Isaya 33:1-24
33 Maawe kulinduwe, yebo oonyonyoona pele ootananyonyoonwa;+Yebo sikwaaba bamwi pele ootanaabwa!
Mboyoomanina buyo kunyonyoona, ayebo uyoonyonyoonwa.+
Mboyoomanina buyo kwaaba bamwi, ayebo uyakwaabwa.
2 O Jehova, kotufwida luzyalo.+
Swebo tulangila nduwe.
Koba janza lyesu*+ lyoonse cifwumofwumo,Inzya, koba lufwutuko lwesu muciindi camapenzi.+
3 Bantu balatija nobamvwa kundindima kwajwi.
Imasi alamwaika yebo nonyamuka.+
4 Zintu nzyomwasaala ziyoobungikwa mbubonya cikwikwi cinyonyoona mbocibungana;Bantu bayoocilundukila mbubonya mbuli cikwikwi.
5 Jehova uyoosumpuka,Nkaambo ukkede kujulu.
Uyoozuzya Ziyoni alubeta luluzi alimwi abululami.
6 Walo nguusitikizya ziindi zyako;Kuvwula kwalufwutuko,+ busongo, luzyibo alimwi akuyoowa Jehova+
—Oolu ndolubono lwakwe.
7 Amubone! Bantu babo basicamba mbobasyoma balalila mumigwagwa;Batumwa baluumuno baloomba kulila.
8 Bantu baitija migwagwa mipati;Taakwe muntu uuciinda munzila.
Sinkondo wacijaya cizuminano;Waikaka minzi;Kunyina muntu ngwalemeka.+
9 Nyika ilalila* alimwi yanyana.
Lebano wafwa nsoni;+ wabola.
Saroni waba buyo mbuli cimpayuma,Alimwi masamu aaku Basani aku Karimeli akunkumuka matewo.+
10 Jehova wati, “Lino ndilanyamuka,Ndilapa kuti ndisumpuke;+Ndilapa kuti ndilemekwe.
11 Nywebo mumita bwizu buyumu akutumbuka zisiko zyabwizu.
Muuya wanu nobeni uyoomuumpa cakumaninina mbubonya mbuli mulilo.+
12 Alimwi bantu bayooba mbuli mulambo* waumpwa.
Mbubonya mbuli mamvwa aagonkedwe, bayakuumpwa amulilo.+
13 Nywebo nomuli kule ooko, amuswiilile ncenditiicite!
Anywebo nomuli afwaafwi, amuzyibe nguzu zyangu!
14 Basizibi bamu Ziyoni baliyoowede kapati;+Kukankama kulibajisi basiluleyo, baamba kuti:
‘Nguni akati kesu uukonzya kukkala ikuli mulilo uumpa cakumaninina?+
Nguni akati kesu uukonzya kukkala afwaafwi amabangabanga aamulilo aatamani?’
15 Imuntu uuzumanana kweenda mubululami,+Iwaamba ciluleme,+Uukaka mpindu iijanwa cabumpelenge, kwiinda mukuunina bamwi,Uulesya maanza aakwe kutegwa atatambuli cisinkamulomo,+Uusinka matwi aakwe kutegwa ataswiilili makanze aakutila bulowa,Alimwi uufwinya kutegwa ataboni cintu cibi,
16 Ngonguwe uuyookkala mujulu;Mayubilo aakwe aakwabilidwe* ayooba mumampangala,Uyoopegwa cakulya cakwe,Alimwi maanzi aakwe taakamani pe.”+
17 Meso aako ayoobona mwami mubweebesi bwakwe;Ayoobona nyika iili kule.
18 Mumoyo wako uyooyeeya* zintu ziyoosya akwaamba kuti:
“Ino uli kuli mulembi?
Uli kuli ooyo wakali kupima mali aamutelo?+
Uli kuli ooyo wakali kubala ngazi?”
19 Tokababoni limbi bantu basicinguni,Bantu baambaula mwaambo muyumu uukatazya kumvwa,Ibaambaula mulaka mweenzu ngotakonzyi kumvwa.+
20 Kolanga Ziyoni! Imunzi motucitila mapobwe eesu!+
Meso aako ayoobona Jerusalemu busena bwakukkala cakuliiba,Itente litakooyooswenzyegwa.+
Nembe zyatente lyanguwo tazikasimpulwi pe,Alimwi kunyina ntambo zyanguwo iziyoodunsulwa.
21 Pele ooko Jehova, ooyo Mupati,Uyootubeda busena bwamilonga, bwamigelo yamaanzi mipati,Mulimbubo tamukaindi mato aakwasulwa ankasi zinji,Alimwi taakwe mato mapati aayakwiinda mumo.
22 Nkaambo Jehova ngo Mubetesi wesu,+Jehova ngo Sikutupa Mulawo,+Jehova ngo Mwami wesu;+Ngonguwe uuyootufwutula.+
23 Ntambo zyako ziyootebela;Tazikonzyi kwiimika cisamu casaili lyabwato nokuba kutandabula saili lyabwato.
Aciindi eeco zintu zinji zyakasaalwa ziyakwaabanwa;Nobaba balema bayoobweza zintu zinji zisaalwa.+
24 Alimwi taakwe muntu naba omwe uukkala munyika uuyakwaamba kuti: “Ndaciswa.”+
Bantu bakkala munyika eeyo bayoolekelelwa zibi zyabo.+
Bupanduluzi buyungizyidwe
^ Naa “nguzu zyesu.”
^ Naa ambweni, “yayuma.”
^ Bamwi baamba kuti “mutuba.”
^ Naa “Mayubilo aakwe aasumpukide.”
^ Naa “uyoozinzibala kuyeeya.”
