Петрусниң 1-хети 3:1—22
3 Худди шуниңдәк, силәр, аяллар, әрлириңларға беқиниңлар, Худа Сөзигә қулақ салмайдиған әрләр сөзлириңлар арқилиқ әмәс, бәлки жүрүш-турушуңлар арқилиқ тәсирлинип, Худаға қаритилған болсун,
2 йәни улар пак жүрүш-турушиңларни вә чоңқур һөрмәт қилишиңларни байқисун.
3 Силәрни сиртқи бир нәрсә: алаһидә өрүлгән чачлар, алтун зебу-зенәтләр вә есил кийимләр әмәс,
4 әксичә, қәлбиңларда йошурулған — Худаниң нәзәридә интайин қиммәт баһалиқ болуп һесапланидиған еғир-бесиқ һәм мулайим роһниң чиримас кийими безисун.
5 Өтмүштә Яратқучиға үмүт бағлап яшиған муқәддәс аяллар әрлиригә беқинип, өзлирини дәл мошундақ зенәтлигән.
6 Мәсилән, Сарә Ибраһим пәйғәмбәрни «ғоҗайиним» дәп атап, униңға бойсунған. Әгәр силәр яхшилиқ қилип, қорқунуч әкелидиған һечнәрсигә бой бәрмисәңлар, силәрму униң пәрзәнтлири болисиләр.
7 Силәр, әрләр, буниңдин бу янму аяллириңларға алған тәлиматиңларға яриша еһтирам билдүрүп, назугирақ қачилардәк уларни авайлап муамилә қилиңлар. Чүнки силәр улар билән биллә лайиқ болмиған һаят соғисиға мирасхор болватисиләр. Шу чағда силәрниң дуалириңларға тосалғулар болмайду.
8 Хулләс, һәммиңлар бир пикирлик, һисдашлиқ, қериндашларчә сөйүдиған, чоңқур һәмдәртлик вә ойлириңларда мөмүн,
9 яманлиққа яманлиқ, һақарәткә һақарәт билән җавап қайтурмай, әксичә яхшилиқ тиләңлар, чүнки силәр мошуниңға чақирилдиңлар һәм шу чағда бәрикәткә еришисиләр.
10 «Ким һаяттин хурсәнлик тепип, яхши күнләрни көрүшни халиса, тилини яманлиқтин, еғизини ялған гәпләрдин тартсун,
11 явузлуқтин қечип, яхшилиқ қилсун, течлиқни издәп, униңға интилсун.
12 Чүнки Йәһваниң көзлири һәққаний кишиләргә қаритилған, қулақлири уларниң илтиҗалирини аңлайду, амма яманлиқ қилғучилардин Йәһва үз өриду».
13 Әгәр яхши ишларни қилишқа қизғин болсаңлар, силәргә кимму зиян қилалисун?
14 Һәтта һәққанийлиқ үчүн азап чәксәңларму, бәхитликсиләр. Улар қорқудиған нәрсиләрдин қорқмаңлар һәм тәшвишләнмәңлар.
15 Мәсиһни Һакимдар сүпитидә қәлбиңларда муқәддәс тутуңлар. Үмүтиңларни яқлап, униң һәққидә сориған һәрбир адәмгә җавап беришкә дайим тәйяр болуңлар, пәқәт буни мулайимлиқ вә чоңқур һөрмәт билән чүшәндүрүңлар.
16 Мәсиһниң избасарлири болған силәргә қарши туруп, силәрниң яхши тәртивиңлар тоғрисида тәңситмәй сөзлигәнләр өз сөзлиридин уюлуп қелиши үчүн, вижданиңларни пак сақлаңлар.
17 Әгәр Худаниң ирадиси шундақ болса, яманлиқ қилип азап чәккәндин көрә, яхшилиқ қилип азап тартқинимиз әвзәл.
18 Һәққаний инсан Мәсиһ һәққанийсиз кишиләрни Худаға елип келиш үчүн, бир қетим вә мәңгүгә өзини пида қилди. У инсан сүпитидә өлүп, роһ сүпитидә тирилди.
19 Андин у берип, зиндандики роһларға хәвәрни елан қилди.
20 Улар — Нуһ пәйғәмбәрниң дәвридә Худа кемә қурулушини сәвир-тақәт билән күткән вақитта — итаәтсизлик қилған роһлардур. Кемидә аз кишиләр, җәми сәккиз җан судин аман қалған еди.
21 Шуниңға охшаш, һазирму суға чөмдүрүш (бу — тәнниң киридин қутулуш әмәс, бәлки Худадин пак виждан сораштур) силәрни Әйса Мәсиһниң тирилиши арқилиқ қутқузиду.
22 Асманға көтирилгәндин кейин Мәсиһ Пәрвәрдигарниң оң йенида олтарди вә униңға пәриштиләр, һакимийәтләр һәм күчләр бойсундурулди.
