Jeremiya 29:1-32
29 Aaya ngamajwi aakali mulugwalo musinsimi Jeremiya ndwaakatuma kuzwa ku Jerusalemu kubapati bakasyeede akati kabantu ibakatolwa mubuzike, kubapaizi, kubasinsimi alimwi akubantu boonse, aabo Nebukadinezara mbaakatola mubuzike kuzwa ku Jerusalemu kuya ku Babuloni,
2 nkokuti ciindi Mwami Jekoniya+ antoomwe abanyina mwami,+ nkumekume zyamuŋanda yamwami, basilutwe baku Juda aku Jerusalemu, basyaabupampu alimwi abafwuzi* kabaunkide kale kuzwa ku Jerusalemu.+
3 Wakatumizya lugwalo oolo kwiinda mumaanza aa Elasa mwana wa Safani+ a Gemariya mwana wa Hilikiya, aabo Mwami Zedekiya+ wa Juda mbaakatuma ku Babuloni ku Mwami Nebukadinezara wa Babuloni. Lwakali kwaamba kuti:
4 “Mboobu mbwaamba Jehova wamakamu, Leza wa Israyeli, kubantu boonse bakatolwa mubuzike, aabo mbondakapa kuti batolwe mubuzike ku Babuloni kuzwa ku Jerusalemu,
5 ‘Amuyake maanda akukkala mulingawo. Amulime myuunda akulya micelo yanjiyo.
6 Amukwate bamakaintu akuzyala bana basankwa abasimbi; amubajanine bamakaintu bana banu basankwa akukwasya bana banu basimbi, kutegwa abalo bazyale bana basankwa abasimbi. Amuvwule ooko, mutaceyi pe.
7 Amuyandaule luumuno lwamunzi wacisi ooko nkondamutola mubuzike, alimwi amuupailile kuli Jehova, nkaambo kwiinda muluumuno lwanguwo anywebo muyooba aluumuno.+
8 Nkaambo mboobu mbwaamba Jehova wamakamu, Leza wa Israyeli: “Batamweeni pe basinsimi abasondi banu aabo ibali akati kanu,+ alimwi mutaziswiilili ziloto zyabo eezyo nzyobalota.
9 Nkaambo ‘bamusinsimina zyakubeja muzina lyangu. Tiindabatuma pe,’+ mbwaamba Jehova.”’”
10 “Nkaambo mboobu mbwaamba Jehova, ‘Yaakukkwana myaka iili 70 kamuli ku Babuloni, ndiyoomuyeeya nywebo,+ eelyo ndiyoozuzikizya cisyomezyo cangu kwiinda mukumupilusya kubusena obuno.’+
11 “‘Nkaambo ndiliizyi kabotu mizeezo njendiyeeya kujatikizya ndinywe,’ mbwaamba Jehova, ‘mizeezo yakumuletela luumuno, kutali mapenzi pe,+ kumupa buumi bwakumbele bubotu alimwi abulangizi.+
12 Lino muyoondiita alimwi muyooboola akupaila kulindime, eelyo ndiyoomuswiilila.’+
13 “‘Muyoondiyandaula akundijana,+ nkaambo muyoondiyandaula amyoyo yanu yoonse.+
14 Mebo ndiyoopa kuti mundijane,’+ mbwaamba Jehova. ‘Alimwi ndiyoobunganya bantu banu baangidwe akumuyobolola antoomwe kuzwa kumasi oonse alimwi akumasena oonse ooko nkondakamumwaila,’+ mbwaamba Jehova. ‘Mpoonya ndiyoomupilusya kubusena ooko nkomwakabede ciindi nendakapa kuti mutolwe mubuzike.’+
15 “Pele nywebo mwaamba kuti, ‘Jehova watubusyila basinsimi mu Babuloni.’
16 “Nkaambo mboobu mbwaamba Jehova kumwami uukkede acuuno cabwami ca Davida+ akubantu boonse bakkala mumunzi ooyu, ibanabokwanu aabo mbomwatakaunka limwi mubuzike,
17 ‘Mboobu mbwaamba Jehova wamakamu: “Amubone, ndilabatumina panga, nzala alimwi acilwazi,+ alimwi ndilabapa kuba mbuli nkuyu zibolede* izibi kapati cakuti tazikonzyi kuligwa.”’+
18 “‘Alimwi ndiyoobatandaanya apanga,+ nzala alimwi acilwazi, alimwi ndiyoobapa kuba cintu cigambya kumami oonse aamunyika,+ kuba cintu cisinganizyidwe, cilamya, cakusibila mulosi+ alimwi cisampaulwa akati kamasi oonse ooko nkondibamwaila,+
19 akaambo kakuti tiibaswiilila majwi aangu aayo ngondakabatumina kwiinda mubabelesi bangu basinsimi,’ mbwaamba Jehova, ‘aabo mbondakali kutuma cakwiinduluka-induluka.’*+
“‘Pele nywebo tiimwaswiilila pe,’+ mbwaamba Jehova.
20 “Aboobo, amumvwe jwi lya Jehova, nywebo nobantu nyoonse nomuli mubuzike, nywebo mbondakatanda kuzwa ku Jerusalemu kuya ku Babuloni.
21 Mboobu mbwaamba Jehova wamakamu, Leza wa Israyeli kujatikizya Ahabu mwana wa Kolaya akujatikizya Zedekiya mwana wa Maaseya, aabo ibamusinsimina zyakubeja muzina lyangu,+ ‘Amubone, ndilabaaba mumaanza aa Mwami Nebukadinezara* wa Babuloni, eelyo uyoobajaya kamulangilila.
22 Mpoonya eeco iciyoobacitikila ciyooba majwi aakusinganya ngobanoobelesya bana Juda boonse aabo ibali mubuzike mu Babuloni, kabati: “Jehova akucite kuba mbuli Zedekiya ambuli Ahabu, aabo mwami wa Babuloni mbaakayoka mumulilo!”
23 nkaambo bacita zintu zisesemya mu Israyeli,+ bacita bumambe abamakaintu babeenzinyina alimwi akwaamba majwi aakubeja muzina lyangu aayo ngondatakabalailila.+
“‘“Mebo ndime ndaazyi makani aaya alimwi ndime kamboni,”+ mbwaamba Jehova.’”
24 “Awalo Semaya+ waku Nehelami ukamwaambile kuti,
25 ‘Mboobu mbwaamba Jehova wamakamu, Leza wa Israyeli: “Akaambo kakuti muzina lyako yebo wakatuma magwalo kubantu boonse bali ku Jerusalemu, kuli Zefaniya+ mwana wa Maaseya imupaizi alimwi akubapaizi boonse, aajisi majwi aakuti,
26 ‘Jehova wakubikka kuba mupaizi yebo mubusena bwa Jehoyada mupaizi, kuti ube mulangizi waŋanda ya Jehova, kuti kolanganya muntu woonse uusondokede uucita mbuli kuti musinsimi, alimwi akumubikka muziliba zyakumaulu aziliba zyakumutwe amaanza;*+
27 aboobo ino nkaambo nzi ncootamunyemena Jeremiya waku Anatoti,+ ooyo uucita mbuli kuti musinsimi kulindinywe?+
28 Nkaambo walo mane wakatutumina alugwalo okuno ku Babuloni, ilwakajisi majwi aakuti: “Muciliko, tamukapiluki lino pe! Amuyake maanda akukkala mulingawo. Amulime myuunda akulya micelo yanjiyo,+—”’”’”
29 Lino + mupaizi Zefaniya naakalubala lugwalo oolu mumatwi aamusinsimi Jeremiya,
30 ijwi lya Jehova lyakamusikila Jeremiya, kaliti:
31 “Kobatumina majwi bantu boonse aabo bali mubuzike aakuti, ‘Mboobu mbwaamba Jehova kujatikizya Semaya waku Nehelami: “Akaambo kakuti Semaya wamusinsimina nywebo, nokuba kuti mebo tiindakamutuma, alimwi wasola kumupa kuti musyome zyakubeja,+
32 nkokuti mboobu mbwaamba Jehova, ‘Amubone, ndilamusubula Semaya waku Nehelami antoomwe alunyungu lwakwe. Takukabi muntu naba omwe walunyungu lwakwe uuyoozumanana kupona akati kabantu aaba, alimwi takabuboni bubotu mbondiyoocitila bantu bangu,’ mbwaamba Jehova, ‘nkaambo wayunga bantu kuzangila Jehova.’”’”
Bupanduluzi buyungizyidwe
^ Naa ambweni, “abasikuyaka bwaanda.”
^ Naa ambweni, “zyaandukide.”
^ Mu Chihebrayo, “kandifwuma kubuka akubatuma.”
^ Mu Chihebrayo, “Nebukadirezara,” nzila imbi mbolilembwa zina eeli.
^ Naa “nsimbi zyamumukosi.”
