1, 2. Gini bakerepai si aidi Eriya mangihe, na wai Eriya adu kia ti Aba?

ERIYA adu na nyemu ka kpara nisako fu gu Bako du ngbangbaturũ yo. Ono gu bakere rimbasa aboro naadu pati ko abi gupai bambeda kusayo nga gu ndikidi nebi re ayambu we ngbangbaturũ yo si ki ye, na dungu agu aboro re kini asadi ka ngba bangiriko. Mbata fu Eriya dakpa kurii Bagangara Karumera yo ka kpara fu Yekova Mbori, bakerepai kinaho si aidi ko mangihe mbata. Si aidi ko ndu ka fura fu Bakindo Aba.

² Agu akumba ue re aima du kia gbe. Aba avo tiko na roko abakindo, ko ki ngia boro ngbaduse, na gu boro diani aima sani sa irisokpiahe ni ipo. Eriya avo roko anebi, nangia kungbo wiri taata roko i anaambakadaha rogo kpoto anya watadu tutu mange kameri watadu mange meme. Ko angia boro wingbaduse, boro rurupai, na boro idapase. Gu uru naadigo re aima yugo gu kparakparapai naadu dagba Eriya na Aba.

3, 4. (a) Tipagine gu uru re adu ti ni ni gbegberẽ uru fu Aba na kura airisi Bara? (b) Gini asanahe ani ka gbia karagapai sani?

³ Si angia gbegberẽ uru fu Aba na airisi Bara. Gu pambori nga ga apagano Aba na diako nangia Nakindo Izebere atonaha rogo gu kindo nangia ga aYisaraere naadu na angbatunga bawe rogoho, Yekova aima mangaha gbegberẽ. Aboro aima ye ki ini gupai nga Bara angia kungbo zire mbori. Gu kungbo mbori re aarengbanga ka ziga kungbo we fu gu gaha anebi naado gbere, kini kpari fuhe kakaka, na kini dewe tiyo te. Bara aarengbanga ka batasa agu akumba naadu 450 re be kere kpio te. Ono gu zire mbori re aima ti berewe rogo kurapai. Agu anebi nga ga Bara yó akpari fu Bara tipa agarã biata na adiwi kuriihe tipa ko digisi gu bagbanga ugure naye ku rogo ringara, ono ka Bara arengbanga ka manga wiripai ya. Sidu, Yekova aru ka yugo gupai berewe nga ko nga ndikidi Mbori ni digiso ko gu ugure re.—1 Aba. 16:30–17:1; 18:1-40.

⁴ Ono gini regbo du Yekova asiaha ka mangapai rogoho?  Ginipai Eriya amangihe wa ko aasungudo Yekova? Na ginipai rengbe ani ka wirikaha be gi kumba nga ga idapase ko re? Ani bingo ho.—Oni gedi 1 Abakindo 18:41-46.

5. Ginipai Eriya aya fu Aba ko mangihe, na ya mo pai ho nayugoho nga Aba awirikipai ti agu apai namangi ni gu uru re?

⁵ Eriya andu fuo Aba ki ya fuko: “Mo gúari, ki ri riahe ki mbiri he; bambiko bamai napuma.” Ya mo gu gbigbita bakindo re awirikipai ti agu apai namangi ni gu uru re? Gu pangbanga re apenga pa gu ko awirikihe te, ono fugo ho ko agumbaha nga ga saberã te, na ko aasananga gu nebi re a ko undoko ko kpari fu Yekova tipa mbupai te. Aba aguari gbua ki ndu “ka ri riahe ki mbiri he.” (1 Aba. 18:41, 42) Na Eriya tigako?

6, 7. Ginihe Eriya akpari tipaha, na tipagine ko akpari ti ni?

⁶ “Eriya ki ndu ku ri Karumera yo; ko ki nugadi ku sende, ki moi riko ku dagba arukusuko yo.” Baraho Aba andu ni tigako ka hiiso vuko, Eriya andu ka kpara fu gu Bako du ngbangbaturũ yo. Oni bingo wai Eriya anugo. Ko anugodi ku sende, ki moi riko ku dagba arukusuko yo. Tipagine ko amangihe wo ti  ni? Ziazia Kekeapai naya furani rogo Yakoba 5:18 wẽ, Eriya akpari tipa ugure digi. Si nawira gupai nga ko adakpa kina boro kurii Karumera yo ka kpara.

⁷ Mbata fu gu regbo re, Yekova aya: “Mi akéda mai ku auru kpotosende.” (1 Aba. 18:1) Sidu, Eriya akpari tipa Yekova mangi gupai ko agumbaha re, a wa Yesu arugu apefuoko i nikpari fuo agarã wa sa kutu fuo gu regbo re.—Mt. 6:9, 10.

8. Ginipai ga Eriya kpiapai ayugoho furani tipa kparakpee?

⁸ Ga Eriya kpiapai nayugo bakerepai furani tipa kparakpee. Gupai Eriya aperesipaha mbatayo angia pa manga gupai Mbori akpinyemuhe. Ho ani akpara ni, si ni wenepai ani tingidi gupai nga: “Ka ani ho gu he ku sangba gako nyemuhe yo, ko gi pa rani agia.” (1 Yo. 5:14) Sidu tie, si naida aida ani ini gupai Mbori akpinyemuhe tipa wa ka gaani kpee ngba tiko, na si du nga ndu gupai si aida ani naawisigo Ziazia Kekeapai ti ni na aʹuru dũ. Eriya adu a na nyemu ka bi gu bakere ugure namangi si nadigi bambiko si aima ye na bakere rungo fu aboro gako ringara. Kpotokoyo aima du tigaha na tambuahe fuo biko gu iiriwopai Yekova amangihe ni gu uru re. Ani naida gaani kpee yugu gaani tambuahe a na pa berã ani pa akuarani.—Oni gedi 2 AKorindo 1:11; AFiripoio 4:6.

9. Ginipai Eriya aya fu gako moyambu ko mangihe, na gini apai ue Eriya adu na ni nga gu ani ka sakapai tipaha?

⁹ Eriya aima du na gu kido nga Yekova nika digiso gu ugure re adigiso, ono ko aainongo gu regbo nzunzu ko nika digisoho te. Wa ko aasungudo gu regbo re, ginipai ko aamangaha? Oni bingo gupai gu pangbanga re apehe niya: “Ko ki ya fu gako moyambu, ‘Mo ndú awere, ka ngera ku baime yo.’ Ko ki ndu, ki ngere, ki ya, ‘He yo te.’ Eriya ki ya, ‘Mo ndú berewe bara saba.’” (1 Aba. 18:43) Ga Eriya kpiapai nayugo apai furani kandara ue. Bambataha nga, ko adu na kido. Uehe nga, ko aangera angera kindi.

10, 11. (a) Rogo gini gene Eriya ayugu idapase kuti ga Yekova kidohe? (b) Tipagine rengbe ani kadu ti ni na kina ngbatunga gu idapase re?

¹⁰ Wa Eriya adu na kido kuti ga Yekova kidohe, ko aangera kakaka tipa guhe nika yugo gupai nga Yekova ima mbeda ka  mangapai. Gako moyambu adakpa kina boro kurii bagangara yo ka ngera singia wiri rungbutorungbuto mai tona ka kura. Ho ko azoro ni yo, ko agumba kina dokonyo pangbanga fu Eriya ki ya: “He yo te.” Rago adu ariyo giangiri zanga wiri mai. Oni bingo gupai re! Eriya aya fu Bakindo Aba ni gu uru re wẽ: “Bamai napuma.” Gu nebi re aru wai ka pe ngbatungapai wa gure baraho wiri mai aadunga ni ariyo ya?

¹¹ Eriya aima inopa ga Yekova kidohe. Wa ko angia ga Yekova nebi na gu boro naafura kubako, ko aima du na gu kido nga Yekova nika manga gupai amanga ko akidopaha. Gako bakere kido du nasako ko ya wẽ ko nagia woro mai agia si nipuma. Ko adu wakina Moize, nga guko ‘naabi gu ko ka bangirise abinga ko ya.’ Ya mo mo nabi Mbori wa gure ni idapase? Ko ima fu nduapai furani nga gu rengbe ani ti ni kadu na gu ngbatunga idapase re kutiko na gako akidohe.—Eb. 11:1, 27.

12. Wai Eriya ayugu gupai nga ko aangera angera kindi, na ginipai ko amangihe ho ko agi pa wiri tooni rungbutorungbuto mai ni?

¹² Ani bingo wai tie Eriya aangera angera kindi. Ko akedi gako moyambu, angianga bara sa watadu bara ue gbua ya, ono bara saba! Si nawira gupai nga ome gu moyambu re aima tona ka bata, ono Eriya aangera kindi tipa gupai nika yugoho nga mai naye. Ni yangaraha tie, ho gu moyambu re andu saba nduge ni, ko ayego fuo Eriya ki ya fuko: “Mo ngére, wiri ndura naguari baime yo, wa kina be boro.” Oni berẽnga pa gu moyambu re ko nizadi beko ka yugo bakio gu wiri rungbutorungbuto mai ko abihe si nikuru barii Bakere Baime yo. Si nawira gupai nga gupai re aayugongo ho fu gu moyambu re nga mai naye te. Ono tipa Eriya, ko aima ino nga mai ima mbeda. Ko ki ya fu gako moyambu nibasa wẽ: “Mo ndú, ki ya fu Aba, ‘Mo mbákadi ga ngbagidavura, ki zorõ, ka mai dika nga ro ya.’”—1 Aba. 18:44.

13, 14. (a) Wai rengbe ani kaa ngera angera kindi wa Eriya? (b) Gini nduapai du berani tipa mangapai ni ipiipihe?

¹³ Eriya amoi wene kpiapai furani berewe. Ani naraka a ti gu regbo Mbori naima mbeda ka digiso gako kidohe. Eriya apidi digido ugure; gu ga Mbori amoyambu du areme napido digido gi gbegberẽ sino raka du awere re. (1 Yo. 2:17) Si naida ani naangera angera kindi daho Yekova Mbori nika mangapai ni. Kina boro Wiri Mbori nitiko nga Yesu arugu apefuoko ki ya: “Oni ngére tie, bambiko oni aina nga ni gu uru gaoni Gbia ka ye te.” (Mt. 24:42) Ya mo fugo Yesu ayugu gupai nga apefuoko  ainingo gu regbo wagu tooni digida zegino nika ye te? Oó, bambiko ko aima gumba dungu apai nga gu nika manga kini yugu gupai nga digida zegino ima mbeda. Ani dunduko rengbe arengba ka bi agi apai nayugo pa mbeda “digida rago” re.—Oni gedi Matayo 24:3-7.

¹⁴ Agu apai i aino apai ti ni re dunduko ni basasa nayugo gupai nga digida zegino ima mbeda. Ya mo bangisapai sa rengbe ka sa rani ani naairiso Yekova na gupai berãrani yo nga digida zegino ima mbeda? Wiri bangisa tooni rungbutorungbuto mai nasa Eriya ko dakuti gupai nga Yekova ima mbeda ka mangapai. Ya mo ko akido ku korokoro mangu yo?

15, 16. Gini apai namangi ni kina ipo, na ginipai si awiraha nga si adu berã Eriya yo?

¹⁵ Gu pangbanga re nandu ku mbatayo niya: “Fuo ho ngbutuko, ngbangbaturũ ki biri abira be mai na yuge, mai ki na ana kpodorokpodoro. Aba ki ndu rogo gako ngbagidavura ku Yizerere yo.” (1 Aba. 18:45) Apai atona ka manga ni kina boro ipo. Ho ga Eriya moyambu aape sangba Eriya ni fu Aba, gu wiri tooni rungbutorungbuto mai re akii ni bakerehe ki hiisi ngbangbaturũ ki biri. Bakere wege atona ka ya. Mai ki na kpodorokpodoro ku Yisaraere yo ki digisi gu ugure nadi agarã biata na beberehe. Ime arimi ku rogo sapusapu asende dunduko kidu na ni nyokponyokpo. Gu di nga Kisona ahi ki fu na kure agu anebi nga ga Bara yó kusayo nga aguyo nakpi ni gu uru re. AYisaraere agbia momu a ka dia pa iriso Bara kusayo rogo ringara na Mbori ki mbupai fuyo.

¹⁶ Gure nga gupai Eriya amoiberãko tipaha nirengo! Isoke ko abakibangiriko abaka na pa gupai Aba nika mangaha fuo biko gi iiriwoapai re. Ya mo Aba asa berãko ki mbu iriso Bara? Agu apai namangi ni gu uru re aima rengba ka sa berãko. Ono ani ainongo gupai naadu berãko yo ti gu regbo re te. Gu pangbanga re nape gupai furani gbua nga, gu bakindo re ‘andu rogo gako ngbagidavura ku Yizerere yo.’ Ya mo ko awirikipai ni gu uru re? Ya mo ko adiberã ka mbu gako gbegberẽ apai? Agu  apai namangi fuo gure nayugo gupai nga karagapai nga oó. Apai aandu kindi ku mbatayo fu Aba na fu Eriya.

17, 18. (a) Ginipai namangi fu Eriya ngbagene Yizerere? (b) Ginipai nairiwo ti ga Eriya oto tona Karumera yo ki da Yizerere yo? (Oni bi gu kekeapai abi a du bandu waraga yo.)

¹⁷ Ga Yekova nebi aguari kini ndu kina ngba gu gene Aba aga ngbaha. Gure angia gbegberẽ regbo tipa ka ndu ngba tuturũ gene, bambiko mai adu, bitimo mai kidu, na uru kini mbedi ka ti. Ono iiriwopai amangi.

¹⁸ “Be Yekova ki du ku ri Eriya; ko ki sikpa tiko, ki oro ku mbata yo fu Aba dati barima ku Yizerere yo.” (1 Aba. 18:46) “Be Yekova” amangisunge kurii Eriya ngba iiriwo gene. Baturõ Yizerere adu ti gu ba re nga akirometere 30. * Mo berẽnga pa gu nebi re ko nisikpa gako gbanga roko ki voho bara ti mbosoko tipa ka ora wenengai ki gbia Aba gene rogo gako ngbagidavura ki susi ko!

19. (a) Gu ome Mbori afuhe fu Eriya natingida rani na pa gini asangbaanebi? (b) Wa Eriya aaora ku Yizerere yo, ginipai ko aima inoho?

¹⁹ Gupai re aima du ni pa maku fu Eriya nirengo! Ko agbia ome kini oro wakina paranga, watadu susi paranga. Gere natingida rani na pa agu asangbaanebi nafura tipa wai sosono aboro nika gbia gu ome nga ga aparanga rogo gu Paradizo naye. (Oni gedi Yesaya 35:6; Rk. 23:43) Wa Eriya aaora rogo dododo rago, ko aima ino gupai nga ko ima ngba bangiri gu Bako nga Yekova Mbori!

20. Wai rengbe ani ka mangapai tipa ka gbia ga Yekova amaku?

²⁰ Yekova na bakere nyemu ka fu amaku furani. Si naida ani mangipai tipa ka gbia agu amaku re; si rẽarẽ ani mangi asadatise nyanyaki tipa ka gbiaha. Si naida ani naangera angera kindi wakina Eriya, kini berẽkurii agu apai nayugoho nga Yekova ima mbeda ka mangapai ka digisa gi zegino re. Wakina Eriya, ani na wene nduapai berani ka kido kuti Yekova na kpotoraniyo dũ, “nga [gu] Mbori nga irarengo.”—Tam. 31:5.