Ciyubunuzyo 4:1-11
4 Nozyakamana zintu eezyi ndakalanga akubona mulyango uujalukide kujulu, mpoonya ijwi lyakusaanguna ndindakamvwa kalyaambaula andime lyakali kulimvwisya mbuli kulila kwamweembo, lyakati: “Tanta uboole kuno, eelyo ndilakutondezya zintu zyeelede kucitika.”
2 Mpoonya aawo ndakaba munguzu zyamuuya, eelyo ndakabona cuuno cabwami aabusena bwancico kujulu, alimwi acuuno cabwami eeco kuli umwi wakakkede mpawo.+
3 Lino ooyo iwakakkede mpawo wakali kulibonya mbuli bbwe lyajasipa+ ambuli bbwe lyaasardiyo,* alimwi cuuno cabwami cakazingulukidwe fulicoongo uulibonya mbuli bbwe lyaemarodi.+
4 Mpoonya ikuzinguluka cuuno cabwami eeco kwakali zyuuno zyabwami zili 24, alimwi azyuuno zyabwami eezyi ndakabona baalu bali 24 + ibakakkede alinzizyo kabasamide zisani zituba alimwi kumitwe bakasamide misini yangolida.
5 Lino kucuuno cabwami eeco kwakali kuzwa ndabo,+ imajwi alimwi amizumo;+ alimwi kwakali malambe aamulilo aali ciloba aayaka kumbele lyacuuno cabwami, eelyo aaya aiminina myuuya ya Leza iili ciloba.+
6 Kumbele lyacuuno cabwami kwakali icakali kulibonya mbuli lwizi luŋaima mbuli gilazi,+ mbuli bbwe libalangala.
Mpoonya akati kacuuno cabwami* alimwi akuzinguluka cuuno cabwami kwakali zilenge zyuumi zyone+ izijisi meso koonse-koonse, kumbele akusyule.
7 Cilenge cuumi cakusaanguna cakali kulibonya mbuli syuumbwa,+ cilenge cuumi cabili cakali kulibonya mbuli mupoho+ uucili mwana, cilenge cuumi catatu+ cakajisi busyu bulibonya mbuli bwamuntu, mpoonya cilenge cuumi cane+ cakali kulibonya mbuli sikwaze wuuluka.+
8 Lino ikujatikizya zilenge zyuumi zyone, cimwi acimwi cakajisi mababa aali cisambomwe; mababa aaya akajisi meso koonse-koonse, atala alimwi amukati.+ Alimwi syikati amasiku tazileki pe kwaamba kuti: “Ulasalala, ulasalala, ulasalala Jehova*+ Leza, Singuzuzyoonse, ooyo wakaliko, uuliko alimwi uuboola.”+
9 Kufwumbwa leelyo zilenge zyuumi eezyi nozipa bulemu alulemeko alimwi akulumba kuli yooyo uukkede acuuno cabwami, ooyo uupona lyoonse mane kukabe kutamani,+
10 ibaalu bali 24 + balaliwaala ansi kumbele lyayooyo uukkede acuuno cabwami akumukomba ooyo uupona lyoonse mane kukabe kutamani, alimwi bawaala misini yabo kumbele lyacuuno cabwami, kabaamba kuti:
11 “Uleelela, Jehova,* O Leza wesu, ikutambula bulemu+ alulemeko+ alimwi anguzu,+ nkaambo nduwe wakalenga zintu zyoonse,+ alimwi akaambo kakuyanda kwako zyakabako alimwi zyakalengwa.”
Bupanduluzi buyungizyidwe
^ Naa “bbwe liyandisi lisalala pyu.”
^ Naa “Mpoonya mukati antoomwe acuuno cabwami.”
^ Amubone Makani Aayungizyidwe A5.
^ Amubone Makani Aayungizyidwe A5.