Madhu, a mɔɔ ɩzʋ̃ India nɩ kã kɛɛ, “Mmɩlɩ mɔ nɩ mɩdɩ kuakula nɩ, nɩ mɩ anlima benyia yɩ kyĩ mɩ na ɩwʋdʋwʋdʋ mɩ eɣile bela. Migyialɩ mɛda sʋ̃ nɩ, nɩ mɩ asɩwʋ sʋ̃ tanɩ mɩ anyɩ. Nɩ ɩ nɩɩ mɩ asɩwʋ benyia nɩ mɩ di kɛɛ dɔngɔ. Nɩ ɩyɛ mɩ kɛɛ muhũ mʋ nwʋ po.”

 World Health Organization bɔ amanɩyɛ kɛɛ, “mmaalɛ mɔɔ bɛyɛ bɛ ayɛkwa wuli zʋlɔ wɔ oyuwadɩ yi nu.” Ngʋndawulɛ kile kɛɛ, sɛ ɛyɩ mmaalɛ asã siye ahanlɩ a, bo nu ɔkʋ̃ yɛ bɛyɛ yɩ ayɛkwa anzɛnyɩɩ bɔtʋ yɩ mmɔna a.

 Sɛ eyi be dʋ wʋ kyɩ̃ a, ebiye a, bɔlɔ kɛhã wʋ na wʋadɩ nɣanlɩ po kɛɛ dɩka bela mɔɔ ɔkɔhɔ nɩ, abiye kɛyɛ wʋ ayɛkwa, kɔwʋdʋwʋdʋ wʋ, anzɛnyɩɩ bɔkɔdʋ wʋ mmɔna. Iluwa ɔzɔ basabasayɛlɛ nɩɩ atɩɩtɩɩ mɔɔ mmaalɛ duwa numɔ nɩ ti, ebiye a, ɛkɛdɩ nɣanlɩ kɛɛ mmenii bu ‘Mmaalɛ kɛɛ mfasʋ bela íni bɔ zʋ.’ Asʋ̃ ɔzɔ la yɛ Nyamɩnlɩ sʋ̃ bu mmaalɛ a?

 Mɔɔ Bayɩbʋlʋ yɩ kã: “Benyia nɩɩ baalɛ yɛ [Nyamɩnlɩ] wɔlɩ bɛ a.”—Gyɛnɛsɩsɩ 1:27.

 Mɔɔ ikile: Nyamɩnlɩ wɔlɩ benyia nɩɩ baalɛ. Ɩnwʋ kɛɛ bo munwala bɛfata annidi. Akʋ̃ sʋ̃, Nyamɩnlɩ kila ɔhʋanɩ kɛɛ ohunɛ ‘kɔlɔ yɩ yɩ kɛɛ yɩzayɩ munli yɩ nwʋ.’ Na íni kɛɛ ɩyɛ kɩngɛndɛnyɩ wɔ yɩ zʋ, ɩwʋdʋwʋdʋ yɩ, anzɛnyɩɩ ɩyɛ yɩ ayɛkwa. (Ɛfɩsɛsɩmaa 5:33; Kolosiyiamaa 3:19) Ɩda ali petee kɛɛ, mmaalɛ bɛ banɩwɔlɛ nwʋ hyinyia Nyamɩnlɩ.

 Maria mɔɔ ɩzʋ̃ Argentina nɩ hanlɩ kɛɛ, “Mmɩlɩ mɔ mɩdɩ kuakula nɩ, mu mmusunwamaa yɩ be dʋlɩ mɩ mmɔna. Minyianlɩ alʋbɔ 17 nɩ, mɩ egyima diibenyia hanlɩ kɛɛ sɛ mɩáma ɩ nɩɩ mɩ da a, sa ɩyɩ mɩ ali. Minyinli yi sʋ̃, nɩ mu hũ, mɩ awʋvʋlɔ, nɩɩ mɩ apaa yɩ nu maa bɛáva mɩ bɛyɛ hwɩɩ. Naasʋ̃ aɣinzi yi, mɩɣa muzumanlɩ Gyehova, b mɔɔ ɩdɩ Dɩyɛwɔlɛvʋlɔ nɩ yɩ nwʋ dɩyɛ. Ɩnwʋ mmaalɛ kɛɛ bɛfata annidi. Mmɩlɩ mɔ mɩɣa mʋnwʋnlɩ kɛɛ ɩdɔ mɩ na mʋtʋ bʋlɔ wɔ yɩ anyɩ zʋ nɩ, ɩmanlɩ mɩ ahʋnlɩnɩ dɔlɩ mu kunlu baaba.”

 Mɔɔ Bayɩbʋlʋ yɩ kã: “Ɔhɔnwʋmmɔ be wɔ kɛnɩ mɔɔ bɔvʋãmɩ nwʋmɔ bɛtɛla mmeliyema po.”—Ɛɣɛlɛwulɛ 18:24.

 Mɔɔ ikile: Ɔhɔnwʋ baaba kɔwʋwa wʋ. Sɛ ɩkɛyɛ bʋwɔ a, kã kezimɔ ɛtɩ nɣanlɩ nɩ nwʋ odwokɔ kile abiye mɔɔ ede yi di.

 Elif mɔɔ ɩzʋ̃ Türkiye nɩ sʋ̃ hanlɩ kɛɛ, “Abiye dʋlɩ mmɔna mɩ na alʋbɔ kɛyɛ 20 po nɩ abiyela ízi nwʋmɔ hwɩɩ. Nɩ eyi ɩáma mɩ anyɩ de na nwʋmɔ adwɩnɩndwɩnɩ manlɩ minyianlɩ adwɩnɩ nu adimakɛlɛ. Naasʋ̃ mmɩlɩ mɔ mɩhanlɩ nwʋmɔ odwokɔ mihileli abiye mɔɔ mide yi midi nɩ, ɩmanlɩ mɩ ahʋnlɩnɩ dɔlɩ mu kunlu.”

 Mɔɔ Bayɩbʋlʋ yɩ kã: “Bɔdʋ́ bɛ adwɩnɩndwɩnɩ munwatĩĩ bogua [Nyamɩnlɩ] zʋ, iluwakɛɛ ɩdwɩnɩ bɔ nwʋ.”—1 Pita 5:7.

 Mɔɔ ikile: Sɛ ɔbɔ mpayɩ a, Nyamɩnlɩ tiye paa. (Ndwomi 55:22; 65:2) Iluwakɛɛ ɩdwɩnɩ wʋ nwʋ nɩ ti, ɩkɔhʋla ɩkɛma ɛkɛdɩ nɣanlɩ kɛɛ mfasʋ wɔ wʋ zʋ paa.

 Ana mɔɔ ɩzʋ̃ Belize nɩ kã kɛɛ, “Gyehova yɩ nwʋ dɩyɛ mɔɔ muzumanlɩ nɩ manlɩ ɛyɛkɛ mɔɔ nɩ midii nɩ hanlɩ azɩ kʋlaa. Sikalɛyɩ, mʋkʋla mɩkã kezimɔ mɩtɩ nɣanlɩ nɩ nwʋ odwokɔ munwala mikile Nyamɩnlɩ wɔ mpayɩwɔlɛ nu. Ɩdɩ kɛɛ ɔhɔnwʋ be mɔɔ ɩtɩ kezimɔ mɩtɩ nɣanlɩ ankasa nɩ tʋ.”

 Mɔɔ Bayɩbʋlʋ yɩ kã: ‘Gyehova keli aɣinsamaa nɩɩ bɛzabɛ mɔɔ besizi bɛ nɩ bo odwokɔ ɩkɛma bɛ. Ama desanii mɔɔ ɩda azɩlɛ yɩ zʋ nɩ iánwunlawunlanlɩ bɛ dɔkʋ̃.’—Ndwomi 10:​17, 18.

 Mɔɔ ikile: Ɩlɛ́kyɛ bela, mmaalɛ mɔɔ besizi bɛ, bɛyɛ bɛ ayɛkwa anzɛnyɩɩ basabasa nɩ, Nyamɩnlɩ kɛva yɩ munwala kɛɣa awielɩyɛ.

 Roberta mɔɔ ɩzʋ̃ Mexico nɩ kã kɛɛ, “Mmɩlɩ mɔ mɩɣa mʋnwʋnlɩ kɛɛ, ɩlɛ́kyɛ bela Gyehova kɛyɩ atɩɩtɩɩ mɔɔ bɛfa bɛyɛ mmaalɛ wɔ kɛnɩ nɩ, ɩmanlɩ mɩ ahʋnlɩnɩ ɩdɔlɩ mu kunlu baaba.”

 Sɛ ɛpɛ kɛɛ ɔnwʋ sʋ̃maa falɩ anyɩnlɩlazʋ mɔɔ Bayɩbʋlʋ yɩ fa ma, sianti mɔɔ ɔkɔhʋla kele anʋhʋba azʋlɔtʋ mɔɔ ɩwɔ numɔ nɩ keli, nɩɩ mɔɔ Gyehova Dasɩvʋlɔmaa yɛ fa bʋwa mmenii ma bɛtɩ Bayɩbʋlʋ yɩ tʋ nɩ nwʋ a, kã nwʋmɔ odwokɔ kile.

 Sa ɔkʋla twɩ̃ mɔɔ bɛpɩlɩntɩ nɩ be.