მათე 2:1––23
2 იესოქ დებად იუდეაშ ბეთლემს, მუჟამსით ჰეროდე* მეფენდჷ. მუსხირენ ხანიშ უკულ ასტროლოგეფქ აღმოსავლეთშე იერუსალიმშა გენორთეს.
2 თინეფქ იკითხეს: „სო რე იუდეველეფიშ მეფე, ნამდგაქ ამარდე დებად? აღმოსავლეთის თიშ მურიცხ ბძირით დო თაქ თიშ პატიშოცემშა მოფრთით“.
3 თენა ქიგეგუნ, ჰეროდექ სვანჯ მიოდინუ დო მთელ იერუსალიმქ შიშის ქინოლ.
4 თიქ აკოშაყარუ უნჩაშ მღვდელეფ დო მწიგნობარეფ დო გეგთოკითხჷ, სო ოკო დებადუკო ქრისტექ.
5 თინეფქ უპასუხეს: «იუდეაშ ბეთლემს, მუშენდა წინასწარმეტყველებას ჭარჷ:
6 „იუდაშ ბეთლემ, იუდაშ მთავრეფიშ თოლს ფას ოკო გერძუდას, მუშენდა სქანდე გიშელენს მართველ, ნამუთ დოჭყიშანს ჩქიმ ხალხის, ისრაელს“».
7 თიმწკუმა ჰეროდექ ტყობაშე ქიჭანუ ასტროლოგეფ დო გეგთოკითხჷ, მუჟამ მიკორჩქინდჷ მურიცხიქ.
8 მიდაშქვჷ თინეფ ბეთლემშა დო უწუ: „მეუთ, ჯგირო დოგორით თე ბაღანა დო ქოძირუნთინ, ქუგმოგებაფეთ, ნამდა მა ხოლო ქიმეფრთე, ბირგულ ქუდუშქვე დო პატი ქოფცე“.
9 მეფეშ ნარაგადიშ მორჩქილაფაშ უკულ თინეფქ ქიგიოდირთეს შარას. თე დროს კინ გემკორჩქინდჷ მურიცხიქ, ნამუთ აღმოსავლეთის ძირეს, დო წოხოლე ეწოჸუნდჷ თინეფს, სოიშახ თი ადგილშა ვემერთეს, სოდეთ ბაღანა რდჷ.
10 მურიცხიშ გაჩერებაქ ასტროლოგეფს მანგარო ახიოლეს.
11 ჸუდეშა გემნორთეს დო ბაღანა მუშ დიდა მარიამწკუმა ართო ქოძირესინ, პატიშოცემებელო ბირგულ ქუდუშქვეს თის. უკულ ძღვინო გეგნოჩეს ოქრო, გუნდრუკ დო მურ*.
12 თინეფქ მუნეფიშ ქიანაშა შხვა შარათ მიდართეს, მუშენდა სიზმარო ღორონთშე გაფრთხილება მიღეს, ნამდა ჰეროდეშა ვა დურთინუდესკო.
13 თინეფიშ ულაშ უკულ იოსების სიზმარო იეჰოვაშ ანგელოზიქ გეგმეცხად დო უწუ: „გედჷ, მიდეჸუნ ბაღანა დიდაწკუმა ართო დო ინტჷ ეგვიპტეშა. თექ ქორდა, სოიშახ მა ვაიწინქ, მუშენდა ჰეროდეს ბაღანაშ გორუა დო ჸვილუა ულამ“.
14 თაშ ნამდა, იოსებიქ სერით გედირთჷ, ხე ქიმეთხჷ ბაღანას დო თიშ დიდას დო მიდართჷ ეგვიპტეშა.
15 თექ ჰეროდეშ ღურაშახ ქუდოსქიდ. თეშნერო შისრულ თიქ, მუთ იეჰოვაქ მუშ წინასწარმეტყველს ორაგადაფუ: „ეგვიპტეშე ქუდუძახ ჩქიმ სქუას“.
16 ჰეროდექ მანგარო გერისხჷ, მუჟამსით ქიგეგ, ნამდა ასტროლოგეფქ დაღორეს. თიქ ხალხ მიდაშქვჷ დო ბეთლემს დო თიშ გოხოლუას ჟირწანაშახიან არძა ბოშ დაჸვილაფუ, მუშენდა ასტროლოგეფშა ჯგირო აფუდ გითოკითხირელ დო უჩქუდ, ნამდა ბაღანა სოდგარენ თე ხანიშ ოკო ჸოფედუკო.
17 თიმწკუმა შისრულ წინასწარმეტყველ იერემიაშ ნარაგადიქ:
18 „ნგარაშ დო თვალუაშ ხონარქ გისიმ რამას. რახელ გიოთვალანდჷ მუშ სქუალეფს დო მუთუნიშ მორჩქილაფა ვაკოდ, მუშენდა მეტო ვა ჸუნდჷ თინეფ“.
19 ჰეროდექ დოღურუნ, იეჰოვაშ ანგელოზიქ იოსების სიზმარო გეგმეცხად ეგვიპტეს
20 დო უწუ: „გედჷ, მიდეჸუნ ბაღანა დიდაწკუმა ართო დო დირთჷ ისრაელშა, მუშენდა ბაღანაშ ჸვილუა ოკოდესინ თინეფქ დოღურეს“.
21 თიქ ხოლო გედირთჷ, ხე ქიმეთხჷ ბაღანას დო თიშ დიდას დო დირთჷ ისრაელშა.
22 მარა, მუჟამსით ქიგეგ, ნამდა იუდეას ჰეროდეშ მანგიორო თიშ სქუა არქელაე მართუნდჷ, აშქურინ თექ ულაშა. თეს გეძინელ, ღორონთშე ხოლო მიღჷ გაფრთხილება სიზმარო; ათეშენ გალილეაშ მხარეშა მიდართჷ
23 დო ქალაქ ნაზარეთის ქიდიხორ. თეშნერო შისრულ წინასწარმეტყველეფიშ ნარაგადიქ: „თის ნაზარეთელ* ქიგიადვალუ“.
სქოლიოეფი
^ თენა რე ჰეროდე დიდ.
^ გუნდრუკ დო მურ რე ჯგირ შურ უღუნ ფერ მცენარეულ ფხვნილეფ.
^ შილებე მოურდას ებრაულ სიტყვაშე, ნამუთ ნიშნენს „ენაფალას“.
