Хуш хәвәр бәхитлик Худа Йәһвадин келиду, У барлиқ аилиләрниң бәхитлик болушини халайду (Тимотийға 1-хәт 1:11). Худа Өзи аилини тәшкиллигән. Аилиниң бәхитлик болуши үчүн, некани қанун бойичә тиркәш керәк. Бу аилә әзалириниң һәммисини қоғдайду һәм балиларни бәхитлик һалда өстүрүшкә ярдәм бериду. Худаға лайиқ болуш үчүн, һөкүмәтниң некадин өтүш қанунлириға бойсунуш керәк (Луқа 2:1, 4, 5 оқуп чиқиң).

Худа некаға қандақ қарайду? У әр-аялниң иттипақи мәңгү болушини халайду. Шундақла, Йәһва Худа әр-аялниң бир-биригә вападар болушини халайду (Ибранийларға 13:4). У аҗришишни өч көриду (Марк 10:9). Бирақ Худа хизмәтчисиниң рәпиқиси зина қилса, у чағда аҗришишқа һәм қайта некаға турушқа йол қоюду (Мәтта 19:3—6, 9 оқуп чиқиң).

Йәһва Худа әр вә аялни бир-бирини толуқтуруш үчүн яратқан (Яритилиш 2:18). Әр — аилиниң башчиси. У аилисиниң җисманий еһтияҗлириға ғәмхорлуқ қилиши вә улар билән Муқәддәс китапни оқуши керәк. У аяли үчүн җанпида болуши керәк. Әр-аял бир-бирини сөйүп, һөрмәт көрситиши керәк. Хаталашмайдиған адәм йоқ, шуниң үчүн әр вә аял бир-бирини кәчүрүшкә тәйяр болуши керәк. Бу — бәхитлик аиләвий турмушниң ачқучи (Әфәсликләргә 4:31, 32; 5:22—25, 33; Петрусниң 1-хети 3:7 оқуп чиқиң).

Әгәр некада қийинчилиқлар пәйда болса, әр вә аял бир-биригә меһир-муһәббәт көрситиши керәк (Коринтлиқларға 1-хәт 13:4, 5). Худаниң Сөзи қийинчилиқларни йешиш үчүн алайтән турушни қоллимайду (Коринтлиқларға 1-хәт 7:10—13 оқуп чиқиң).

Йәһва Худа силәрниң бәхитлик болушуңларни халайду. Әгәр силәр Уни тиңшисаңлар көп қийинчилиқлардин жирақ болуп, бәхитлик болалайсиләр. Шундақла У силәрниң ата-анаңларға қулақ селишиңларни халайду, чүнки улар даналиғирақ һәм уларниң тәҗрибиси көпирәк (Колосилиқларға 3:20). Шундақла Йәһва силәрдин Униңға яқидиған ишларни қилишиңларни халайду. Чүнки У силәргә бу хошаллиқ әкелидиғанлиғини билиду (Вәз 11:9—12:1; Мәтта 19:13—15; 21:15, 16 оқуп чиқиң).

Силәр пәрзәнтлириңларда тамақ, кийим-кечәк вә өй макани болуш үчүн ғәмхорлуқ қилишиңлар керәк (Тимотийға 1-хәт 5:8). Бирақ улар бәхитлик болуши үчүн, уларға Худани яхши көрүшкә вә Униң ейтқинини тиңшашқа үгитишиңлар керәк (Әфәсликләргә 6:4). Пәрзәнтлириңлар үчүн силәрниң үлгәңлар наһайити муһим. Әгәр улар силәрниң Худаға болған сөйүмиңларни көрсә, бу уларға қаттиқ тәсир қилиду. Худаниң сөзи пәрзәнтлириңларни яхши тәрбийиләп, уларниң ой-пикирлириниң тоғра болушиға ярдәм бериду (Қанун шәрһи 6:4—7; Яритилиш 18:19 оқуп чиқиң).

Балиларни махташ вә уларға болған көйүмиңларни ейтиш муһим. Шундақла уларни түзитиш һәм җазалашму керәк. Бу уларни хәтәрликкә учраштин вә яман ишлардин сақлайду (Пәнд-нәсиһәтләр 22:15). Лекин шундақ түзитиш яки җазалаш рәһимсиз һәм қопал түрдә болмаслиғи керәк (Колосилиқларға 3:21 оқуп чиқиң).

Йәһва гувачилири ата-аниларға вә балиларға ярдәм бериш үчүн бир нәччә китапларни бесип чиқарған. Бу әдәбиятлар Муқәддәс китапқа асасланған (Зәбур 19:7, 11 оқуп чиқиң).