Leswi nga ku endlaka u hlawula goza leri: U lava ku komba vanghana va wena leswaku wa tilawula. U vona onge u tiva ku tlula vatswari va wena kumbe a wu swi xiximi swiboho swa vona.—Swivuriso 14:18.

 Vuyelo bya kona: U nga ha tsakisa vanghana va wena kambe va ta tlhela va dyondza swo karhi malunghana na wena—leswaku u mukanganyisi. Loko u kanganyisa vatswari va wena, swi vula leswaku u nga ha kanganyisa ni vanghana va wena. Loko vatswari va wena va kuma leswaku u va kanganyisile, va ta twa ku vava hileswi u va xengeke kutani va nga ha ku alela ku ya etindhawini ta wena!—Swivuriso 12:15.

 Leswi nga ku endlaka u hlawula goza leri: U nga ha anakanya hi xinkhubyana xexo ivi u teka xiboho xa leswaku a xi fambisani ni milawu ya wena kumbe u xiya leswaku van’wana lava rhambiweke a hi vanghana lavanene. (1 Vakorinto 15:33; Vafilipiya 4:8) Hi hala tlhelo, u nga ha va u swi lava ku ya kambe u nga ri na xivindzi xo kombela vatswari va wena.

 Vuyelo bya kona: Loko u nga yi hikwalaho ka leswi u swi tivaka leswaku swi hoxile, u ta va ni xivindzi loko u hlamula vanghana va wena. Kambe loko u nga yi hikwalaho ko pfumala xivindzi xo kombela vatswari va wena, u nga ha tikuma u tshame ekaya u ri eku vileleni u vona onge hi wena ntsena loyi a nga tiphiniki hi vutomi.

 Leswi nga ku endlaka u hlawula goza leri: Wa byi xiya vutihlamuleri lebyi vatswari va wena va nga na byona eka wena naswona u xixima swiboho leswi va swi endlaka. (Vakolosa 3:20) Wa va rhandza naswona a wu swi lavi ku va twisa ku vava hi ku nyenga u famba handle ka mpfumelelo wa vona. (Swivuriso 10:1) Nakambe u nga kuma nkarhi wo va kombela ku ya enkhubyeni.

 Vuyelo bya kona: Vatswari va wena va ta swi xiya leswaku wa va rhandza naswona wa va xixima. Kutani loko va xiya leswaku xikombelo xa wena xa twisiseka, va nga ha ku pfumelela.

 Xivangelo xo sungula xi nga hlamuseriwa hi xikombiso lexi: Loko a wo kota ku tihlawulela, a swi kanakanisi leswaku a wu ta hlawula ku hlambela elwandle leri nga ni varindzi lava pfunaka vanhu loko va ri ekhombyeni. Ha yini? Hikuva loko u ri karhi u tiphina hi ku hlambela, a wu swi koti ku vona makhombo lawa ma nga ha vaka kona. Kambe varindzi va tshame endhawini leyinene laha va kotaka ku ma vona kahle makhombo. Hilaha ku fanaka, vatswari va wena va nga ha vona makhombo lawa wena u nga ma voniki hikwalaho ka leswi va nga ni vutivi ni ntokoto lowukulu. Ku fana ni varindzi va le lwandle, xikongomelo xa vatswari va wena a hi ku ku sivela leswaku u nga tsaki kambe i ku ku pfuna leswaku u papalata makhombo lama nga ku hetelaka ntsako evuton’wini.

 Hi lexi xivangelo xin’wana: Vatswari va wena va swi navela hi mbilu hinkwayo ku ku sirhelela. Rirhandzu leri va nga na rona ha wena ri va susumetela ku pfumela loko swi fanerile ni ku ala loko swi nga fanelanga. Loko u kombela mpfumelelo wo endla swo karhi, va tivutisa loko va fanele va ku pfumelela ni loko va ta swi kota ku langutana ni vuyelo lebyi nga ha vaka kona. Va ta ku pfumelela loko va tiyiseka hakunene leswaku ku hava xo biha lexi nga ta ku humelela.

Leswi u nga swi endlaka

 Ku tshembeka: Tivutise: ‘Kahle-kahle ha yini ndzi lava ku ya enkhubyeni? Xana xivangelo-nkulu hileswi ndzi rhandzaka xinkhubyana kumbe hileswi ndzi lavaka ku tsakisa tintangha ta mina? Xana hileswi ku nga ta va ni munhu loyi ndzi n’wi rhandzaka?’ Kutani byela vatswari va wena ntiyiso. Na vona va tshame va va vantshwa naswona va ku tiva kahle. Kutani va nga ha swi xiya swikongomelo swa wena hi ndlela yo karhi. Va ta tsaka loko u va byela ntiyiso naswona u ta vuyeriwa eka vutlhari bya vona. (Swivuriso 7:1, 2) Hi hala tlhelo, loko u nga va byeli ntiyiso, u endla leswaku vatswari va wena va nga ha ku tshembi naswona va ta ku alela ku ya enkhubyeni.

 Nkarhi lowunene: U nga nambi u kombela vatswari va wena loko va ha ku vuya hi le ntirhweni kumbe loko va ha khomekile hi timhaka tin’wana. Vulavula na vona loko va tigedlile. Kambe u nga rindzi kukondza ku va hi siku ro hetelela ivi u ringeta ku va sindzisa leswaku va ku hlamula hi ku hatlisa. Vatswari va wena va nge swi tsakeli ku endla xiboho hi ku hatlisa. Va kombele ka ha ri ni nkarhi leswaku u va nyika nkarhi wo ehleketa hi xikombelo xa wena.

 Vula vuxokoxoko hinkwabyo: U nga va tumbeteli swin’wana. Va hlamusele leswi u lavaka ku swi endla. Vatswari a va yi rhandzi nhlamulo leyi nge, “A ndzi swi tivi,” ngopfu-ngopfu loko va ku vutisa va ku: “Ku ta va ku ri na vamani?” “Xana ku ta va ni munhu lonkulu loyi a nga ta mi langutela?” kumbe “U ta vuya hi nkarhi muni ekaya?”

 Vana ni langutelo lerinene: U nga teki vatswari va wena tanihi valala. Va teke tanihi vanghana va wena lava mi nga eka xipano xin’we hikuva entiyisweni swi tano. Loko u teka vatswari va wena tanihi vanghana va wena, a wu nge vulavuli na vona onge hiloko u ri eku lweni naswona va ta tirhisana na wena.

 Kombisa vatswari va wena leswaku u wupfile lerova u ta amukela xiboho xa vona ni ku xi xixima. Loko u endla tano, va ta ku xixima. Nakambe loko u va kombela enkarhini lowu taka, va nga ha lava tindlela ta ku ku pfumelela leswaku u ya enkhubyeni.