Lelaʼ junpʼéel baʼal tuláakal máak tak u yojéeltik yéetel jejeláas bix u kʼáatik. Maʼ xaaneʼ jeʼel u yaʼalikoʼob beyaʼ: «¿Baʼax oʼolal beetaʼab wíinik way Luʼumeʼ? wa ¿Baʼax u biilal u kuxtal máak?». Chéen baʼaleʼ le Bibliaoʼ ku yaʼalikeʼ toʼoneʼ kuxaʼanoʼon utiaʼal k-bisikba yéetel Dios. Utiaʼal k-maas naʼatik lelaʼ koʼox ilik jujunpʼéel baʼaloʼob ku yaʼalik le Bibliaoʼ.

•   Dios beet wíinik. Le Bibliaoʼ ku yaʼalik: «[Dios] beetmiloʼon, u tiaʼaloʼon» (Salmo 100:3; Apocalipsis 4:11).

•   Dioseʼ yaan baʼax oʼolal u beetmaj tuláakal baʼal, tak wíinik (Isaías 45:18).

•   Desde ka beetaʼab wíinikeʼ ku yuʼubik u kʼaʼabéetil u biskuba yéetel Dios bey xan u yojéeltik baʼax oʼolal kuxaʼan (Mateo 5:3). Dioseʼ u kʼáat ka náatsʼkoʼon tu yiknal (Salmo 145:16).

•   Toʼoneʼ k-natsʼikba yiknal Dios le kéen k-il kʼaj óoltik bey xan le kéen k-il bey k-amigoeʼ. Le Bibliaoʼ ku yaʼalik: «Natsʼabaʼex tu yiknal Dios, letiʼ túuneʼ bíin u natsʼuba ta wiknaleʼex» (Santiago 4:8; 2:23).

•   Utiaʼal k-bisikba yéetel Dioseʼ unaj k-beetik le baʼax ku páaʼtik tiʼ toʼonoʼ. Le Bibliaoʼ ku yaʼalik: «Respetart u jaajil Dios yéetel beet baʼax ku yaʼalik, tumen chéen letiʼe baʼax unaj u beetik máakoʼ» (Eclesiastés 12:13).

•   Maʼ tun xáantaleʼ Dioseʼ yaan u luʼsik le muʼyajiloʼ yéetel yaan u tsʼáaik junpʼéel jatsʼuts kuxtal tiʼ le máaxoʼob beetik baʼax uts tu tʼaanoʼ. Bey kun béeytal le baʼax u tukultmaj utiaʼal wíinikoʼ (Salmo 37:10, 11).