Kasimpe Kajatikizya Leza Alimwi a Jesu

AMULIZYE

Nokuba kuti bantu bakomba baleza banji, kuli buyo Leza mwini-mwini omwe. (Johane 17:3) Ngo “Mupati Kwiinda,” Mulengi wazintu zyoonse alimwi Ngokasensa kabuumi boonse. Ngonguwe ngotweelede kukomba alikke.—Daniele 7:18; Ciyubunuzyo 4:11.

Ino Leza Nguni?

Zina lya Leza lilajanika mumalembe aakusaanguna ZIINDI ZIBALILWA KU 7,000

JEHOVA Ndezina lya Leza

MWAMI, LEZA, TAATA—Mazina Aamwi Aabulemu aa Jehova

Ino Leza Nguni Zina? Leza mwini kumugama waamba kuti: “Ndime Jehova. Eeli ndezina lyangu.” (Isaya 42:8) Zina lya Leza lilajanika ziindi zibalilwa ku 7,000 mu Bbaibbele. Nokuba boobo, muma Bbaibbele manji zina eeli bakaligusya akubikka mazina aabulemu mbuli lyakuti “Mwami.” Leza uyanda kuti mube balongwe bakwe, aboobo umukulwaizya ‘kwiita zina lyakwe.’—Intembauzyo 105:1.

Mazina Aabulemu aa Jehova. Bbaibbele lyaamba Jehova kwiinda mukubelesya mazina aabulemu mbuli lyakuti “Leza,” “Singuzuzyoonse,” “Mulengi,” “Taata,” “Mwami” alimwi alyakuti “Mupatikampatila.” Mipailo minji ililembedwe mu Bbaibbele mwalo Jehova mwaitwa azina lyabulemu alimwi azina lyakwe limugeme lyakuti, Jehova.—Daniele 9:4.

Mbwabede Leza. Leza muuya. (Johane 4:24) Bbaibbele lyaamba kuti “kunyina muntu wakamubona kale Leza.” (Johane 1:18) Kuyungizya waawo, lilatwaambila kujatikizya mbwalimvwa. Bantu balakonzya kumupa kuusa naa kumupa ‘kukondwa.’ —Tusimpi 11:20; Intembauzyo 78:40, 41.

Bube bwa Leza Butaliboteli. Leza tasalululi bantu bamisyobo yoonse alimwi ibazwa mubukkale bwiindene-indene. (Milimo 10:34, 35) Kunze lyaboobo, “[ngu]siluse alimwi silweetelelo, uutafwambaani kukalala alimwi uuzwide luyando lutamani akasimpe.” (Kulonga 34:6, 7) Nokuba boobo, kuli bube bone bwa Leza ibulibedelede kapati.

Nguzu. Mbwaanga ngu “Leza Singuzuzyoonse,” ulijisi nguzu zitalivwulili zyakucita cintu cili coonse ncaasyomezya.—Matalikilo 17:1.

Busongo. Leza musongo kwiinda muntu uuli woonse. Akaambo kaceeci, Bbaibbele limwaamba kuti “ngomusongo alikke.”—Baroma 16:27.

Bululami. Leza lyoonse ucita zintu ziluzi. Nzila zyakwe ‘zililondokede,’ alimwi ‘taciti zitaluleme.’—Deuteronomo 32:4.

Luyando. Bbaibbele lyaamba kuti “Leza nduyando.” (1 Johane 4:8) Leza tagoleli buyo akutondezya luyando, pele lwakwe kumugama nduyando. Bube oobu bulibedelede mbobumweendelezya muzintu zyoonse nzyacita, alimwi bulatugwasya munzila zinji.

Cilongwe Ncajisi Leza Abantu. Leza ngu Taateesu wakujulu siluyando. (Matayo 6:9) Ikuti twamusyoma, tulakonzya kuba balongwe bakwe. (Intembauzyo 25:14) Mane buya Leza umutamba kuti muswene kulinguwe kwiinda mumupailo alimwi ‘akuwaala makatazyo aanu oonse kulinguwe.’—1 Petro 5:7; Jakobo 4:8.

Ino Leza a Kristo Baindene Buti?

Jesu Mwana wa Leza. Jesu muntu uulibedelede, nkaambo ngomuntu alikke iwakalengwa a Leza cacigaminina. Nkakaambo kaako Bbaibbele limwaamba kuti Mwana wa Leza. (Johane 20:31) Naakamana kulenga Jesu, Jehova wakamubelesya mwanaakwe mutaanzi kuzyalwa kali “mubelesi uucibwene” kulenga zintu zyoonse kubikkilizya abantu.—Tusimpi 8:30, 31; Bakolose 1:15, 16.

Jesu Kristo kunyina naakalitaminina kuba Leza. Muciindi caboobo, wakaamba kuti: “Mebo . . . ndili mwiiminizi uuzwa kuli [Leza], alimwi walo nguwakandituma.” (Johane 7:29) Ciindi naakali kwaambaula aumwi wabasikwiiya bakwe wakaamba Jehova kuti “Taata alimwi a Bauso” akuti “Leza wangu a Leza wanu.” (Johane 20:17) Naakafwa Jesu, Jehova wakamubusya kubuumi bwakujulu mpoonya akumupa nguzu zinji kali kujanza lyakwe lyalulyo.—Matayo 28:18; Milimo 2:32, 33.

Jesu Kristo Inga Wamugwasya Kuba Mulongwe wa Leza

Jesu wakaboola anyika kuzootuyiisya kujatikizya Bausyi. Jehova lwakwe kumugama wakaamba boobu kujatikizya Jesu: “Ooyu Mwanaangu ngweyandisya. Amumuswiilile.” (Marko 9:7) Jesu ulimuzyi kabotu Leza kwiinda muntu umbi uuli woonse. Wakati: “Kunyina uumuzyi kabotu Taata ccita Mwana alikke, alimwi ayooyo kufwumbwa Mwana ngwaayanda kuyubunwida.”—Luka 10:22.

Jesu ulabutondezya bube bwa Leza munzila iilondokede. Jesu wakabwiiya cakumaninina bube bwabausyi cakuti wakaamba kuti: “Kufwumbwa ooyo wandibona wamubona awalo Taata.” (Johane 14:9) Jesu wakabagwasya bantu kuswena kuli Leza kwiinda mukwiiya luyando lwa Bausyi muzintu nzyaakali kwaamba akucita. Wakaamba kuti: “Ndime nzila, kasimpe alimwi abuumi. Kunyina uuboola kuli Taata ccita kuti wainda mulindime.” (Johane 14:6) Alimwi wakaamba kuti: ‘Bakombi bakasimpe bayoomukomba Taata mumuuya amukasimpe, nkaambo mubwini bantu bali boobu mbayandaula Taata kuti bamukombe.’ (Johane 4:23) Amuciyeeyele buyo eeco! Jehova uyandaula bantu bali mbuli ndinywe nomuyanda kwiiya kasimpe kujatikizya nguwe.