Wa a kʼáat a bisaba yéetel Dioseʼ táanileʼ kʼaʼabéet a kʼaj óoltik yéetel a beetik baʼax uts tu tʼaan. Beyoʼ Dioseʼ yaan u náatsʼal tiʼ teech (Santiago 4:8). Le Bibliaoʼ ku yaʼalikeʼ «Dioseʼ maʼ náach yanil tiʼ máakiʼ» (Hechos 17:27).

•  Bix jeʼel a biskaba yéetel Dioseʼ

•  Baʼax ku yaʼalik le máakoʼob yoʼolal Diosoʼ

 Xok le Bibliaoʼ

•  Le Bibliaoʼ ku yaʼalik: «Tuláakal Tsʼíibeʼ tiʼ Dios u taal» (2 Timoteo 3:16).

•  Baʼax u kʼáat u yaʼale: Dios beet u tsʼíibtaʼal le Bibliaoʼ. Letiʼ tsʼáa tu tuukul jujuntúul máakoʼob baʼax ken u tsʼíibtoʼob. Tsʼoʼoleʼ teʼ Bibliaoʼ Dioseʼ ku yaʼalik bix u kʼáat ka kuxlakoʼon. Ku yaʼalik xaneʼ Dioseʼ u yaabiltmaj máak, ku chʼaʼik óotsilil yéetel toj baʼax ku beetik (Éxodo 34:6; Deuteronomio 32:4).

•  Beet lelaʼ: Xok le Biblia sáamsamaloʼ (Josué 1:8). Kéen tsʼoʼokok a xookeʼ tukle: «¿Baʼax ku kaʼansikten yoʼolal Dios le baʼax táant in xokikoʼ?» (Salmo 77:12).

   Xok Jeremías 29:11, kéen tsʼoʼokkeʼ tuukulnen tiʼ lelaʼ: «¿U kʼáat wa Dios ka yanakten problemas wa u kʼáat ka xiʼikten maʼalobil?».

 Chaʼant le baʼaxoʼob u beetmaj Diosoʼ

•  Le Bibliaoʼ ku yaʼalik: «U jatsʼuts modos Dios maʼ tu páajtal u yilaʼaloʼ chíikaʼan u yilaʼal [...] yoʼolal le baʼaxoʼob u beetmoʼ» (Romanos 1:20).

•  Baʼax u kʼáat u yaʼale: Le baʼaxoʼob u beetmaj Diosoʼ ku yeʼesik jach bix u modos. Por ejemploeʼ le bix u beetmil u cerebro máakoʼ ku yeʼesik jach yaan u naʼat. Tsʼoʼoleʼ le bix u beetmil le Kʼiin yéetel le estrellaʼoboʼ ku yeʼesik jach yaan u poder (Salmo 104:24; Isaías 40:26).

•  Beet lelaʼ: Jóoʼs tiempo utiaʼal a chaʼantik yéetel a kaanbal tiʼ le jatsʼuts baʼaloʼob yaan teʼ yóokʼol kaabaʼ. Tsʼoʼoleʼ tuukulnen tiʼ lelaʼ: «¿Baʼax ku kaʼansikten yoʼolal Dios?». a Chéen baʼaleʼ utiaʼal u kaanbal máak tiʼ Dioseʼ maʼ chéen yaan yéetel u chaʼantik le baʼaxoʼob beetaʼanoʼ, baʼaxeʼ kʼaʼabéet xan u xokik le Bibliaoʼ.

 Meyajnaktech u kʼaabaʼ Dios

•  Le Bibliaoʼ ku yaʼalik: «Yaan in kanáantik tumen u kʼaj óol in kʼaabaʼ. Kéen u kʼáatten áantajeʼ yaan in wáantik» (Salmo 91:14, 15).

•  Baʼax u kʼáat u yaʼale: Dioseʼ ku chʼenxikintik le máaxoʼob respetartik u kʼaabaʼoʼ b (Salmo 83:18; Malaquías 3:16). Teʼ Bibliaoʼ ku yaʼaliktoʼon bix u kʼaabaʼ: «Teneʼ Jéeobaen, letiʼe in kʼaabaʼoʼ» (Isaías 42:8).

•  Beet lelaʼ: Aʼal u kʼaabaʼ Dios cada ken tʼaanakech tu yoʼolal.

 Orarnen tiʼ Jéeoba

•  Le Bibliaoʼ ku yaʼalik: «Jéeobaeʼ tiaʼan naatsʼ tiʼ tuláakal le máaxoʼob chʼaʼchiʼitik u kʼaabaʼoʼ» (Salmo 145:18).

•  Baʼax u kʼáat u yaʼale: Jéeobaeʼ naatsʼ yanil tiʼ le máaxoʼob ku oraroʼob yéetel u jaajil u yóoloʼoboʼ. Kéen orarnakoʼoneʼ k-eʼesik k-adorartik yéetel k-respetartik Dios.

•  Beet lelaʼ: Suukchajak a orar tiʼ Dios (1 Tesalonicenses 5:17). Aʼaltiʼ bix a wuʼuyikaba yéetel baʼax chiʼichnakkúuntikech (Salmo 62:8). c

 Confiarnen tiʼ Dios

•  Le Bibliaoʼ ku yaʼalik: «Wa minaʼan u fe máakeʼ maʼ tu páajtal u lúubul utsil tiʼ Dios» (Hebreos 11:6).

•  Baʼax u kʼáat u yaʼale: Utiaʼal a natsʼkaba tiʼ Dioseʼ kʼaʼabéet a confiar tiʼ letiʼ. Le Bibliaoʼ ku yaʼalikeʼ u yantal u fe máakeʼ maʼ chéen yaan yil yéetel u creertik yaan Diosiʼ. Baʼaxeʼ u kʼáat u yaʼaleʼ ka confiar de ke yaan u cumplirtik le baʼaxoʼob u prometermoʼ yéetel le consejos ku tsʼáaikoʼ utiaʼal a wutsil. Wa a kʼáat a beetaba u amigo Dioseʼ kʼaʼabéet a confiar tiʼ letiʼ.

•  Beet lelaʼ: Le baʼaxoʼob ku kanik máakoʼ ku yáantaj utiaʼal u yantal u fe (Romanos 10:17). Wa ka xokik le Bibliaoʼ yaan a wilik jeʼel u páajtal a confiar tiʼ Dioseʼ yéetel tiʼ le consejos ku tsʼáaikoʼ. U testigoʼob Jéeobaeʼ jeʼel u yáantkechoʼob a maas naʼat baʼax ku kaʼansik le Bibliaoʼ. d

 Beet baʼax uts tu tʼaan Dios

•  Le Bibliaoʼ ku yaʼalik: «Le máax u yaabiltmaj Dioseʼ ku beetik le baʼaxoʼob ku yaʼalik Diosoʼ» (1 Juan 5:3).

•  Baʼax u kʼáat u yaʼale: Wa ka weʼesik a yaabiltmaj Dios yéetel ka beetik baʼax ku yaʼalikeʼ, letiʼeʼ yaan u natsʼkuba ta wiknal.

•  Beet lelaʼ: Jeʼex u bin a xokik le Bibliaoʼ yaan a tsʼáaik cuentaeʼ yaan baʼaxoʼob maʼalob u yilik Dios ka beetaʼak, pero yaan baʼaloʼob xan u pʼekmaj. Tukle: «¿Baʼax kʼaʼabéet in beetik utiaʼal in kuxtal jeʼex uts tu tʼaan Dioseʼ?» (1 Tesalonicenses 4:1).

 Beet baʼax ku yaʼaliktech Dios utiaʼal u bintech utsil

•  Le Bibliaoʼ ku yaʼalik: «Túunteʼex utiaʼal ka a wileʼex bukaʼaj utsil Jéeoba» (Salmo 34:8).

•  Baʼax u kʼáat u yaʼale: Dioseʼ u kʼáat ka a tsʼáa cuenta bukaʼaj u yaabiltmech, beyoʼ yaan a maas biskaba tu yéetel.

•  Beet lelaʼ: Wa ka beetik le baʼax ka kanik teʼ Bibliaoʼ yaan u bintech maʼalobil (Isaías 48:17, 18). Maʼ xaaneʼ a kʼaj óol máaxoʼob tsʼoʼok u kʼexik u kuxtaloʼob ikil u xokikoʼob le Bibliaoʼ. Yaan tiʼ letiʼobeʼ yéetel u yáantaj Dioseʼ tsʼoʼok u kanik u yutskíint le problemas yaantiʼoboʼ, tsʼoʼok u maas maʼalobtal bix u kuxtaloʼob, jatsʼuts bix u biskubaʼob yéetel u familiaʼob. e

 Baʼax ku creertaʼal: Maʼ tu páajtal k-bisikba yéetel Dios tumen mix máak jeʼel u béeytal u yojéeltik jach bix letiʼeʼ.

 U jaajil: Yaan baʼaloʼob istikyaj u naʼatik máak yoʼolal Dios, jeʼex le u yaʼalaʼal de ke letiʼeʼ juntúul espíritu yaan teʼ kaʼanoʼ. Kex beyoʼ jeʼel u páajtal k-bisikba tu yéeteleʼ. Le Bibliaoʼ ku yaʼalikeʼ kʼaʼabéet k-kʼaj óoltik utiaʼal ka yanaktoʼon kuxtal minaʼan u xuul (Juan 17:3). Tsʼoʼoleʼ kéen k-xok le Bibliaoʼ séeb k-naʼatik le baʼaxoʼob ku yaʼaliktoʼon yoʼolal Diosoʼ. Ku yaʼaliktoʼon bix u modos, baʼax u tukultmaj u beetik yéetel bix u kʼáat ka kuxlakoʼon (Isaías 45:18, 19; 1 Timoteo 2:4). Ku yaʼalik xan toʼon bix u kʼaabaʼ (Salmo 83:18). Jeʼex tsʼoʼok k-ilik túunoʼ tuláakal máak jeʼel u páajtal u biskuba yéetel Dioseʼ (Santiago 4:8).