Johane 20:1-31
20 Mubuzuba bwakusaanguna bwansondo eeyo Mariya Magadalene wakafwuma+ kusika kucuumbwe, ansi kaacisiya-siya, pele wakabona kuti bbwe lyakaligusyidwe kale kucuumbwe.+
2 Aboobo wakaboola kazyaabubalika kuli Simoni Petro akuli sikwiiya umbi, ooyo Jesu ngwaakali kuyandisya,+ eelyo wakati kulimbabo: “Bamugusya Mwami mucuumbwe,+ pele tatuzyi nkobamulazika.”
3 Mpoonya Petro asikwiiya umbi ooyo bakanyamuka akuya kucuumbwe.
4 Boonse bobilo bakatalika kubalika antoomwe, pele sikwiiya umbi ooyo wakabalika kapati akumusiya Petro, eelyo wakasaanguna kusika kucuumbwe.
5 Naakasondela mukati, wakabona buyo milembo+ ansi pele tanaakanjila.
6 Mpoonya Simoni Petro awalo wakasika kazyaabumutobela, eelyo wakanjila mucuumbwe. Alimwi wakaibona milembo ansi.
7 Cisani eeco icakali kumutwe wakwe tiicakali antoomwe amilembo eeyo imbi, pele cakalivwungidwe cilikke mubusena bomwe.
8 Mpoonya sikwiiya umbi ooyo iwakasaangunide kusika kucuumbwe awalo wakanjila mukati, eelyo wakabona alimwi wakasyoma.
9 Nkaambo tiibakaningalumvwisya lugwalo lwaamba kuti wakeelede kubuka kuzwa kubafwu.+
10 Aboobo basikwiiya bakajokela kuminzi yabo.
11 Pele Mariya wakaliimvwi anze aacuumbwe kalila. Mpoonya kacilila, wakasondela mucuumbwe,
12 eelyo wakabona bangelo bobilo+ basamide zisani zituba kabakkede umwi kumutwe aumbi kumaulu aawo mubili wa Jesu mpowakalede.
13 Mpoonya bakati kulinguwe: “Omukaintu, ino ulila nzi?” Wakati kulimbabo: “Bamugusya Mwami wangu, pele tandizyi nkobamuzikkila.”
14 Naakamana kwaamba boobo, wakacenguluka akubona Jesu kaimvwi, pele tanaakazyiba kuti wakali Jesu.+
15 Jesu wakamubuzya kuti: “Omukaintu, ino ulila nzi? Nguni ngoyandaula?” Lino walo kayeeya kuti wakali mubelesi wamumuunda, wakati kulinguwe: “Ikuti naa waubweza mubili wakwe, kondaambila nkowauzikka, nkaubweze.”
16 Jesu wakati kulinguwe: “Mariya!” Naakacenguluka, wakati kulinguwe mu Chihebrayo: “Rabboni!” (nkokuti “Mwiiyi!”)
17 Jesu wakati kulinguwe: “Koleka kundijatilila, nkaambo tandinaunka kujulu kuli Taata. Pele koya kubakwesu+ ukabaambile kuti, ‘Ndilaunka kujulu kuli Taata+ alimwi a Bauso, kuli Leza wangu a Leza+ wanu.’”
18 Mariya Magadalene wakaboola akuleta mulumbe kuli basikwiiya kati: “Ndamubona Mwami!” Eelyo wakabaambila nzyaakamwaambila.+
19 Lino nokwakaba kumangolezya mubuzuba mbubonya oobo bwakusaanguna bwansondo, zijazyo kazikkiidwe oomo mobakabede basikwiiya akaambo kakuyoowa ba Juda, Jesu wakasika akwiima akati kabo akubaambila kuti: “Amube aluumuno.”+
20 Naakamana kwaamba boobu, wakabatondezya maanza aakwe alimwi amumabambo.+ Mpoonya basikwiiya bakakondwa kumubona Mwami.+
21 Jesu wakabaambila alimwi kuti: “Amube aluumuno.+ Mbubonya Taata mbwaakandituma,+ andime ndilamutuma.”+
22 Naakamana kwaamba boobu wakabafwulida muya akubaambila kuti: “Amutambule muuya uusalala.+
23 Ikuti mwamulekelela zibi muntu uuli woonse, zilamana; ikuti tiimwamulekelela zibi muntu uuli woonse, zilacaala.”
24 Pele Tomasi,+ umwi wabali Kkumi Ababili, iwakali kwiitwa kuti Wamaanga, tanaakali ambabo ciindi Jesu naakaboola.
25 Aboobo basikwiiya bambi bakali kumwaambila kuti: “Twamubona Mwami!” Pele wakati kulimbabo: “Ccita kuti ndizibone zilonda* zyampikili mumaanza aakwe akubikka munwe wangu muzilonda zyampikili alimwi akubikka janza lyangu mumabambo aakwe,+ nsikoosyoma pe.”
26 Lino kwiinde mazuba aali lusele, basikwiiya bakwe alimwi bakali muŋanda, awalo Tomasi wakali ambabo. Jesu wakanjila, nokuba kuti zijazyo zyakalikkiidwe, eelyo wakaima akati kabo akwaamba kuti: “Amube aluumuno.”+
27 Mpoonya wakati kuli Tomasi: “Bikka munwe wako aawa ubone maanza aangu, alimwi leta janza lyako akulibikka mumabambo aangu. Koleka kudooneka* utalike kusyoma.”
28 Tomasi wakamwiingula kuti: “O Mwami wangu, O Leza wangu!”
29 Jesu wakati kulinguwe: “Sena wasyoma lino akaambo kakuti wandibona? Balikkomene aabo ibasyoma kabatanabona.”
30 Masimpe, Jesu wakacita azimbi zitondezyo zinji kuli basikwiiya bakwe, izitalembedwe mubbuku eeli.+
31 Pele eezyi zyalembwa kutegwa musyome kuti Jesu ngo Kristo Mwana wa Leza, akuti akaambo kakusyoma mube abuumi kwiinda muzina lyakwe.+
