“Ndzi ringetile ku hlaya Bibele kambe ndzi hatle ndzi hela matimba hikuva yi lehile swinene!”​—Briana, 15.

 Xana na wena u titwa tano? Nhlokomhaka leyi yi ta ku pfuna!

•  Hikwalaho ka yini u fanele u hlaya Bibele?

•  Ndzi fanele ndzi yi hlaya njhani Bibele?

•  Leswi tintangha ta wena ti swi vulaka

 Xana ku hlaya Bibele swa ku borha? Loko swi ri tano, swa twisiseka. U nga teka Bibele ku ri buku leyi nga ni mapheji yo tala leyi tsariweke hi marito lamatsongo leyi nga riki na swifaniso, lerova u vona onge hambi ku ri thelevhixini na tivhidiyo swa yi antswela.

 Kambe ehleketa hi leswi: A hi nge u vona bokisi ra khale swinene ra xuma, xana a wu nga ta lava ku tiva leswaku ku na yini endzeni?

 Bibele yi fana ni bokisi rolero. Yi ni tidyondzo to tala ta vutlhari leti nga ku pfunaka leswaku

•   U endla swiboho leswinene

•   U hanyisana kahle ni vatswari va wena

•   U kuma vanghana lavanene

•   U lwisana na xitirese

 Xana buku ya khale so yi nga ku pfuna njhani namuntlha? Hileswi “Matsalwa hinkwawo ma huhuteriwe hi Xikwembu.” (2 Timotiya 3:16) Leswi swi vula leswaku switsundzuxo leswi nga eBibeleni swi huma eka Xikwembu.

 Ndlela yin’wana i ku yi hlaya ku sukela eku sunguleni ku ya fika emakumu. Sweswo swi ta ku pfuna leswaku u tiva mongo hinkwawo wa Bibele. Ku ni tindlela to tala to hlaya Bibele. Vona swikombiso swimbirhi:

•    U nga hlaya tibuku ta Bibele ta 66 hi ku ya hi ndlela leyi ti landzelelanaka ha yona ku suka eka Genesa ku ya eka Nhlavutelo.

•    U nga hlaya Bibele hi ku ya hi ndlela leyi swilo leswi tsariweke swi endlekeke ha yona.

 Xiringanyeto: Xiengetelo A7 eka Bibele—Matsalwa Yo Kwetsima Ya Misava Leyintshwa xi ni nxaxamelo wa swiendlakalonkulu swa vutomi bya Yesu hi ku landzelelaka ka swona loko a ri emisaveni.

 Ndlela ya vumbirhi yo hlaya Bibele i ku hlawula mhaka leyi fambisanaka ni xiphiqo lexi u nga na xona. Hi xikombiso:

•   Xana wa swi lava ku va ni vanghana vo tshembeka? Hlaya mhaka ya Yonathani na Davhida. (1 Samuwele chapta 18-​20) Ivi u tirhisa tluka ra xitoloveto leri nga ni nhlokomhaka leyi nge, “Ndlela Yo Kuma Vanghana Vo Tshembeka” leswaku u ta kuma tidyondzo ta nkoka.

•   Xana u nga tsakela ku va ni vuswikoti byo papalata miringo? Hlaya hi ndlela leyi Yosefa a hluleke ndzingo ha yona. (Genesa chapta 39) Ivi u tirhisa tluka ra xitoloveto leri nga ni nhlokomhaka leyi nge, “Ndlela Yo Lwisana Ni Miringo. . . Yosefa​—Xiyenge 1” ni leyi nge, “Ku Hehliwa Hi Mavunwa! Yosefa​—Xiyenge 2” leswaku u ta kuma tidyondzo ta nkoka.

•   Xana u tsakela ku tiva ndlela leyi xikhongelo xi nga ku pfunaka ha yona? Hlaya mhaka ya Nehemiya. (Nehemiya chapta 2) Ivi u tirhisa tluka ra xitoloveto leri nga ni nhlokomhaka leyi nge, “Xikwembu Xi Hlamule Xikhongelo Xa Yena” leswaku u ta kuma tidyondzo ta nkoka.

 Xiringanyeto: Hlaya Bibele endhawini leyi nga lo tititi, leswaku u ta kota ku dzikisa miehleketo.

 Ndlela ya vunharhu yo hlaya Bibele i ku hlawula mhaka kumbe pisalema yo karhi ivi u yi hlaya kutani u ehleketisisa hi ndlela leyi u nga swi tirhisaka ha yona. Loko u heta ku hlaya, tivutise swivutiso swo fana ni leswi:

•    Hikwalaho ka yini Yehovha a katse mhaka leyi eBibeleni?

•    Mhaka leyi yi ndzi dyondzisa yini hi vumunhu bya Yehovha kumbe hi ndlela leyi a endlaka swilo ha yona?

•    Ndzi nga yi tirhisa njhani mhaka leyi evuton’wini bya mina?

 Xiringanyeto: Tiyimisele ku endla leswi! Ri tsale hansi siku leri u lavaka ku sungula ku hlaya Bibele ha rona.