Петрусниң 1-хети 4:1—19
4 Мәсиһ инсан сүпитидә азап чәккән екән, демәк, силәрму ой-пикирлириңларни шундақ кәйпиятта қуралландуруңлар, чүнки җисманий азап чекиватқан киши гуна қилишни тохтитиду.
2 Әнди у қалған өмрини инсаний һәвәсләр үчүн әмәс, бәлки Худаниң ирадиси үчүн яшайду.
3 Өтмүштә силәр башқа хәлиқләрниң ирадиси бойичә әхлақсиз қилиқларға, шәһванийлиққа, шарапхорлуққа, әйши-ишрәткә, ичәрмәнликкә вә жиркиничлик бутпәрәсликкә берилип яшиғансиләр.
4 Әнди силәр улар билән биллә оюн-тамашиларға берилмигәнлигиңлар үчүн, улар һәйран қелип, силәрни һақарәтлимәктә.
5 Амма мундақ адәмләр тирик вә өлүкләргә һөкүм чиқиришқа тәйяр болған сотчиниң алдида һесават бериду.
6 Шу мәхсәттә, инсанниң көзқариши бойичә улар җисманий җәһәттин һөкүм қилинип, Худаниң көз-қариши бойичә роһий җәһәттин яшиши үчүн, өлүкләргә хуш хәвәр елан қилинди.
7 Һалбуки, барлиқ нәрсиниң ахири йеқинлашмақта. Шуңа сағлам пикирлик вә дуалириңларда сәгәк болуңлар.
8 Әң авал бир-бириңларни қизғин сөйүңлар, чүнки меһир-муһәббәт көплигән гуналарни япиду.
9 Налә қилмай, өз ара меһмандост болуңлар.
10 Худаниң көп қирлиқ инайитиниң ибрәтлик башқурғучилиридәк, һәрбириңларға қабилийәт қандақ өлчәмдә берилгән болса, бир-бириңларға хизмәт қилғанда, шундақ өлчәмдә пайдилиниңлар.
11 Ким сөзлисә, Худаниң муқәддәс сөзлирини сөзлисун. Ким хизмәт қилса, Худа бәргән күчкә тайинип, хизмәт қилсун. Шу чағда Тәңримиз барлиқ нәрсиләрдә Әйса Мәсиһ арқилиқ мәдһийилиниду. Шан-шөһрәт һәм күч-қудрәт әбәттин-әбәт Худаға мәнсүптур! Амин.
12 Әзизлирим, араңларда синақ үчүн көйүватқан отқа дуч келип, худди һәҗәплинәрлик бир нәрсә йүз бериватқандәк, һәйран болмаңлар.
13 Әксичә, Мәсиһниң азаплириға шерик болуватқанлиқтин хошал болуңлар, чүнки униң улуқлинидиған вақти рошән болғанда, хурсән болуп шатлинисиләр.
14 Әгәр силәрни Мәсиһниң нами үчүн әйипләватса бәхитликсиләр, сәвәви шөһрәт роһи — Худаниң роһи силәрдә болмақта.
15 Силәрдин һечким қатил, оғри, җинайәтчи яки башқиларниң ишлириға чепилғини үчүн, азап чәкмисун.
16 Әгәр мәсиһий избасари сүпитидә азап чәксә, уялмисун, әксичә бу нам билән Худани мәдһийилисун.
17 Сот үчүн бәлгүләнгән вақит кәлди һәм у Худаниң өйидин башлиниду. Әгәр у биздин башлинидиған болса, Рәбниң хуш хәвиригә бойсунмайватқанларниң ахири немә болар?
18 «Әгәр һәққаний киши аран қутулса, рәзил вә гунакар қандақму сотта пәйда болалисун?»
19 Демәк, кимду-ким Тәңриниң ирадисигә уйғун азап чәксә, яхшилиқ қилип, өз җинини Яратқучиға тапшурсун.
