1. Oxanka xeeni waarina Martha, nto mwaha wa xeeni?

KHULA okathi Martha aanuupuwelela mahiye yaavithiwe munnawe, nikhuku naawaliwe ni nluku. Nto Martha aahiriipiwa murima vanceene. Vaanivila okupali wira Laazaro, aahikhwa tthiri. Mahiku ale maxexe munnawe okhwiiye ene, yaari ooxankiha wa Martha; nto atthu yaanirwa omuxukurya, wunla ni ommaliha.

2, 3. (a) Martha aari sai nuumala onweha Yesu? (b) Anooniherya exeeni masu aalavunle awe Martha?

² Masi vano, Martha onnaattameliwa ni mulopwana mmosa aari mpatthani a Laazaro. Okathi Martha anwehale awe Yesu, pooti wira oriipiwa wawe murima waanitepa, mwaha woowi Yesu paahi taakhanle oomoopola munnawe. Hata vari siiso, Martha ahimaaliheya mwaha wookhala opuro ole ni Yesu, ota wa epooma yaamukhaani ya oBethania. Mwa okathi vakhaani oryeene ni Yesu, Martha aahisiveliwa wooneliwa wawe othunku ni moota aalipihiwa awe. Yesu aahimpaka makoho Martha yaamukhalihenrye wunnuuherya waamini wawe, ni okupaleela wawe ohihimuxiwa. Ovaanela waya, waahimwiiriha olavula masu ootepexa ovara murima ni oohiliyaleya, oriki: “Miyo kinnamini wira nyuwo Kristú, Mwana a Muluku, yowo atthuna orwa molumwenkuni-mu”.—Yoh. 11:27.

³ Masu ale yaalavunle awe Martha, aahooniherya wira tthiri aari muthiyana oowaamini. Vaavo Biibiliya vanilavula awe sa Martha onniniixuttiha etthu yootthuneya enrowa olipiha waamini wahu. Moota xeeni? Ninrowa othokorerya nipuro opaceriwa awe olavuliwa Martha mBiibiliyani.

4. Moota xeeni emusi ya Martha yaarya aya ya vameekhaaya, nave opatthani xeeni waarina aya ni Yesu?

⁴ Myeeri vakhaani vahinatthi, Laazaro aari mukumi owannyawe oBethania. Awo yaalipelela omwaakhela muletto ootthuneya ni yamphentexa aya, Yesu Kristu. Laazaro, Martha, ni Maria yaari emusi ya vameekhaaya, eyo piiyo, yaari anna oowunnuwela woonasa wene yaakhala etthoko emosa. Anamatokosa akina anihimya wira woonasa wene, Martha taari muulupale waavikana annawe ale, okhala wira owo taalokiherya opuro wira owaakhele aletto, nave ikwaha sikina Martha tonipaceriwa olavuliwa ohiya annawe. (Yoh. 11:5) Khivaniweryaneya osuwela akhala wira mmosa wa atthu awo aahikhalana etthoko. Voohicikha sa makhalelo aya, awo yaari apatthani oororomeleya  a Yesu. Okathi aalaleerya awe oYudeya, elapo yahaareere awe onyokhiwa ni olupatthiwa, Yesu aamakela omaka vapuwani wa atthu ale. Tthiri, Yesu aaniphavela okhala opuro woomaaleleya, ni oona awe wira aamukhaliheriwa.

5, 6. (a) Exeeni yamwiiriha Martha waatteliwa miteko nuumala ophiya Yesu? (b) Maria oonela sai eparakha ya oxukuriwa ni Yesu?

⁵ Martha aanipaka itthu saawerya awe ophavelaka owaakhela saana aletto. Owo aari muthiyana aasiveliwa ovara miteko, ni vanikhala ntoko wira khula okathi aanaatteliwa miteko. Nto okathi ola waaxukhuriwa aya ni Yesu khiwaavirikanne ni ikwaha sikina. Voohipisa, Martha aahuupuwela waapeya yoolya ya vameekhaaya, wira onvahe Yesu ni ale yaarina awe. Okathi ole, owaakhela aletto yaari etthu ya faita. Okathi muletto aaphiya awe, aanibexariwa, aaniruliwa ixapattho sawe onarapihiwa inawu, nave muru awe aanoottihiwa makhura oowunkhela saana. (Mmusome Luka 7:44-47.) Voohimya sa opuro woorupa ni etthu yoolya, saari itthu saalokiheriwa saana.

⁶ Martha ni Maria yaahikhalana miteko sinceene soovara. Maria, yoowo onihimmwa okhala muthiyana oowaakuva wuupuwela saana, woonasa wene aahimukhaliherya Martha, Yesu ohinatthi ophiya. Masi nuumala ophiya Yesu itthu saahiturukeya. Yesu aahoona wira okathi ole waari wooreerela owiixuttiha, nto ti etthu yaapakale awe. Voovirikana ni alipa-oowiixuttiha itiini mahiku ale, Yesu aanaavaha efaita athiyana, tivonto aawiixuttiha awe sa Omwene wa Muluku, maana ti mwaha waatepa awe ottittimiherya mmuteko awe woolaleerya. Maria aahoona okhala eparakha yuulupale wiixuttihiwa, nto aahikilaathi vaari Yesu, awiriyanaka saana khula nuulumo Yesu aalavula awe.

7, 8. Exeeni yaamwiiriha Martha onyoonyiwa, nto etthu xeeni yaahimyale awe?

⁷ Vano nkayaha muupuwele moota Martha soonela awe miteko iye sotheene. Owo aahaana weteteela etthu ti etthu wira okumiherye yoolya wa aletto ale, nto eyo yaanimwiiriha otepa oxankiheya ni okhummwa murima mwaha wowaatteliwa miteko. Nto okathi aakhuma awe epantte emosa orowaka epantte ekina, khumoona Maria akilaathale ene voohipaka etthu wira amukhaliherye, niireke Martha aahinanariwa, woonasa wene ohihimeryaka, anwehaka voohisiveliwa? Khanikhanle ootikhina wira Martha vaanimunyoonya. Okhala wira khaarowa owerya ekhawe ovara miteko iye sotheene!

⁸ Vano Martha khaawerya-tho ohiya vamurimani onyoonyiwa wawe. Nto aahituphela mwaha waalavuliwa ni Yesu, ohimyaka so: “Pwiya, khamunona wira munn’aka onikihiya mekhaka, keteteyaka ni miteko iya? Mmulèle wira akikhaliherye”. (Luka 10:40) Tthiri masu ala yaanooneya wira aari oonyoonyiwa. Moolumo ala, wa aBiibiliya  anceene ataphuleliwe so: “Pwiya, xeeni ohikicalelaka. . . ?” Vano, aahinvekela Yesu wira omulopole Maria ni omuruma omukhaliherya Martha.

9, 10. (a) Yesu aamwaakhunle sai Martha? (b) Ninsuwela sai wira khahiyo Yesu ooniherya ohisiveliwa ni miteko sa Martha?

⁹ WoonasaweneMartha aahitikinihiwa mootaYesuaakhunle awe, hata aleanimusoma Biibiliya annitikinihiwa-tho.Vooreerela murima,Yesu aakhunle so:“Martha! Martha!Nyuwo munnikhummwa murima, munnivelavela n’itthu sinjene.Vanoetthu emosá pahi t’imphavelexiwa. Maria òthanla mpantte worerexa, ohinrowawe-tho wakhiwa”. (Luka 10:41, 42) Yesu aaphavela ohimya exeeni? Niireke aamulopola Martha wira aahitepa ophenta itthu sa werutthuni?Niirekeaaphavelaohimyawira weeteteela wawe yoolya khiwaarina efaita?

¹⁰ Nnaari. Yesu aahisuwela wira etthu Martha aapaka awe yooniherya niphento nuulupale. Ohiya-vo, Yesu khonahimye wira owaakhela saana aletto etthu yoohiloka. Maana vootthuna vawe owo aahirowa efesta yuulupale, yaalattuliwe awe ni Matheyo. (Luka 5:29) Khahiyo wira waari mwaha wa yoolya, masi yaari etthu Martha yoona awe okhala yooreerela opaceriha ovara. Martha aaluttuweliwa paahi ni yoolya yoopakiwa saana, ohiya othokoreryaka etthu yuulupalexa. Etthu xeeni?

11, 12. Yesu aamukhalihenrye sai Martha?

¹¹ Yesu Mwaana oopacerya opattuxiwa ni Yehova Muluku, aarowale vapuwani va Martha wira iixuttihe ekeekhai. Khiivo etthu ya efaita ohela mpuwa yoolya yootepexa osiva, enivikana wiixutta ekeekhai. Tivonto Yesu aaxankale awe mwaha woomoona Martha opweteiwaka okathi ole wooreerela olipiha waamini wawe mwaha wooluttuweliwa paahi ni olokiherya eyoolya. * Nto onvekela Yesu wira amukhanyererye Maria opweteiwa okathi ole, yaari etthu yoohikhalela wa Yesu.

¹² Tivonto mwa niphento, Yesu aahimukhaliherya Martha, oromolaka nsina nawe voophenta wira ohitepe onyoonyiwa, nto khumuleela wira ‘ahivelavele n’itthu sinjene’. Olokiherya yoolya vakhaani, wamphiyerya okhala wira ole waari okathi wooreerela wiixutta itthu sa omunepani. Vano Yesu khaarowa  ompwapwela Maria mwaha woothanla “mpantte worerexa”, eyo piiyo, owiriyana wiixuttiha wa Yesu.

13. Exeeni eniixutta ahu sa moota Yesu aamukhalihenrye awe Martha?

¹³ Mwaha ola wiiraneyale vapuwani va Martha, onniwiixuttiha etthu yuulupale atthareli a Kristu olelo-va. Ehikhale etthu ennikhoottiherya oluttuweliwa ni itthu sa omunepani. (Math. 5:3) Ti vooreera otakiha oreera murima wa Martha masi ‘nihikhummweke murima, ni ovelavela’, akhala wira ninwaakhela aletto, nto khuyahiya othokorerya itthu sootthuneyexa. Okathi onithukumana ahu ni annihu eeKristau, yoolakela ahu yuulupale ohikhaleke ovaha wala ovahiwa yoolya yooreerexa, masi okhaleke othokorerya myaha sa omunepani, ni olipihana. (Mmusome aRoma 1:11, 12.) Nto ohakalala iwo onookhala woolipiha, hata yoolya eryeene vakhaani.

14. Xeeni vanikupali ahu wira Martha oonivaha ntakiheryo nooloka na weemya olakiheriwa?

¹⁴ Niireke Martha aaheemya nto khoxutta etthu wa miruku saavahiwe awe ni Yesu? Aayo. Murummwa Yohani, olavulaka sa Laazaro murokora awe Martha, onihimya so: “Yesu anaphenta atthu awo òraru: Martha ni Maria, munn’awe, ni Lázaro”. (Yoh. 11:5) Saahivira myeeri sinceene nuumala Yesu oxukurya epooma ele ya oBethania. Martha khaananariwe ni Yesu mwaha woolakiheriwa. Owo aahiiwelela. Nave-tho, Martha oonivaha ntakiheryo nooloka na waamini, maana ootheene ahu ikwaha sikina nihaana olakiheriwa.

15, 16. (a) Woonasa wene Martha aapakale exeeni nuumala onweha munnawe owereiwaka? (b) Exeeni yaamalamalinhe nlipelelo na Martha ni Maria?

¹⁵ Okathi munnawe Martha aawereiwa awe, voohaaniherya Martha aahimukhapelela saana. Aahivara etthu yaawerya awe wira avukule oretta wanwereya ni wira openuwe. Masi hata yaamananihale, Laazaro aamutepa owereiwa. Okathi waanivira, nto arokorawe Laazaro yaahimuthukumanela wira amukhapelele. Okathi Martha anweha awe Laazaro oriipiwe ene murima, woonasa wene, Martha aanuupuwelela okathi woohakalaliha aahiiso wooriipiha murima waavirihale aya hoothe!

¹⁶ Okathi Martha ni Maria yanweha aya murokora aya otepaka ni ahoonaka yoowiira, yaahiruma wiitthaniwa Yesu. Okhuma opuro Yesu aalaleerya awe orowa oBethania, weettiwa mahiku manli. Awo yaarumihale so: “Pwiya! Mpatthan’inyu onowereiwa”. (Yoh. 11:1, 3) Athiyana ale, yaanisuwela wira Yesu aanimphenta Laazaro, ni yaanikupali wira ampaka etthu wira omukhaliherye mpatthani awe. Niireke yoona wira Yesu amphiya ehinatthi wiiraneya etthu yootakhala? Akhala wira ti siiso, olipelela waya waahimala. Maana Laazaro, aahikhwa.

17. Exeeni yaamutikiniha Martha, ni aapankeni nuumala wiiwa wira Yesu aanirwa?

¹⁷ Martha ni Maria yaaninla vanceene mwaha wa munnaya aakhwiiye, ni yaahikhapelela murutthu awe wira ovithiwe, akhaliheriwaka ni atthu anceene a muttetthe ole wa oBethania. Nlelo Yesu khaakhulale etthu. Pooti wira Martha aanitikinihiwa ni etthu yaamwiiriha Yesu opisa ophiya. Masi nuuvira mahiku maxexe Laazaro okhwiiyeene, Martha aahiiwa wira Yesu aanirwa. Hata waari okathi wooxanka, Martha yoowo aasuweliwe okhala a nthiti, aahikhuma otthimakaka orowaka okumana ni Yesu, ohimuleelale Maria.—Mmusome Yohani 11:18-20.

18, 19. Exeeni Martha aakupali awe, nto xeeni waamini wawe waari aya woolipa?

 ¹⁸ Okathi Martha anwenhe awe Yesu, aahilavula etthu yuupuwela awe owo ni Maria, aahimyale so: “Pwiya! Nyuwo mwàri vava, murokor’aka khakhwá”. Masu ala, khanooniherya wira Martha khaarina-tho nlipelelo. Maana aahihimya-tho wira: “Vano-nto kosuwela wira Muluku onimovahani sothene sintthunanyu onvekela”. Voohipisa, Yesu aahilavula, wira olipihe waamini wawe, oriki: “Murokor’inyu onohihimuwa mokhwani”.—Yoh. 11:21-23.

¹⁹ Martha oona wira Yesu aalavula sa ohihimuxiwa wa ohoolo, okhala wira aalavunle so: “Miyo kosuwela wira onohihimuwa nihiku nokiserya”. (Yoh. 11:24) Owo aanaamini ohihimuxiwa wa alipa-ookhwa. Nnaamwi ohihimuxiwa waalavuliwa ni Nuulumo na Muluku, makhulupale a etiini ya aYuda, yaasuweliwa okhala aSaduki, yaahimya wira ohihimuwa wa alipa-ookhwa waari ethiru. (Dan. 12:13; Mar. 12:18) Masi Martha aanaamini wiixuttiha wa Yesu wa  olipelela ohihimuwa wa alipa-ookhwa, nave Yesu aahaahihimuxa atthu akina, nnaamwi atthu awo yahaapisale mmahiye ntoko Laazaro. Martha khaasuwela ele yaarowa wiiraneya.

20. Mutthokiherye ele enitaphulela aya masu oohiliyaleya a Yesu ni Martha alempwe va Yohani 11:25-27.

²⁰ Moottharelana, Yesu aahilavula masu ahiniliyaleya, oriki: “Miyo ki ohihimuwa n’ikumi”. Tthiri, Yehova onvaha Mwanawe owerya wa waahihimuxa alipa-ookhwa valaponi, muhoolo. Yesu aahimukoha Martha oriki: “Nyuwo munnamini etthu ila?” Nto Martha aahaakhula ni masu athokoreriwe wanipacerya wa muru ola. Aanaamini wira Yesu ti Kristu, wala Mesiya, nave-tho aari Mwaana a Yehova Muluku, ni ti yoowo paahi maprofeta yaamuhimya aya wira aamoorwa valaponi.—Yoh. 5:28, 29; mmusome Yohani 11:25-27.

21, 22. (a) Yesu oonihenrye sai othunku wa ale anikhweliwa ole onimphenta aya? (b) Mutthokiherye moota Laazaro aahihimuxiwa awe.

²¹ Niireke Yehova Muluku ni Mwanawe Yesu Kristu annivaha efaita waamini ntoko wa Martha? Itthu saamukhumelenle ohoolo waya sinnaakhula nikoho nla. Owo aahitthimaka arowaka omuleela Maria. Nave aahoona wira Yesu aahixanka okathi aalavula awe ni Maria vamosa ni atthu anceene yanla ni yena. Nto Martha aahinweha Yesu anlaka ni wiiniwa murima mwaha woosuwela othunku onikhala vaavo vanikhwa awe mutthu. Nto aahiiwa okathi Yesu aarumiha awe wira nikumihiwe nluku naari vamukhora wa mahiye waavithiwe munnawe.—Yoh. 11:28-39.

²² Ntoko mutthu oowaakuva wuupuwela, Martha khoonale oreerela Yesu orumiha okumihiwa nluku nle, maana yaahivira mahiku maxexe nuumala okhwa nto murutthu awe waaninkha. Yesu aahimuupuxerya Martha ariki: “Nkohimenryeni wira, mwaminí vale, munimona ovuwa wa Muluku?” Tthiri Martha aahikupali ni khiweha ovuwa wa Yehova Muluku. Okathi ene yoole, Muluku aahinvaha Mwanawe owerya khumuhihimuxa Laazaro! Nkahaya muupuwele etthu Martha yahaarowa awe oliyala okumi awe wotheene, omwiiwa Yesu oriki: “Lázaro, mukhumele otá nno!”; atthu yaniiwa onyakula vakhaani waakhuma okhukuni, nto Laazaro khuvinya, khupacerya weetta vakhaani-vakhaani; okhumelaka ota; vano Yesu aalavunle so: “Mmutaphule, mmuhiye aroweke”. Tthiri Martha ni Maria yaahitthapa vanceene arowaka omukhupaarela murokoraya. (Mmusome Yohani 11:40-44.) Nto oriipiwa murima wa Martha waahimala-mala!

23. Exeeni Yehova ni Yesu aniphavela aya opaka wa nyuwo, nto muhaana opaka exeeni?

²³ Yowiiraneya ela ennooniherya wira ohihimuxiwa wa alipa-ookhwa khahiyo ethiru; masi ti mwiixuttiho wootepexa ohakalaliha ni wekeekhai ori mBiibiliyani. (Yobi 14:14, 15) Yehova ni Mwanawe  annisiveliwa tthiri waatthuvela arumeyi oororomeleya, ntoko siisaale Martha, Maria, ni Laazaro. Nave Yehova owo ni Mwanawe, animootthuvelani nyuwo mwalipiha waamini wanyu.

24. Yoohimmwa xeeni yookiserya onilavuliwa awe Martha?

²⁴ Biibiliya onnimulavula Martha mwa yowiiraneya ekina. Naari nihiku noopacerya na esumana yookiserya ya Yesu valaponi. Osuwelaka mixankiho saarowa omukhumelela, Yesu aahithanla-tho omaka vapuwani va Martha oBethania. Nto okhuma oBethania aarowa weetta ikiloomo tthaaru wira ophiye oYerusalemu. Yesu ni Laazaro yaamoolya owannyawe Simoni namakuttula, ole tori opuro onilavuliwa Martha vookiserya. Yowiiraneya eyo enihimya so: “Martha t’amurumela”.—Yoh. 12:2.

25. Mahiku ala miloko sinireelihiwa sai mwaha wookhalana athiyana ntoko Martha?

²⁵ Ela ti etthu yiiraneya wa muthiyana ola oowiilipiha! Ekwaha yoopacerya onilavuliwa awe mBiibiliyani, onihimmwa okhala muthiyana ooluttuweliwa miteko; nto okathi wookiserya nlelo towaatteliwa miteko, ovaraka khuta etthu eniwerya awe wira aathokorerye saana atthu ari opuro yoowo. Mahiku ala miloko sa atthareli a Kristu, sookhalana eparakha yuulupale, maana sookhalana athiyana ntoko Martha, yaawo ari oowiilipiha, oovaha, oowaamini ni ookhaliherya. Niireke Martha aahivikaniha okhala oororomeleya? Woonasa wene. Akhala wira ti siiso, eyo enooniherya wira aari muthiyana a miruku, nto miruku iyo saahimukhaliherya ovilela okathi wa mixankiho.

26. Waamini wa Martha waamukhalihenrye opaka exeeni?

²⁶ Nuuvira mahiku vakhaani, Martha aahaana ovilela mwaha wookhwa Yesu, Pwiyawe. Etthu ekina, okhala wira atakhali yaamwiivale Yesu, yaahivarihana-tho omwiiva Laazaro, maana ohihimuxiwa wawe wanilipiha waamini wa atthu anceene. (Mmusome Yohani 12:9-11.) Nto ohoolo waya, okhwa wa Yesu waahiiriha omala-mala wiiraana waarina awe Martha ni annawe. Ekeekhai wira hiyo khannisuwela okathi ene ni moota waamala-manle aya wiiraana waya, masi etthu enisuwela ahu tiila: Waamini wa Martha waahimukhaliherya ovilela mpakha wanikisa. Ti nthowa naya maKristau olelo-va, anitakiha aya waamini wawe.