1 Timoteo 2:1-15
2 Nayraqatajj taqeniruw nayajj chʼamañchtʼapjjsma, Diosar ruwtʼasipjjañamataki, oración lurapjjañamataki, mayninakatakis mayipjjañamataki, yuspärapjjañamataki. Taqe ukanakjja lurapjjañamawa, taqe kasta jaqenakataki,
2 reyinakataki, taqe jachʼa cargoninakataki,*+ ukhamat jiwasajj sumaki, Dios chuyma, taqe kunsa sum phoqasa jakañasataki.+
3 Taqe ukanakajj jiwasar Salviri Dios nayraqatanjja wali sumawa, kusiskañarakiwa,+
4 Diosajj taqe kasta jaqenakan salvasipjjañapa+ ukhamarak kunatejj cheqäki uk sum uñtʼapjjañapwa muni.
5 Kuna laykutejj mä Diosakiw utji,+ Diosampi jaqenakampi+ pactor mantapjjañapatakis mä yanapirikiw* utji,+ jïsa, mä jaqekiw utji, jupajj Cristo Jesusawa.+
6 Jupaw jakäwip churäna, ukhamatwa ukhat ukha churasajj taqe* jaqenakaru juchat kutsuyäna.*+ Jaqenakasti tiempoparuw uka toqet yatiyapjjani.
7 Ukanak yatiyañatakiw+ Diosajj mä yatiyirjama, mä apostoljam nayar uttʼayitu,+ yaqha markanakan yatichiripjama,+ ukhamat Diosar confiyañjjata,* kunatï cheqäki ukanakjjata yatichañataki. Nayajj cheq parlaskta, janiw kʼariskti.
8 Chachanakajj taqe cheqansa oración lurasipkakiñapwa nayajj munta, Diosat jan jitheqtasin amparanak loqtasa,+ jan colerasa,+ jan chʼajjwasa.+
9 Warminakajj ukhamarakiw sum isthaptʼasis kʼachachtʼasipjjañapa, humilde chuymampi, wali amuyumpi.* Janiw ñikʼutanakapjja kunayman kʼanatanakampi* kʼachachasipjjañapäkiti, janirakiw qorimpisa, ni perlanakampisa, ni jila alani isinakampis kʼachachasipjjañapäkiti,+
10 jan ukasti Dios chuyma warminakjamaw+ suma luräwinakampi kʼachachasipjjañapa.
11 Mä warmejj amukiw* yateqañapa, humilde chuymampi.+
12 Warmejj janiw yatichañapäkiti, janirakiw warmejj chachar apnaqañapäkiti, jan ukasti jupajj amukïñapawa.*+
13 Kuna laykutejj Diosajj Adanaruw nayraqat luräna, ukjjaruw Evar lurarakïna.+
14 Ukhamarus janiw Adanajj engañjatäkänti, jan ukasti warmiw qʼala engañjatänjja,+ ukhamatwa jupajj juchar purtʼasïna.
15 Warmitakejja wawanïñajj walïspawa, ukaw juparojj jan walinakar jan purtʼasiñapatakejj jarkʼaqani.+ Jupatejj* Diosar confiyasa,* munasisa, Dios nayraqatansa santa warmit uñjata, wali amuyumpi* sarnaqaskakinejja,+ jupajj jarkʼaqatäniwa.
Notanaka
^ Jan ukajja, “autoridadanakataki”.
^ Griego arunjja, khititejj paninir mä acuerdor mantapjjañapatak yanaptʼki uka jaqetwa parlaski.
^ Jan ukajja, “taqe kasta”.
^ “Juchat kutsuyaña” siski uk glosarion liytʼäta.
^ Jan ukajja, “fe; iyawsäwi”.
^ Jan ukajja, “suma amuyumpi”.
^ Ukajja, sinti jiljañampi kʼanasiñatwa parlaski.
^ Jan ukajja, “tranquilokiw; jan chʼajjwasaw”.
^ Jan ukajja, “suma chuymanïñapawa; janiw chʼajjwañapäkiti”.
^ Griego arunjja, “Jupanakatejj”.
^ Jan ukajja, “fe; iyawsäwi”.
^ Jan ukajja, “suma amuyumpi”.