Kasi Fumu ya Ufumu wa Chiuta Ni Njani?
Chiuta wakawovwira ŵanthu awo ŵakalembako Baibolo kulemba vinthu ivyo vingatovwira kumanya uyo ni Fumu ya Ufumu wa Chiuta. Uyo wazamuwusa:
-
Wali kusankhika na Chiuta. “Ine nimika themba lane . . . nikupenge mitundu kuŵa chiharo chako vigoti vya charu chapasi kuŵa vyako.”—Salimo 2:6, 8.
-
Wakahara uthemba wa Davide. “Mwana wababika kwa ise, mwana mwanalume wapika kwa ise . . . Kusazgikira kwa muwuso wake na mtende vizamumara chara, pa chitengo cha Davide na pa ufumu wake mwakuti wawukhozge.”—Yesaya 9:6, 7.
-
Wakababikira mu Betelehemu. “Iwe, Betelehemu . . . , mwa iwe muzamufuma uyo wazamuŵa muwusi . . . Ukuru wake uzamufika ku vigoti vya charu chapasi.”—Mika 5:2, 4.
-
Wakakanika na ŵanthu na kukomeka. “Wakayuyulika, ndipo tikamuwona nga walije ntchito . . . Wakalasika chifukwa cha maubudi ghithu; wakatimbika chifukwa cha mphuvya zithu.”—Yesaya 53:3, 5.
-
Wakawuskika ku ŵakufwa na kutumphuskika. “Munisidenge mu Dindi chara. Muzomerezgenge chara kuti wakugomezgeka winu wawone khululu . . . . Mu woko linu lamalyero muli kukondwa muyirayira.”—Salimo 16:10, 11.
Yesu Khristu Wazamuŵa Themba Liwemi Chomene
Ni munthu yumoza pera uyo wali kufiska vyose ivi, kufuma apo ŵanthu ŵali kuŵirako. Munthu uyu ni Yesu Khristu. Nakuti mungelo wakaphalira mama wake Mariya kuti: “Chiuta wazamumupa chitengo cha Davide, awiske, . . . ndipo Ufumu wake uzamumara chara.”—Luka 1:31-33.
Yesu wandaŵepo themba pa charu chapasi. Kweni iyo wazamuwusa ŵanthu kufuma kuchanya pakuŵa Fumu ya Ufumu wa Chiuta. Chifukwa wuli ngwakwenelera kuŵa Themba? Wonani ivyo wakachita apo wakaŵa pa charu chapasi.
-
Yesu wakaghanaghaniranga ŵanthu. Yesu wakawovwiranga ŵanthu wose, kwali ni ŵanalume, ŵanakazi, ŵana kweniso ŵachekuru. Iyo wakawovwiranga ŵanthu wa mitundu yose. (Mateyu 9:36; Mariko 10:16) Munthu wavyoni wati wamuŵeya kuti: “Usange mukukhumba, munganitozga,” Yesu chitima chikamukora ndipo wakamuchizga.—Mariko 1:40-42.
-
Yesu wakutisambizga umo tingakondweskera Chiuta. Iyo wakati: “Vingachitika yayi kuti pa nyengo yimoza muŵe ŵazga ŵa Chiuta na Usambazi.” Kweniso wakachiska ŵanthu kuti ŵachitirenge ŵanyawo vinthu ivyo nawo ŵangatemwa kuti ŵanyawo ŵaŵachitire. Kweniso Yesu wakati Chiuta wakumanya ivyo tikuchita, ivyo tikughanaghana kweniso umo tikujipulikira. Ntheura kuti timukondweske Chiuta, tikwenera kuŵa ŵakujikora. (Mateyu 5:28; 6:24; 7:12) Yesu wakayowoyaso kuti, taŵanthu tingaŵa ŵakukondwa usange tikupulika mazgu gha Chiuta na kughachita.—Luka 11:28.
-
Yesu wakatisambizga umo tingatemwera ŵanyithu. Ivyo Yesu wakayowoyanga na kuchita vikaŵa na nkhongono ndipo vikaŵafikanga pamtima ŵategherezgi ŵake. Baibolo likuti: “Mizinda yikazizikika na kasambizgiro kake, pakuti wakaŵasambizganga nga ni munthu uyo wali na mazaza.” (Mateyu 7:28, 29) Wakaŵasambizga kuti: “Temwani ŵalwani ŵinu.” Iyo wakalomberanga nanga ni ŵalwani ŵake awo ŵakamukoma. Iyo wakaŵalombera kuti: “Adada, muŵagowokere, chifukwa ŵakumanya chara icho ŵakuchita.”—Mateyu 5:44; Luka 23:34.
Yesu ngwakwenelera nadi kulamulira ŵanthu chifukwa wazamovwira ŵanthu wose kweniso ngwalusungu. Kweni kasi wazamwamba pawuli kulamulira pa charu chapasi?
Panji Mungatemwa Kuŵerengaso Nkhani Izi
MAFUMBO AGHO BAIBOLO LIKUZGORA
Kasi Yesu Wakuponoska Wuli Ŵanthu?
Chifukwa wuli Yesu wakwenera kutiŵeyelera kwa Chiuta? Kasi kugomezga waka mwa Yesu nkhwakukwana kuti tizakaponoskeke?
MAFUMBO AGHO BAIBOLO LIKUZGORA
Kasi Ufumu wa Chiuta Ni Vichi?
Chifukwa wuli boma la Chiuta ndapachanya chomene?
MUŴENGE MASO!
Kasi Musankhenge Njani Kuŵa Mulongozgi?—Kasi Baibolo Likutipo Wuli?
Nanga mbalongozgi awo ŵakuwoneka kuti ŵakuchita makora, nawo ŵali na masuzgo ghawo, kweni pali Mulongozgi uyo ni muwemi chomene.
MAFUMBO AGHO BAIBOLO LIKUZGORA
Kasi Sembe ya Yesu ‘Ntchiwombolero cha Ŵanandi’ mu Nthowa Wuli?
Kasi chiwombolero chikuponoska wuli ŵanthu ku kwananga?
