Mu nkhani iyo yajumpha, tanguwona za chimanyikwiro icho Yesu wakapeleka, icho chingatovwira kumanya kuti Ufumu wa Chiuta uli kwamba kulamulira kuchanya kweniso kuti Yesu Khristu ni Fumu.

Baibolo likuti Yesu wati waŵa Fumu, wakachimbizga Satana na viŵanda vyake kuchanya. Pasono Satana na viŵanda vyake ŵangatimbanizgaso yayi vinthu kuchanya kweni pa charu cha pasi pera. Lekani kwambira mu 1914 pa charu chapasi pali masuzgo ghanandi.​—Chivumbuzi 12:7, 9.

Nangauli pa charu pali masuzgo ghose agha, kweni Yesu pakuŵa Fumu ya Ufumu wa Chiuta, wachitapo kanthu kuti wawovwire ŵanthu pa charu chose. Kwizira mu ntchito ya kupharazga, ŵanthu ŵanandi ŵakusambira na kulondezga fundo za mu Baibolo pa umoyo wawo. (Yesaya 2:2-4) Ŵanthu ŵanandi ŵasambira umo ŵangagwilira makora ntchito, umo ŵangakhalira makora mu mbumba zawo kweniso umo wangachitira kuti ŵawonenge mwakwenelera vinthu vyakuthupi. Ŵanthu aŵa ŵakusambizgika umo ŵangachitira kuti ŵaŵe na umoyo uwemi sono, kweniso ŵakusintha nkharo zawo kuti ŵaŵe ŵakwenelera kuzakakhala mu Ufumu wa Chiuta.

Nangauli Yesu wali kwamba kale kulamulira kuchanya, kweni maufumu gha ŵanthu ghachali kulamulira pa charu chapasi. Kweni Chiuta wali kuphalira Yesu kuti: “Luta ukathereske mukati mwa ŵalwani ŵako.” (Salimo 110:2) Sonosono apa Yesu wazamuparanya ŵalwani ŵake wose na kuponoska wose awo ŵakujilambika ku Ufumu wa Chiuta.

Pa nyengo iyi, Ufumu wa Chiuta uzamuchitapo kanthu kuti:

• Umazge chisopa chautesi. Visopa vyautesi ivyo vikupusika ŵanthu pa nkhani ya Chiuta kweniso kuŵayuzga vizamuŵakoso yayi. Baibolo likuyelezgera chisopa chautesi na mwanakazi muhule. Ŵanandi ŵazamuzizikika para chisopa chautesi chaparanyika.​—Chivumbuzi 17:15, 16.

• Umazge ulamuliro wa ŵanthu. Ufumu wa Chiuta uzamumazga maboma ghose gha ŵanthu.​—Chivumbuzi 19:15, 17, 18.

• Uparanye ŵanthu ŵaheni. Kasi vizamuŵamalira wuli ŵanthu awo ŵakuchita viheni ndipo ŵakukana kuŵa ku chigaŵa cha Ufumu wa Chiuta? Baibolo likuti: “Ŵaheni ŵadumulikenge mu charu chapasi.”​—Zintharika 2:22.

• Ujalire Satana na viŵanda vyake. Satana na viŵanda vyake ŵazamuponyeka mu chizongwe mwakuti ŵaleke “kupuluskaso mitundu” ya ŵanthu.​—Chivumbuzi 20:3, 10.

Kasi vinthu vizamuŵa wuli ku awo ŵazomera Ufumu wa Chiuta?

Pakuŵa Fumu ya kuchanya, Yesu wazamufiska vinandi chomene ivyo ulamuliro wa ŵanthu ungachita  yayi. Iyo wazamulamulira lumoza na ŵanthu 144,000 awo wasankhika kufuma mu mitundu yakupambanapambana pa charu chapasi. (Chivumbuzi 5:9, 10; 14:1, 3) Yesu wazamuwoneseska kuti khumbo la Chiuta lachitika pano pasi. Kasi Ufumu wa Chiuta uzamuŵachitira vichi ŵanthu pa charu chapasi?

• Uzamuwuskapo matenda na nyifwa. “Pazamuŵavya munthu wakukhala mu charu uyo wazamuti ‘Nalwara’” ndipo “nyifwa yizamuŵakoso yayi.”​—Yesaya 33:24; Chivumbuzi 21:4.

• Uzamwiziska mtende weneko na chivikiliro. “Mtende wa ŵana ŵako uzamuŵa ukuru” kweniso “waliyose wazamukhala musi mwa khuni lake la mpheska na musi mwa khuni lake la mkuyu, ndipo palije na yumoza uyo wazamuŵawofya.”​—Yesaya 54:13; Mika 4:4.

• Ntchito ziwemi. “Ŵazamusangwa fikepo na mulimo wa mawoko ghawo. Ŵazamuphyoka pawaka chara.”​—Yesaya 65:22, 23.

• Malo ghawemi ghakukhala. “Mapopa na charu chambura maji vizamusekelera, chipalamba chizamukondwa na kuzota nga ni luŵa la safuroni.”​—Yesaya 35:1.

• Kusambizga ŵanthu ivyo ŵangachita kuti ŵaŵe na umoyo wamuyirayira. “Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha, ndiposo Yesu Khristu, uyo mukamutuma.”​—Yohane 17:3.

Chiuta wakukhumba chomene kuti namwe muzakakondwe na vitumbiko ivi. (Yesaya 48:18) Nkhani yakulondezgapo yikulongosora ivyo mungachita kuti namwe muzakapokereko vitumbiko ivi.