Xudo sadoqatli xizmatchilari orasidan sanoqli kishilarni o‘lgandan keyin samodagi hayotga tirilishi uchun tanlayapti. (1 Butrus 1:3, 4) Tanlangan kishilar samoviy merosini olish uchun imonini mustahkam saqlashlari va yurish-turishda pok bo‘lishlari lozim. (Efesliklarga 5:5; Filippiliklarga 3:12–14)

Osmonga ketadiganlar u yerda nima bilan shug‘ullanishadi?

 Ular Iso bilan birgalikda 1 000-yil davomida shoh va ruhoniylar bo‘lib xizmat qiladi. (Vahiy 5:9, 10; 20:6) Ular «yangi osmon» — yangi samoviy hukumatni tashkil etadi va «yangi yer» — yerdagi yangi jamiyat ustidan boshqaradi. Samodagi ushbu shohlar Xudoning ilk niyatiga ko‘ra insoniyat jismonan, aqlan va ma’nan mukammal holatga kelishiga ko‘maklashadi. (Ishayo 65:17; 2 Butrus 3:13)

Qancha odam osmonda yashash uchun tiriladi?

 Muqaddas Kitobda yozilishicha 144 000 kishi samoda yashash uchun tiriladi. (Vahiy 7:4) Vahiy 14:1-3 da havoriy Yuhanno quyidagilarni ko‘rgani yozilgan: «Sion tog‘ida Qo‘zi turganini ko‘rdim. U bilan birga... 144 000 kishi bor edi». Ushbu vahiydagi «Qo‘zi» Isoni bildiradi. (Yuhanno 1:29; 1 Butrus 1:19) «Sion tog‘i» esa Isoning hamda u bilan birga samodan turib boshqaradigan 144 000 kishining yuksak mavqeini anglatadi. (Zabur 2:6; Ibroniylarga 12:22)

 Masih bilan Shohlikda boshqarish uchun «da’vat etilganlar, tanlanganlar» «kichik poda» deb ham atalgan. (Vahiy 17:14; Luqo 12:32) Bundan ko‘rinyaptiki, Isoning yer yuzida yashaydigan qo‘ylari bilan solishtirilganda ular kamchilikni tashkil etadi. (Yuhanno 10:16)

Osmonga ketadigan kishilar borasida noto‘g‘ri fikrlar

 Noto‘g‘ri fikr: Vahiy kitobida tilga olingan 144 000 raqami ramziy ma’noga ega.

 To‘g‘ri fikr: Vahiy kitobidagi ba’zi raqamlar ramziy ma’noga ega bo‘lsa-da, ayrimlari tom ma’noda qo‘llanilgan. Masalan, u yerda «Qo‘zining 12 havoriysi ismlari» haqida yozilgan. (Vahiy 21:14) 144 000 raqami ham tom ma’noda qo‘llanilganining dalillarini ko‘rib chiqaylik.

 Vahiy 7:4 ga ko‘ra, «muhr bosilgan kishilarning [yoki samoviy hayot uchun tanlanganlarning] soni 144 000 ekan». Ushbu bobning keyingi oyatlarida ikkinchi guruh, ya’ni «hech kim sanay olmaydigan ulkan olomon» haqida o‘qiymiz. «Ulkan olomonga» kiruvchi kishilarga ham Xudo najot beradi. (Vahiy 7:9, 10) Agar 144 000 raqami ramziy ma’noda qo‘llanilganida, uni sanog‘iga yetib bo‘lmaydigan ikkinchi guruh bilan taqqoslashdan ma’no qolmasdi a.

 Qolaversa, 144 000 kishi haqida «insonlar orasidan birinchi hosil sifatida sotib olingan» deb aytilgan. (Vahiy 14:4) «Birinchi hosil» iborasi tanlab olinganlar kichik guruhni tashkil etishiga ishora qilmoqda. Bu ta’rif Masih bilan birgalikda yer yuzidagi son-sanoqsiz fuqarolar ustidan boshqaradigan kishilarga juda mos keladi. (Vahiy 5:10)