To vo nɔ agbetɔwoɔ, Yesu nyi mawudɔla le jeŋkwimɛ gbɔxwe wovaji do nyigban ji. (Ӡan 8: 23) Yesu yí nyi Mawu nuwawa ŋkɔtɔ. Ékpedo Mawu nu le enu kpɛtɛwo wawa mɛ. Yiɖekɛ kpaŋ yí Mawu wa tiin, eyi taɖo yí woyɔɛ mɔ Mawu Vi “akogo”. (Ӡan 1:14) Yesu nyi Mawu gbetanatɔ, eyi taɖo woyɔɛ mɔ ‘‘Enyɔ lɔ’’.—Hlɛn Elododo Wema 8:22, 23, 30; Kolosetɔwo 1:15, 16.

Mawu dɔ Eviɛ ɖaɖa nyigban ji. Étrɔ yi gbe do vijidɔ mɛ nɔ Ӡuifu cugbejɛvi le alɔji Maria. Eyi taɖo Yesu dalɔ denyi agbetɔ o. (Luiki 1: 30-35) Susu ciwo yí taɖo Yesu va nyigban ji do yí nyi mɔ (1) ákpla nyɔnɔnwi mì so Mawu nu, (2) ávaɖo kpɔwɛ ɖɛ nɔ mì le egbejinɔnɔ nɔ Mawu le nɔnɔmɛ sɛnŋsɛnŋwo mɛ, koɖo (3) ásɔ yi gbe blebu maɖoafɛn cu tafɛn.​—Hlɛn Maki 10:45.

Etafɛn nyi efɛn ci wocu yí sɔ ɖe amɛ gbe ti le afɔku mɛ. (Hunhun 21:29, 30, nwt) Mawu deɖui le gɔnmɛjeje mɛ mɔ amɛ aku nyɔxo alo aku sa o. Lé mìwɛ yí nyaɔ? Mawu nu nɔ agbetɔ ŋkɔtɔ Adamu mɔ, nɔ yiwa enu ci yí Bibla yɔ mɔ ‘‘nuvɔn’’ ɔ, yɛaku kpeŋ. Nɔ Adamu dewa nuvɔn saɔ, daku gbeɖe o. (Gɔnmɛjeje 2:16, 17; 5:5, nwt) Shigbe lé Bibla nui nɛɔ, Adamu ji yí eku to yí va nyigban ji. Adamu sɔ nuvɔn koɖo ele ci yí nyi eku ba nɔ yi jijimɛviwo pleŋ. Mìӡan tafɛn  gbɔxwe yí agan so eku cinɔ̀ ci mìɖu so Adamu gbɔ shi.​—Hlɛn Rɔmatɔwo 5:12; 6:23.

Mi yí atɛnŋ acu tafɛn lɔ keŋ ahwlɛn mì gan so eku shiɔ? Nɔ mìkuɔ, mìwoŋtɔwo nuvɔnwo fɛn yí mìcu. Agbetɔ makpemakpe ɖe datɛnŋ acu fɛn do ta nɔ mɛbuwo nuvɔnwo o.—Hlɛn Ehajiji Wema 49:7-9.

Kpɔ video ci yí nyi Nyi yí taɖo Yesu kuɔ?

Yesu to akpo nɔ mì. Déwa nuvɔn kpɔ o. Eyi taɖo deӡan mɔ yɛaku do yi nuvɔnwo ta o. Mɛbuwo nuvɔnwo ta yí eku do. Lɔnlɔn gangan manumanu yí Mawu ɖo nɔ mì taɖo yí dɔ Eviɛ yí evaku do ta nɔ mì. Yesu can lɔn mì taɖo yí lɔn ɖo to Dalɔ keŋ yí sɔ yi gbe na do ta nɔ mì.—Hlɛn Ӡan 3:16; Rɔmatɔwo 5:18, 19.

Hwenu Yesu le nyigban jiɔ, éda dɔ̀ nɔ dɔ̀nɔwo, éfɔn amɛ kukuwo, yí gbekpedo mɛ ciwo yí le efunkpekɔ nu. Éto wana cɛwo ji yí dasɛ enu ciwo yí avawa nɔ agbetɔ tonusetɔwo pleŋ le esɔmɛ. (Matie 15:30, 31; Ӡan 5:28) Le Yesu ku goduɔ, Mawu fuin yí etrɔ gbɔngbɔnmɛ nuwawa. (1 Piɛ 3:18) Yi goduɔ, Yesu nɔ anyi le ɖushimɛ nɔ Mawu, yí le te kpɔ hwenu ci yí Yehowa asɔ ŋsɛn ni nɔ aɖu Fyɔ do nyigban lɔ pleŋ ji. (Ebretɔwo 10:12, 13) Egbɛmɛɔ, Yesu nyi Efyɔ le jeŋkwimɛ, yí yi nukplaviwo le eŋɛnywi cɛ drakɔ le afishiafi.—Hlɛn Daniɛli 7:13, 14; Matie 24:14.

Sabaɖeɔ, Yesu azan yi fyɔɖuɖuŋsɛn yí agu efunkpekpewo pleŋ koɖo mɛ ciwo yí hɛnnɔ wo vɛ si. Amɛ ciwo yí xɔ Yesu ji se yí sekɔ tonu ni wo avakpɔ jijɔ le paradiso mɛ le nyigban ji.—Hlɛn Ehajiji Wema 37:9-11.