Olosapo 21:1-31
21 Utima wa soma u kasi ndovava peka lia Yehova.+
Eye o u songuila oku Eye a panga.+
2 Omunu o sima okuti, olonjila viaye viosi via sunguluka,+Pole, Yehova o kũlĩhĩsa ovitima.+
3 Oku linga eci ciwa leci ca sunguluka,Oco ci sanjuisa vali Yehova okuti, ocilumba ci sule.+
4 Ovaso epela olondingaĩvi kuenda utima wavo woku lipanda,Ovio ondiyelo yi songuila onjila yavo kuenda ovina viaco ekandu.+
5 Asokiyo omunu ukuambili, a nena muẽle onima yiwa,*+Pole, vosi vakuanjanga va ka kala olohukũi.+
6 Oku nganyala ovokuasi omo liuhembi,Ci kasi ndowume u takata lonjanga kuenda onjanjo yi ponda.*+
7 Ungangala wolondingaĩvi u ka va nyõla,+Momo ovio vi likala oku lekisa esunga.
8 Onjila yomunu o kuete eko liekandu, ya penga,Pole, ovilinga viomunu ka kuete eko via suñama.+
9 Ca velapo oku tunga pevindi liolusoka,Oku kala vonjo yimuamue lukãi umue ukuovama* ci sule.+
10 Omunu ondingaĩvi o livela eci cĩvi;+Eye ka lekisa ohenda komunu a lisungue laye.+
11 Eci ukuakupembula a yambuiwa, omunu wa kamba olondunge o kuata olondunge.
Eci omunu ukualondunge a tambula elomboloko, eye o kuata ukũlĩhĩso.*+
12 Suku ukuesunga o lete onjo yondingaĩvi;Eye o kundula ondingaĩvi.+
13 Wosi o sitika etũi liaye koku liyula kuohukũiEye muẽle o ka vilikiya kuenje ka tambuluiwa.+
14 Ombanjaile yeciwa vuyombeki yi tulumũla onyeño,+Ocitukiko ceciwa vunyombeki* ci tulumũla onyeño yalua.
15 Oku lekisa esunga oco esanju kukuesunga,+Pole, oco ocina cimue cĩvi ku vana va linga evĩho.
16 Omunu una o yapuka vonjila yelombolokoO ka puyuka pokati kava va fa.+
17 Omunu una o sole ayele, o ka kala ohukũi;+Omunu una o sole ovinyu kuenda ulela, ka ka kala ohuasi.
18 Ondingaĩvi yi kala ocisembi komunu ukuesunga,Kuenda ukuelimbi o kala ocisembi komunu wa suñama.+
19 Ca velapo oku tunga vekalasokoOku kala lukãi ukuovama* haeye ukuanjuela ci sule.+
20 Vonjo yukualondunge muli ukuasi wa velapo kuenda ulela,+Pole, omunu eveke o sandola* eci a kuete.+
21 Wosi o sanda esunga kuenda ocisola ka ci pongolokaO ka kala ukuesunga kuenda o ka sanga omuenyo lulamba.+
22 Ukualondunge o pondola oku lamanela* volupale luomanu va pamaLoku nyõla ociteyuilo ovo va kolela.+
23 Omunu una o lava omẽla waye kuenda elimi liayeO yuvula oku likokela ovitangi.+
24 Omunu una o lekisa epela lialua,O tukuiwa okuti, ukuakulipanda kuenda ukuakulitunula.+
25 Ovina ukuawesi a livela viu kokela oku fa,Momo ovaka aye a likala oku talavaya.+
26 Eteke liosi eye o livela oku kuata cimue,Pole, ukuesunga eca kuenda ka suma suma.+
27 Suku o nyãle ovilumba viondingaĩvi.+
Ca piãla enene eci a vi lumba lonjongole yĩvi!*
28 Ombangi yesanda yi ka nyõliwa,+Pole, omunu o yevelela o ka kuata onima yiwa poku imba uvangi.*
29 Omunu ondingaĩvi ka kuete osõi kocipala caye,+Pole, omunu wa suñama onjila yaye ya kolapo.+
30 Ka kuli olondunge, ale elomboloko, pamue elungulo vi tamalãla la Yehova.+
31 Okavalu ka pongiyiwila eteke liuyaki,+Pole, epopelo lia tiamẽla ku Yehova.+
Atosi Pombuelo
^ Ale “o kuatisa.”
^ Ale pamue, “owume wu takata lonjanga ku vana va sanda olofa.”
^ Ale “ukuakulisiõsiõla.”
^ Ale “o kũlĩha eci a linga.”
^ Lit., “ocitukiko ci tunda ponete.”
^ Ale “ukuakulisiõsiõla.”
^ Lit., “oku ina.”
^ Ale “oku yula.”
^ Ale “lovilinga vi kutisa osõi!”
^ Lit., “o vangula otembo yosi.”
