpachan utjki ukanakat lupʼisipkakim,*+ kunanakatï aka oraqen utjki ukanakat jan lupʼipjjamti.+
3 Jumanakajj jiwjjapjjtawa, jakäwinakamajj Diosan munañaparjama Criston imantatawa.
4 Jakañ apanir Cristojj+ chʼamap uñachtʼaykani ukhajja, jumanakajj jupamp chikaw uñstapjjäta, jupamp chikarakiw kʼajtapjjäta.+
5 Ukhamajj aka oraqenkir cuerponakamatjja akanak chhaqtayapjjam:+ qʼañu jucha* luraña, ajjtaskañanak luraña, warmi jan ukajj chacha sinti munañampi atipayasiña,+ jan walinak lurañ munaña, maynitakik taqe kuns munaña, ukajj idolonakar adorañawa.*
6 Ukanak kawsaw Diosan colerasiñapajj jutaski.
7 Mä tiemponjja ukhamarakiw jumanakajj sarnaqapjjayätajja.+
8 Ukampis jichhajj colerasiñanaksa, thithiñanaksa, mayninakar jan wali lurañanaksa,+ usuchjir arunak parlañanaksa+ taqpach apanukupjjam. Lakanakamatsa janirak ajjtaskañ arunakajj mistpanti.+
9 Jan jumanakpurajj kʼarintasipjjamti.+ Nayrajj kunjam jaqëpjjayätas ukanaksa jan wali luräwinakapsa isïkaspas ukham apsusipjjam.+
10 Antisas Diosajj churkistu uka machaq jaqëñamp isthapisipjjam,+ ukajj kunjamäkitejj Diosajj ukarjam luratawa, ukhamajj Diosar sum uñtʼasajj jukʼamp machaqaptasipkakim.+
11 Uka machaq jaqëñampi isthapisjjtan ukhajja, janiw griegosa, judiosa utjkiti, janirakiw circuncidatäñasa,* jan circuncidatäñasa, extranjeröñasa, escitäñasa,* esclavöñasa, libre jaqëñas utjkiti, jan ukasti Cristow taqe kunajja, juparakiw taqe kunankisa.+
12 Jumanakajj Diosan ajllitanakapäpjjtawa,+ santöpjjtawa, jupan munatäpjjaraktawa, ukhamajj chuymatpach sinttʼasiñampi,+ suma chuymanïñampi, humilde chuymanïñampi,+ llampʼu chuymanïñampi,*+ paciencia chuymanïñampi+ isthapisipjjam.
13 Maynitejj yaqha contra quejasiñatak razonanïchi ukhasa,+ maynit maynikam aguantasisipkakim, jumanakkamajj taqe chuyma perdonasisipkakim.+ Jehová* Diosajj taqe chuymaw perdonapjjtamjja, ukhamarak jumanakajj perdonasipjjam.+
14 Ukampis taqe ukanakat sipansa munasiñamp isthapisipjjam,+ munasiñajja jaqenakarojj wali sum mayachthapi.+
15 Uka kikparaki Criston sumankañapajj chuymanakam apnaqpan.+ Diosaw jumanakarojj jawsapjjtamjja, ukhamat mä sapa cuerpokïpjjañamataki ukhamarak sumankapjjañamataki. Yuspärasirïpjjapunim.
16 Criston arunakapajj taqe yatiñampi jumanakar sum phoqantpan. Jumanakajj maynit maynikam yatichasisipkakim, chʼamañchtʼasisipkakim,* salmonakampi,+ Diosar jachʼañchäwinakampi, adorañ* cancionanakampi, yuspärañ cancionanakampi. Jehová* Diosatakis chuymatpach cantapjjam.+
17 Kun parlasasa kun lurasasa, Tatit Jesusan sutipjjar taqe kunsa lurapjjam, jupa taypirak Dios Awkir yuspärapjjam.+
18 Casarat warminaka, chachanakamarojj istʼapjjam,*+ kunjamtejj Tatitun arkirinakapajj lurapjjañapäki ukhama.
19 Casarat chachanaka, warminakamarojj munasisipkakim,+ jupanakatakejj jan colerasipjjamti.*+
20 Wawanaka, awk taykamarojj taqe kunansa istʼapjjam,+ ukaw Tatiturojj wal kusisiyi.
21 Awkinaka, jan wawanakamarojj colerasiyapjjamti,+ ukhamat jupanakajj jan desanimasipjjañapataki.*
22 Esclavonaka, aka oraqenkir patronanakamarojj taqe kunan istʼapjjam,+ jan jupanakan uñchʼukitakejj istʼapjjamti, jaqenakar kusisiyañ laykukis lurapkasma ukhamjja, jan ukasti Jehová* Diosar ajjsartʼasa taqe chuyma istʼapjjam.
23 Kun lurkasasa, janiw jaqetakis lurapkasma ukham lurapjjañamäkiti, jan ukasti Jehová* Diosatakis lurapkasma ukhamwa taqe chuymampi taqe chʼamampi* lurapjjañama.+
24 Jumanakajj yatipjjtawa, Jehová* Diosatjja mä premiökaspas ukhamwa jumanakajj herencia katoqapjjäta.+ Ukhamajj Patronarojja, mä arunjja Cristorojj esclavonakjam servipjjam.
25 Khititejj jan wal lurki ukajja, jan wali luratapat cheqpachapuniw castigat uñjasini,+ Diosajj jan khitir arjjatasaw juzgani.+
Notanaka
^ Jan ukajja, “piensasipkakma”.
^ “Qʼañu jucha” siski uk glosarion liytʼäta.
^ Jan ukajja, “yupaychañawa”.
^ “Circuncisión” siski uk glosarion liytʼäta.
^ “Escita” siski uka arojja, jan civilizat jaqenakat parlañatakiw apnaqasirïna.
^ “Llampʼu chuymanïña” siski uk glosarion liytʼäta.
^ Apéndice A5 liytʼäta.
^ Jan ukajja, “ewjjtʼasisipkakim”.
^ Jan ukajja, “yupaychañ”.
^ Apéndice A5 liytʼäta.
^ Jan ukajja, “sujetasipjjam”.
^ Jan ukajja, “jan qhorüpjjamti (jan phirüpjjamti)”.
^ Jan ukajja, “jan aynachtʼapjjañapataki”.
^ Apéndice A5 liytʼäta.
^ Apéndice A5 liytʼäta.
^ Apéndice A5 liytʼäta.
