Sena mwasikilwa malwazi ngomwatali kuyeeyela? Cakutadooneka, mulizyi kuti malwazi alakonzya kupa kuti mukatale mumizeezo alimwi ambomulimvwa, alimwi buya busilisi bulakonzya kumudulila. Ncinzi cikonzya kumugwasya mubukkale oobu? Mbuti mbomukonzya kugwasya munamukwasyi naa mulongwe uucisidwe? Nokuba kuti Bbaibbele talili bbuku lyaamba zyabusilisi, lilaamba njiisyo zikonzya kumugwasya kuliyumya mubukkale bwanu.

•   Amuunke kucibbadela

   Ncolyaamba Bbaibbele: “Bantu bataciswi tabayandiki musilisi, pele aabo baciswa mbabayandika musilisi.”—Matayo 9:12.

   Bupanduluzi: Amuunke kucibbadela kuti bakamulange-lange basyaazibwene kuti kwayandika.

   Amusole nzila eeyi: Amuunke kucibbadela ncobasyoma kapati kubusena nkomubede. Zimwi ziindi inga kwayandika kuunka akucibbadela kumbi naa kubonana abamadokota banji kutali omwe buyo. (Tusimpi 14:15) Amubaambile basilisi munzila iisalala mbomulimvwide akuba masimpe kuti abalo bazimvwisya nzyomwabaambila. (Tusimpi 15:22) Amubuzyibe bulwazi bwanu, kubikkilizya abusilisi bwiindene-indene buliko. Ikuti mwamvwisya ciyandika, munoolibambilide kuliyumya mubukkale bwanu akusala busilisi buli kabotu.

•   Amulibambe kabotu

   Ncolyaamba Bbaibbele: ‘Kunyanyaasya mubili kulagwasya.’—1 Timoteyo 4:8.

   Bupanduluzi: Mulakonzya kugwasyigwa ikuti kamulibamba kabotu, kubikkilizya akunyanyaasya mubili lyoonse.

   Amusole nzila eeyi: Kamunyanyaasya mubili lyoonse, kamulya zyakulya zijisi busani, alimwi akoona mawoola aayelede lyoonse. Nokuba kuti tamunabuzyibila bukkale bwanu bupya, basyaazibwene baamba kuti, kusolekesya kulibamba kabotu cilagwasya kapati. Ciyandika buyo ncakuti, kufwumbwa ncomwasala kucita kunyanyaasya mubili wanu, taceelede kwiindizya bulwazi bwanu.

•   Amulombe lugwasyo kuli bamwi

   Ncolyaamba Bbaibbele: “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.”—Tusimpi 17:17.

   Bupanduluzi: Balongwe balakonzya kumugwasya kuliyumya muziindi zikatazya.

   Amusole nzila eeyi: Amubandike amulongwe ngomusyoma walo ngomukonzya kwaambila mbomulimvwa cakulikwaya. Eeci cilakonzya kumugwasya kulimvwa kabotu akumupa kukkomana. Balongwe abanamukwasyi inga kabayanda kumugwasya munzila zimwi, pele ambweni inga kabatazyi ncobeelede kucita. Aboobo amubaambile cakusalazya ncobakonzya kucita kutegwa bamugwasye. Mutanoolangili zinji pe, alimwi kamulumba lyoonse kulugwasyo ndobamupa. Aciindi nciconya kamuyeeyede kuti, nokuba kuti balongwe banu inga kabayanda kumugwasya, zimwi ziindi inga bacita zintu zikonzya kumulemya. Aboobo mweelede kubikka milawo, mbuli kujatikizya ziindi nobakonzya kumuswaya.

•   Kamuzilanga kabotu zintu

   Ncolyaamba Bbaibbele: “Moyo uukkomene musamu mubotu uuponya, pele kupenga mumizeezo kupa kuti muntu amaninwe nguzu.”—Tusimpi 17:22.

   Bupanduluzi: Kuzilanga kabotu zintu akuba abulangizi cilakonzya kumugwasya kukkalikana mumizeezo kutegwa mucikonzye kulwana malwazi ngomujisi.

   Amusole nzila eeyi: Mbomuyaabubuzyibila bukkale bwanu bupya, amubikkile maano kuzintu nzyomukonzya kucita, kutali nzyomutakonzyi. Mutanoolyeezyanisyi abamwi naa kuyeeya mbomwakabede kamutanaciswa. (Bagalatiya 6:4) Amulibikkile mbaakani nzyomukonzya kuzuzikizya. Eeci ciyoomugwasya kuzumanana kuzilanga kabotu zintu. (Tusimpi 24:10) Amubagwasye bamwi ikuti bukkale kabumuzumizya. Lukkomano luboola akaambo kakupa lulakonzya kumugwasya kutabikkila maano kupenzi lyanu.—Milimo 20:35.

 Bbaibbele litondezya kuti Jehova Leza a ulakonzya kubagwasya aabo bajisi malwazi. Nokuba kuti tatulangili kusilikwa munzila yamaleele, bakombi ba Leza balakonzya kutambula lugwasyo lwa Leza munzila eezyi zitobela:

 Luumuno. Jehova ulakonzya kutupa “luumuno . . . . lwiinda maano oonse.” (Bafilipi 4:6, 7) Luumuno oolu lulakonzya ikumugwasya muntu kutaciindizya kulibilika. Leza ulabapa luumuno aabo bapaila kulinguwe akwaamba zintu zibapa kulibilika.—1 Petro 5:7.

 Busongo. Jehova ulakonzya kutupa busongo kutegwa tucikonzye kusala kabotu. (Jakobo 1:5) Muntu ulakonzya kuba abusongo oobo ciindi naiya njiisyo zili mu Bbaibbele akuzitobela.

 Bulangizi bubotu bwakumbele. Jehova utusyomezya ciindi nokunoonyina “muntu naba omwe uukkala munyika uuyakwaamba kuti: ‘Ndaciswa.’” (Isaya 33:24) Bulangizi oobu bulabagwasya banji kuzumanana kuzilanga kabotu zintu nokuba kuti bajisi malwazi aakatazya.—Jeremiya 29:11, 12.