2 Korinfliklarga 9:1-15
9 Muqaddas kishilarga xizmat qilishga kelsak+, bu haqda yozishimga aslida hojat yo‘q.
2 Boisi, yordam berishga tayyor ekaningizni bilganim uchun, makedoniyaliklarga Axayadagilar bir yildan buyon tayyor turishibdi deb, sizlar bilan maqtanib yuribman. Sizlarning g‘ayratingiz ularning aksariyatini harakatga soldi.
3 Biroq sizlar bilan maqtanganimiz quruq so‘z bo‘lib chiqmasligi uchun va xuddi aytganimday, tayyor turinglar deb, oldingizga birodarlarni jo‘natyapman.
4 Aks holda makedoniyalik birodarlar men bilan birga borib, tayyor emasligingizni ko‘rishsa, tag‘in sizlar ham, sizlarga shunchalik ishongan biz ham uyatga qolmaylik.
5 Shu sababli birodarlarni bizdan avval borishga undadim. Ular o‘zlaringiz saxiylik bilan berishni va’da qilgan ehsoningizni zo‘rlab olingan narsa kabi emas, saxiylik bilan berilgan narsa singari oldindan tayyorlab qo‘yishadi.
6 Bunga nisbatan shuni aytmoqchiman: qizg‘anib ekkan, oz o‘rib oladi, saxiylik bilan ekkan esa mo‘l o‘rib oladi+.
7 Har bir inson norozi bo‘lib yoki majburiyat yuzasidan emas, balki ko‘nglida niyat qilganini bersin+. Chunki Alloh quvonch bilan berganni sevadi+.
8 Bundan tashqari, Xudo O‘zining mo‘l-ko‘l inoyatini ustingizga yog‘dirishga qodir. Shu yo‘sin sizlar doim barcha zaruriy narsalarga ega va xayrli ishlarga boy bo‘lasizlar+.
9 (Muqaddas Yozuvlarda aytilganidek: «U saxiylik bilan tarqatadi, nochorlar bilan bo‘lishadi. Uning odilligi toabad bor bo‘ladi»+.
10 Dehqonga urug‘ni, yeydiganga nonni bergan Alloh, sizlarga ekish uchun urug‘ni mo‘l-ko‘l qilib beradi hamda odilligingizning samarasini orttiradi.)
11 Har jihatdan saxiylikni namoyon etishingiz uchun, Tangri sizlarga har tomondan baraka ato etyapti. Bizning sa’y-harakatimiz orqali bunday saxiylik insonlarni Xudoga shukronalar aytishga undamoqda.
12 Negaki bu xizmatingiz nafaqat muqaddas kishilarning ehtiyojlarini oshig‘i bilan qondirishi+, balki Allohga ko‘pdan-ko‘p minnatdorchiliklar keltirishi lozim.
13 Ular ushbu xizmatning samarasini ko‘rib, sizlar ochiqdan-ochiq e’lon qilayotgan Masih haqidagi xushxabarga itoatkorligingiz uchun hamda ularga va boshqalarga saxiylik bilan bergan xayr-ehsoningiz uchun Xudoni ulug‘lashmoqda+.
14 Tangrining sizlarga ko‘rsatgan cheksiz inoyatidan xabardor bo‘lgan holda, ular sizlarni sevishini bildirib, sizlar uchun Xudoga iltijo qilishyapti.
15 So‘z bilan ta’riflab bo‘lmaydigan hadyasi uchun Allohga shukrlar bo‘lsin!