1. Xeeni atthu a oSilo yaariipiwa aya murima ni wunla?

SAMUWELI aanoona wira oSilo atthu anceene aariipiwa murima. Vaakhala ntoko wira elapo ele atthu yaamakela wunla. Niireke ninnaasuwela axithiyana akavi ni anamwane, yanla mwaha woosuwela wira khiyaarowa-tho otthikela waaweha axipaapa aya, axiiyaya, anaaya, ni annaya? Etthu enisuwela ahu tiila: anakhotto a Isarayeli oophiyeryaka 30.000, yahiiviwa ni aFilisti, eyo yiiraneyale voohivira okathi munceene nuumala wookotthiwa anakhotto a Isarayeli oophiyeryaka 4.000.—1 Sam. 4:1, 2, 10.

2, 3. Ihasara xeeni sawiirihale atthu a oSilo okhala oowuuliwa muru ni omala-mala ovuwa wa Silo?

² Eyo yaari epantte emosa wa ihasara sinceene saakhumelenle. Hoofini ni Pineha, anamwane anli ootepa otakhala a Eli, Muulupale Aanamukuttho, yaahikhuma oSilo eteexale ene nivuku nowataana. Nivuku nlo naapwehiwa nipuro nowaaryexa niitthaniwa etabernaakulu, niire so, etemplo yaatekiwe ni etenda, yeeyo yaathoonyerya okhala wa Muluku. Masi atthu ale yaahikuxa Nivuku nle, khurowana okhottoni yuupuwelaka wira naarowa waakhaliherya ntoko murette wookhwiri, wira yaawerye anyokhani aya. Masi aFilisti yaahituphela nivuku nle, nto khumwiiva Hoofini ni Pineha.—1 Sam. 4:3-11.

³ Mwa iyaakha sinceene etabernaakulu oSilo, yaahikhalana eparakha ya osuka Nivuku nle. Masi vano naahikuxiwa ni aFilisti. Nuumala wiiwa ihapari iya, Eli yoowo aarina iyaakha 98, aahimora vakhukuluni vaakilaathale awe khukhwa. Mwaara a mwanawe Eli, aakhweliwe aiyawe, aahikhwa-tho nihiku nenle okathi waayara awe. Masi ahinatthi okhwa, owo aahimyale so: “Ovuwa ohanyanyala atthu a Isarayeli”. Tthiri masu ale yooniherya wira Silo khaarowa-tho otthikela ntoko saarya awe wuupaceryani.—1 Sam. 4:12-22.

4. Exeeni enrowa ahu othokorerya muru ola?

⁴ Samuweli awenrye sai ovilela mixankiho sotheene sookhulumula? Niireke waamini wawe wammwiiriha olipa mpakha waakhaliherya atthu ale yaahononale wataana waya ni Yehova? Olelo-va, hiyo pooti okumanana mixankiho ni itthu sikhanle ookhulumula waamini wahu. Tivonto vanitthuneya ahu wiixutta etthu wa ntakiheryo nooloka na Samuweli.

5, 6. Biibiliya onihimya exeeni sa Samuweli okathi wa iyaakha 20, nto Samuweli aapaka exeeni okathi owo?

⁵ Vano, Biibiliya onnihiya olavula sa Samuweli, khuyalavula itthu siiraneya ni nivuku noowaarya, ohimyaka sa moota aFilisti yahaawale aya mwaha wookuxa, nto khuttikiha mwaha wa woova. Okathi onitthikela ahu osoma voohimya sa Samuweli, siira sivinre ene iyaakha 20. (1 Sam. 7:2) Samuweli aavara exeeni okathi owo? Nrowe niwehe ele Biibiliya enihimya awe.

⁶ Ohinatthi opacerya okathi ole, Biibiliya onihimya so: “Vano Samuweli analalérya molumo Ápwiya atthu othene a Isarayeli”. (1 Sam. 3:21) Biibiliya onnihimya-tho wira nuumala wiiraneya itthu iye, Samuweli aahitthikela oxekurya ipooma tthaaru sa wIsarayeli khula mwaakha, othokoreryaka ni ophuka milattu saakhumelela. Nuumala-vo aanitthikela elapo awe oRama. (1 Sam. 7:15-17) Tthiri Samuweli khaareere waatteliwa miteko, nto okathi ole wa iyaakha 20 owo aahivara miteko sinceene.

7, 8. (a) Nuumala iyaakha 20 sowaatteliwa miteko, ihapari xeeni Samuweli aahimyale awe wa aIsarayeli? (b) Nto atthu yoonenle sai moolumo oolipiha a Samuweli?

⁷ Oraruwa ni wiikuxererya wa aana a Eli waahikhulumula waamini wa aIsarayeli. Nto woonasa wene eyo yaahiwiiriha atthu anceene waakokhorela amuluku eethiru. Nuuvira iyaakha 20 aatteliwe ene miteko, Samuweli aahaaleela aIsarayeli wira: “Mwatthuná otthikela w’Apwiya ni murim’anyu wothene, murihele otá ilatarato s’amuluku àmalapo ni s’Astarte, mwarukunuxele murima Apwiya ni murim’anyu wothene, yawo pahi mwarumeleke mwira siso, Apwiya yawo anowakihani mmatatani mw’aFilisti”.—1 Sam. 7:3.

⁸ ‘Matata a aFilisti’, yanaawereiha muru aIsarayeli. Anakhotto a Isarayeli yiira aweriwe ene vootepexa, nto aFilisti yoona wira yaarowa waahasulaka atthu a Muluku vohoova etthu. Masi Samuweli aahaalipiha aIsarayeli wira ohoolo itthu saarowa orukunuwa, akhala wira yaamutthikela omwaamini Yehova. Niireke yaheemya? Tthiri Samuweli aahihakalala woona wira yahaahiya amuluku eethiru anapacerya ‘omurumeela Yehova’. Vanonto Samuweli aahipaka muthukumano muulupale oMisipa, muttetthe wowaatta myaako mpantta onikela nsuwa wa oYerusalemu. Nto atthu yaahirwa, ahilyaale etthu, yooniheryaka ottharuwa waya itampi saapakale aya yaakokhorelaka amuluku eethiru.—Mmusome 1 Samuweli 7:4-6.

9. Etthu xeeni aFilisti yoona aya oreerela opaka, nto atthu a Muluku yaapakale exeeni?

 ⁹ Masi, aFilisti yaahisuwela wira aIsarayeli aathukumana nto anaphavela ottottela mureerelo wowaatuphela. Awosa yahaaroiha anakhotto aya oMisipa wira yaapwetexe atthu ale a Yehova. Masi aIsarayeli yaahiiwa ihapari iyo sowoopiha. Nto ariki woova vanceene, yaahinvekela Samuweli wira aalompele. Owo aahivekela, khuvaha mukuttho. Okathi waavahiwa mukuttho, aFilisti yaahituphela muttetthe wa oMisipa. Yehova aahaakhula nivekelo na Samuweli. Owo aahooniherya oviruwa wawe ni aFilisti. Nto Yehova aahikumiherya ‘okukutteya wa etari yaaruma yaavirikanyaka aFilisti’.—1 Sam. 7:7-10.

10, 11. (a) Xeeni etari yaakumihenrye Yehova yaarya aya yoovirikana ni ele yaalimaleliwe ni aFilisti? (b) Ekhotto yaapacenrye oMisipa yaamanle sai?

¹⁰ Niireke anakhotto aFilisti yaari ntoko anamwane anitthimakela wa maama aya okathi oniiwa aya etari erumaka? Nnaari, awosa yaari anakhotto ootupa, yaalimalenle ekhotto. Masi hata vari siiso, oruma wa etari ele waahivirikana ni itthu saamakela aya wiiwa. Niireke waari mwaha wa otepexa waya oruma etari? Niireke erimu yaari yookokola, wala yoova oruma wa namalwe mwaha wa myaako? Hata nihisuwelaka etthu ene yaawoopiha, enisuwela ahu tiila: aFilisti yahoova vanceene. Nto mwaha wa woova ekhotto yahaarukunuwela, khupacerya otthyawa. Anakhotto a Isarayeli yahaakuveya arowaka oMisipa khwapwetexa awanani aya, khuwoomola ikiloomo sinceene mpakha epantte enikela nsuwa ya oYerusalemu.—1 Sam. 7:11.

¹¹ Tthiri ekhotto ele yaahituruka itthu wIsarayeli. Okhuma vaavale mpakha mahiku otheene Samuweli aari awe namaphuka, aFilisti khiyaatthikenle waatuphela aIsarayeli. Nto muttetthe ti muttetthe waahitthikela okhala awaya aIsarayeli.—1 Sam. 7:13, 14.

12. Samuweli eettenle sai “exariya”, nto etthu xeeni yaamukhalihenrye?

¹² Nuuvira iseekulu sinceene, murummwa Paulo aahimuhimya Samuweli okhala mmosa wa anamaphuka, maprofeta “yettela exariya”. (aHéb. 11:32, 33) Tthiri Samuweli aahaakhaliherya aIsarayeli opaka ele yaari yooloka vamaithoni va Muluku. Owo aahikhumela saana mwaha woowerya omulipelela Yehova, ni ovikaniha okhala oowaatteliwa miteko nnaamwi aakhulumuliwa. Aahikhalana-tho munepa wooxukhurela. Nuumala waawerya aFilisti oMisipa, Samuweli aheemexa nluku nuulupale wira niwuupuxeryeke aIsarayeli moota Yehova aakhalihenrye awe.—1 Sam. 7:12.

13. (a) Wira nimutakihe Samuweli, nihaana okhalana mikhalelo xeeni? (b) Okathi xeeni onoona anyu oreerela wiixutta mikhalelo iyo?

 ¹³ Niireke nyuwo munniphavela ‘wettela exariya’? Akhala wira munniphavela, muhaana otthara ntakiheryo na Samuweli, voohimya sa owerya wawe ovilela, wiiyeviha ni nthiti naarina awe. (Mmusome 1 Pedru 5:6.) Tthiri otheene sahu nihaana wiimananiha okhalana mikhalelo saarina Samuweli! Onari mmiravo waari vookhweya Samuweli wiixutta okhala oovilela, oowiiyeviha ni a nthiti, maana okathi annuwale awe aahikumana mixankiho samukhulumula.

14, 15. (a) Muxankiho xeeni muulupale wamphwannye Samuweli nuumala wuuluvala? (b) Niireke Samuweli aahikhalana nthowa ntoko Eli? Mutthokiherye.

¹⁴ Okathi onitthikeliwa aya olavuliwa sa Samuweli, owo iira “uluvanlene”. Vano aahikhalana anamwane anli oowunnuwela, Yoweli ni Abiya, yaawo aavanhe awe eparakha ya omukhaliherya miteko sa waaphukela atthu. Masi voriipiha murima awosa khiyaaphwanela muteko ole. Hata Samuweli aari oororomeleya ni a xariya, anaawe yaarumeela okhulupale aya wira aphwanye mureerelo aya, nto yaanihonona exariya ni weemya makhwankwa.—1 Sam. 8:1-3.

¹⁵ Nihiku nimosa, axitokweene a Isarayeli yaahirowa wiixinliha ohoolo wa profeta ole oowunnuwela, yiiraka: “Vano an’inyu khantthara  makhalelo anyu”. (1 Sam. 8:4, 5) Niireke Samuweli aanisuwela ele yiiraneya? Biibiliya khonihimya. Masi voovirikana ni Eli, Samuweli ntoko tiithi khaarina nthowa. Yehova aahimpwapwela ni omuhukhumu Eli, mwaha wa ohaapwapwela saana anaawe ale ootakhala, ni mwaha wowaattittimiha anaawe ohiya omuttittimiha Muluku. (1 Sam. 2:27-29) Yehova khoonale etthu wa Samuweli.

16. Mixankiho xeeni sinaaphwanya anamuyari arina anamwane ahiniiwelela, nto ntakiheryo na Samuweli ninrowa waamaaliha sai?

¹⁶ Biibiliya khonihimya wuuliwa muru, wuukhuwa, okhulumuwa wuulupale wa Samuweli nuumala osuwela wira anaawe yaarina mweettelo woohiloka. Woonasa wene, anamuyari anceene annoona owereya waarina awe Samuweli. Mahiku ala ootakhala, annitepa waatta anamwane ahiniiwelela. (Mmusome 2 Timótheyo 3:1-5.) Ntakiheryo nna nnimwaakhaliherya anamuyari aniwanana mixankiho ntoko iye saarina Samuweli. Owo kheemyale wira mweettelo woohiloka wa anaawe omuhapuxe. Muhiliyale wira hata anamwane ahiphavelaka olakiwa wala wiiwelela miruku sinivahiwa aya, akhala wira anamuyari anneettela miruku iyo, anoovaha ntakiheryo nuulupale wa anaaya. Nave anamuyari aakhalana eparakha ya onvuwiha tiithi aya Yehova Muluku , ntoko siirale awe Samuweli.

17. Axitokweene yaavenke exeeni wa Samuweli, nto Samuweli oonenle sai?

¹⁷ Anamwane a Samuweli khayuupuwela mixankiho saarowa aya ophwanya mwaha woohiiwelela waya. Axitokweene a Isarayeli yaahimuleela Samuweli wira: “Tivó, munivahe mwené ahu wira anettiheryeke, ntoko sirinaya maloko makina”. Niireke eyo yaahimwiiriha Samuweli wuupuwela wira atthu ale khiyamphavela-tho? Ekeekhai wira Samuweli aanirumeela ntoko mulipa oophuka a Isarayeli mwa iyaakha sinceene. Vano aIsarayeli yamphavela mwene wira aaphukeleke, ohiya profeta paahi ntoko Samuweli. Amalapo yaattamanne aya yaahikhalana mamwene aya, tivonto aIsarayeli yamphavela aya mwene aya! Vano Samuweli oonenle sai? Ninsoma so: “Samuweli khasiveliwe ni molumo àtthu awe”.—1 Sam. 8:5, 6.

18. Yehova ammaalihale sai Samuweli, nave oonihenrye sai wira aIsarayeli yaahittheka vaalupale?

¹⁸ Nwehe moota Yehova aakhunle awe okathi Samuweli aavekenle awe olakiheriwa mmwaha ole; Yehova aahimyale so: “Nwiweleleke atthu, nwirele sothene simphavelaya. Tthiri awo khanokhottani nyuwo, ankikhotta miyo. Khantthuna-tho wira miyo kikhalé mwené”. Tthiri masu ale yahiriiriha murima wa Samuweli, maana oveka wa aIsarayeli waari oveeha wuulupale wa Muluku Oowerya Sotheene! Vano Yehova aahimuleela profeta awe orowa waaleela aIsarayeli wira ohaawa wamwaaphwanya mwaha woophavela olamuleliwa ni apinaatamu. Okathi  aaronwe awe Samuweli waaleela aIsarayeli ale, awo yaahithipelela etthu emosaru yiiraka: “Nnari! Hiyo nnimphavela mwené ahu pahi”. Okhala wira Samuweli aari mutthu oowiiwelela, aahirowa onvaha emwene mutthu yoowo Yehova aamuthanlale awe.—1 Sam. 8:7-19.

19, 20. (a) Samuweli aiwelenle sai yooruma ya Yehova wira omuhele emwene Sawuli ntoko mwene a Isarayeli? (b) Moota xeeni Samuweli aavikaninhe awe waakhaliherya atthu a Yehova?

¹⁹ Niireke wiiwelela wa Samuweli waari wowiikhupanyerya? Wala woowiixinliha? Niireeke okhulumuliwa waahipahula murima awe nto khuyapaka itthu voonanariwa? Woonasa wene anamunceene yaarowa okhala siiso, masi Samuweli khaarina muupuwelo owo. Owo aahinvaha emwene Sawuli osuwelaka wira Yehova taamuthanlale. Aahinvaha ebeijo, yeeyo yaathoonyerya omwaakhela saana ni omuttittimiha mwene ole musya. Owo aahaahimeerya atthu wira: “Tthiri ula òthanliwa n’Apwiya khavo onlikanawe eriyari y’atthu othene”.—1 Sam. 10:1, 24.

²⁰ Etthu yaaweha awe Samuweli saari mikhalelo sooloka sa mwene ole aathanliwe ni Yehova. Nave Samuweli aaweha omurumeela wawe Muluku vohimutthekela, ohiya owehexexa soovonya sa aIsarayeli. (1 Sam. 12:1-4) Nave aahivara saana miteko saavahiwa awe, aalopolaka atthu a Muluku mwaha wa ohicalela waya itthu soomunepani, ni waalipiha wira avikaniheke omuroromela Yehova. Miruku sawe saanivara murima wa aIsarayeli, tivonto yanvekenle aya Samuweli wira aalompele. Vano Samuweli aahiwaakhula ni masu ala ootepexa oreera ariki: ‘Miyo nkinihiya wolompelani w’Apwiya, n’owixuttihani iphiro saya sorera ni soloka; kahiyá vale, kamwira etthu yotepa onanara vamaithoni v’Apwiya’.—1 Sam. 12:21-24.

21. Ntakiheryo na Samuweli nnookhaliheryani sai akhala wira munnixankiheya mwaha woovahiwa mutthu mukina ekhulupale wala eparakha?

²¹ Niireke mootoko oxankiheya mwaha woovahiwa mutthu mukina ekhulupale wala eparakha? Ntakiheryo na Samuweli nnoonikhaliherya wuupuwelela ohikhala mutthu a nrima wala oviruwa athanliwa mutthu mukina. (Musome Miruku 14:30.) Muluku khoreerane miteko soohakalaliha okhanle awe onvaha khula mmosa oniroromeleya.

22. Xeeni Samuweli iirale awe saana ophavela oweha itthu sooloka sa Sawuli?

²² Samuweli aahiira saana oweha itthu sooloka paahi sa Sawuli, maana owo aari oovirikana ni akina. Sawuli aari mulopwana oorakama ni ooreera, oolipa murima, aawerya ovara muteko, wuupaceryani ooreera murima ni oomaaleleya. (1 Sam. 10:22, 23, 27) Ohiya-vo, owo  aahikhalana-tho etthu ekina yooreera, eyo piiyo, othanla wootaphuwa, niire so, owerya wawe opaka soothanla sa ekumi awe. (Otum. 30:19) Niireke aahirumeela saana soovaha iyo?

23. Mukhalelo xeeni wooreera waapacenrye ompweteya Sawuli, nave oonihenrye sai otepa wawe wiixinnuwiha?

²³ Vooriipiha murima, okathi mutthu oniixoona awe okhala oowerya, wiiyeviha ti etthu enipacerya omuthowa. Voohipisa Sawuli aahikhala oowiixinnuuha. Khuthanla ohiiwelela sooruma sa Yehova saahimmwale ni Samuweli. Ohaavo okathi Sawuli oonale awe wira khaatthuneya omwaalitta mutthu mukina, nto khupaha mukuttho waakhanle oopahiwa ni Samuweli. Vano Samuweli aahaana ompwapwela vaalupale ni omuleela wira emusi awe khiyaarowa ohalana omwene awe. Hata aapwapweliwe vaalupale Sawuli khaattharunwe, nto aahipaka soottheka sikina sootepexa.—1 Sam. 13:8, 9, 13, 14.

24. (a) Sawuli oonihenrye sai ohimwiiwelela Yehova okathi aaronwe awe owana ni Amaleki? (b) Niireke Sawuli aaheemya opwapweliwa, vano Yehova aathanlale opaka exeeni?

²⁴ Yehova aahimuleela Sawuli wira awane ekhotto ni Amaleki. Yooruma ya Yehova yaahela mpuwa omwiiva Agagi, mwene ootakhala a wAmaleki. Masi Sawuli khampwetexale Agagi ni itthu sikina sooreera sa Amaleki saatthuneya onyaanyiwa. Okathi Samuweli aaronwe awe omulopola, Sawuli aahooniherya wira murima awe waahihononeya. Ohiya okhala oowiiyeviha ni weemya miruku, Sawuli aamananiha otthokiherya, woothererya, ohiphavela weemya ottheka wawe, ni waavaha nthowa atthu akina. Okathi Sawuli eererya awe okhootta okhaliheriwa ohimyaka wira muhakhu aakunxe awe aaphavela wira ovahe ntoko mikuttho wa Yehova, Samuweli aahilavula masu oohiliyaleya oriki: “Nnari! owiwelela Apwiya ti worera ovikana mukuttho”. Moolipa murima, Samuweli aahimpwapwela Sawuli ni aahimuleela etthu Yehova aalakenle awe ompakela oriki: Omwene awe aarowa waakhiwa wira ovahiwe mutthu mukina ooloka onvikana Sawuli. *—1 Sam. 15:1-33.

25, 26. (a) Exeeni yaamwiiriha Samuweli omunlela Sawuli, vano Yehova ampwapwenle sai? (b) Etthu xeeni yaaxuttale awe Samuweli vapuwani va Yese?

²⁵ Tthiri Samuweli aahinanariwa vanceene mwaha wa itthu saapakiwe ni Sawuli. Owo aahiviriha ohiyu wotheene oxonttelaka wira Yehova omukhaliherye. Nave Samuweli aahinla mwaha wa Sawuli. Samuweli oona wira Sawuli anwerya olamulela saana, ni aanoona itthu sooloka, masi vano sotheene  iyo saahimala-mala. Tthiri Sawuli vano aari mutthu mukina, ohiya mulopwana yoole aamusuwela awe, maana aahimurukunuwela Yehova. Tivonto Samuweli aahikhootta woonana-tho ni Sawuli. Masi nuuvira okathi, Yehova aahimpwapwela vakhaani Samuweli iiraka: “Mpakha lini mmunlelaka Sawuli? Miyo komukhotta wira ahikhale-tho mwené a Isarayeli. Vano musarye makhura munnyakani mwanyu, nvenyé. Murowé wa Yesé, oBethelehemu, komuthanla mwan’awe mmosá wira kimukhalihe mwené”.—1 Sam. 15:34, 35; 16:1.

²⁶ Yoolakela ya Yehova, khenlipa ni ikuru sa apinaatamu oohimalela, yaawo ahiniroromeleya ikwaha sinceene. Akhala wira mutthu onnooniherya ohiroromeleya, Yehova onnimuthanla mukina wira aakhwaniherye yoolakela awe. Nto mwaha wa yeeyo, Samuweli aahihiya omunlela Sawuli. Olakiheriwaka ni Yehova, aahirowa vapuwani va Yese, oBethelehemu, weiwo aasuwenle awe anamwane oovirikana a Yese, yaari ooreera. Masi okathi amphwannye awe mwaana oopacerya a Yese, Yehova aahimuleela Samuweli wira ohiweheke oreera owiitho wa anamwane ale. (Mmusome 1 Samuweli 16:7.) Wanikisa waya Samuweli aahimoona Davidi, mwaana ookiserya a emusi ele yoowo aathanliwe ni Yehova!

27. (a) Etthu xeeni yaamwiirinhe Samuweli ovikaniha okhala oolipa? (b) Munoonela sai ntakiheryo nooloka na Samuweli?

²⁷ Mahiku awe ookiserya a Samuweli, aahoona wira Yehova omuthanla wawe Davidi wira okhale mwene, waari wookhalela. Ohiiwelela wa Sawuli wahimwiiriha ophavela omwiiva Davidi mwaha wa ehace, ni okhala nammwareya. Masi, Davidi, aahooniherya mikhalelo sooloka ntoko: olipa murima, ohiphavela ottheka, waamini, ni ororomeleya. Samuweli aahilipiha waamini wawe mpakha wanikisa wa ekumi awe. Owo aahoona wira khuuvo muxankiho muulupale Yehova ohiniwerya awe olokiherya, omala-maliha, hata orukunuxa khukhala mareeliho. Nuumala-vo, Samuweli aahikhwa, khuhiya itthu sinceene sooreera saapakale awe, oryeene mukumi mwa iyaakha saattamela 100. Tthiri aIsarayeli ootheene yaahiriipiwa murima mwaha wa okhwa mulopwana ole oororomeleya. Nto olelo-va, hiyo nimmurumeela Yehova niikoheke so: ‘Kinoowerya otakiha waamini wa Samuweli?’