Johane 1:1-51
1 Kumatalikilo Ijwi+ wakaliko, alimwi Ijwi wakali a Leza,+ alimwi Ijwi wakali leza.*+
2 Ooyu kumatalikilo wakali aa Leza.
3 Zintu zyoonse zyakaba kwiinda mulinguwe,+ alimwi kunyina cintu nociba comwe cakaba kakunyina nguwe.
Eeco icakaba
4 kwiinda mulinguwe bwakali buumi, alimwi buumi bwakali mumuni wabantu.+
5 Alimwi mumuni ulamunika mumudima,+ pele mudima tiiwauzunda mumuni pe.
6 Kwakali muntu wakatumwa kuba mwiiminizi wa Leza; izina lyakwe wakali Johane.+
7 Ooyu muntu wakaboola kali kamboni, kuti azikupe bumboni bwamumuni,+ kutegwa bantu bamisyobo yoonse basyome kwiinda mulinguwe.
8 Tanaakali ngomumuni ooyo pe,+ pele wakaboola kuti ape bumboni kujatikizya mumuni ooyo.
9 Imumuni wini-wini uumunikila bantu bamisyobo yoonse wakali afwaafwi kusika munyika.+
10 Wakaliko munyika,+ alimwi nyika yakaba kwiinda mulinguwe,+ pele nyika tiiyakamuzyiba.
11 Wakaboola kucisi cokwabo, pele bantu bokwabo tiibakamutambula pe.
12 Pele aabo boonse ibakamutambula wakabapa nguzu zyakuba bana ba Leza,+ nkaambo bakali kusyoma muzina lyakwe.+
13 Alimwi bakazyalwa ikutali kwiinda mubulowa naa kwiinda mukuyanda kwabazyali naa kwiinda mukuyanda kwamwaalumi, pele mukuyanda kwa Leza.+
14 Aboobo Ijwi wakaba muntu*+ akukkala akati kesu, alimwi twakabubona bulemu bwakwe, ibulemu bwasimuzyalwaalikke+ kuli bausyi; alimwi wakazwide luzyalo lwa Leza akasimpe.
15 (Johane wakapa bumboni kujatikizya nguwe, inzya, wakoompolola kati: “Ooyu ngonguwe ngondakali kwaamba nindakaamba kuti, ‘Ooyo uuboola musyule lyangu waunka kumbele lyangu, nkaambo wakaliko mebo kanditanaba.’”)+
16 Nkaambo kuzwa kuli zyeezyo nzyajisi mubunji, toonse twakatambula luzyalo lwa Leza lulibedelede ilutamani.
17 Nkaambo Mulawo wakapegwa kwiinda muli Musa,+ luzyalo lwa Leza+ akasimpe zyakaba kwiinda muli Jesu Kristo.+
18 Kunyina muntu wakamubona kale Leza nociba ciindi comwe pe;+ ccita leza simuzyalwaalikke+ ooyo uuli kumbali lya Usyi*+ ngonguwe wakamupandulula.+
19 Oobu mbobumboni mbwaakapa Johane ciindi iba Juda nobakatuma bapaizi aba Levi kulinguwe kuzwa ku Jerusalemu kuyoomubuzya kuti: “Ino nduwe ni?”+
20 Eelyo wakalyaambilila cakutasisa, wakazumina kuti: “Mebo tandili Kristo pe.”
21 Alimwi bakamubuzya kuti: “Ino nduwe ni? Sena nduwe Elija?”+ Wakavwiila kuti: “Tandili nguwe.” “Sena ndonduwe Musinsimi?”+ Wakavwiila kuti: “Peepe!”
22 Aboobo bakamubuzya kuti: “Ino nduwe ni? Kotwaambila kutegwa tukabape bwiinguzi aabo batutuma. Ino waamba kuti nduwe ni?”
23 Wakati: “Ndime jwi lyayooyo woongolola munkanda kuti, ‘Amululamike nzila ya Jehova,’*+ mbubonya bwakaamba musinsimi Isaya.”+
24 Lino aabo ibakatumwa bakazwide kuba Farisi.
25 Aboobo bakamubuzya mubuzyo kabati: “Ino nkaambo nzi ncobbapatizya ikuti kotali Kristo naa Elija antela Musinsimi ooyo?”
26 Johane wakabavwiila kuti: “Mebo ndibbapatizya mumaanzi. Akati kanu kwiimvwi muntu ngomutazyi,
27 ooyo uuboola musyule lyangu, ngonditeeleli kwaangununa ntambo zyampato zyakwe.”+
28 Eezyi zintu zyakacitikila ku Betaniya mutala lya Jordano, ooko Johane nkwaakali kubbapatizyila.+
29 Buzuba bwakatobela wakabona Jesu kaboola kulinguwe, mpoonya wakaamba kuti: “Amubone, Mwanaambelele+ wa Leza ooyo uugusya cibi+ canyika!+
30 Ooyu ngonguwe ngundakaamba kuti: ‘Musyule lyangu kuboola muntu waunka kumbele lyangu, nkaambo wakaliko mebo kanditanaba.’+
31 Andime tiindakamuzyi pe, pele kaambo nkindakaboolela kandibbapatizya mumaanzi nkakuti ayubununwe kuba Israyeli.”+
32 Johane awalo wakapa bumboni, kati: “Ndakabona muuya kuuseluka mbuli nziba kuzwa kujulu, alimwi wakakkala alinguwe.+
33 Andime tiindakamuzyi, pele ngoonya Ooyo iwakandituma kuti kandibbapatizya mumaanzi wakandaambila kuti: ‘Ooyo ngoyoobona kuti muuya waseluka akukkala alinguwe,+ ooyu ngonguwe uubbapatizya mumuuya uusalala.’+
34 Alimwi ndakalibonena, eelyo ndakapa bumboni bwakuti ooyu Mwana wa Leza.”+
35 Buzuba bwakatobela, Johane wakaliimvwi abasikwiiya bakwe bobilo,
36 eelyo naakabona Jesu keenda, wakati: “Amubone, Mwanaambelele+ wa Leza!”
37 Lino basikwiiya bakwe aabo bobilo nobakamumvwa kaamba boobu, bakamutobela Jesu.
38 Mpoonya Jesu wakacenguluka, eelyo naakabona kuti balamutobela, wakababuzya kuti: “Ino muyandaula nzi?” Bakati kulinguwe: “Rabbi (izina ilyaamba kuti “Mwiiyi” lyasandululwa), ino ukkala kuli?”
39 Wakabaambila kuti: “Kamuboola mubone.” Aboobo bakaunka akubona nkwaakali kukkala, eelyo bakakkala anguwe buzuba oobo; alimwi ciindi cakali afwaafwi kusika awoola lyakkumi.*
40 Andreya+ munyina wa Simoni Petro ngumwi wabaabo bobilo ibakamvwa nzyaakaamba Johane akumutobela Jesu.
41 Wakasaanguna kujana munyina, Simoni, akumwaambila kuti: “Twamujana Mesiya”+ (izina ilyaamba kuti “Kristo” lyasandululwa),
42 eelyo wakamutola kuli Jesu. Lino Jesu naakamulanga wakati: “Nduwe Simoni+ mwana wa Johane; unakwiitwa kuti Kefasi” (izina lisandululwa kuti “Petro”).+
43 Ibuzuba bwakatobela Jesu wakali kuyanda kuunka ku Galilaya. Mpoonya wakajana Filipo+ akumwaambila kuti: “Koba sikunditobela.”
44 Lino Filipo wakali kuzwa ku Betesaida, mumunzi mwakali kukkala Andreya a Petro.
45 Filipo wakajana Natanayeli+ akumwaambila kuti: “Twamujana ooyo ngwaakalemba Musa mu Mulawo uulembedwe amu Basinsimi: Jesu waku Nazareta, mwana wa Josefa.”+
46 Pele Natanayeli wakati kulinguwe: “Sena kuli cibotu cinga cazwa mu Nazareta?” Filipo wakati kulinguwe: “Koboola ubone.”
47 Jesu wakabona Natanayeli kaboola kulinguwe eelyo wakamwaamba kuti: “Amubone, muna Israyeli ncobeni uunyina lweeno.”+
48 Natanayeli wakamubuzya kuti: “Ino wakandizyibila kuli?” Jesu wakamwiingula kuti: “Katanakwiita Filipo, nowacili munsi lyamukuyu, ndalikubwene.”
49 Natanayeli wakavwiila kuti: “Rabbi, ncobeni uli Mwana wa Leza, uli Mwami wa Israyeli.”+
50 Jesu wakamubuzya kuti: “Sena wasyoma nkaambo ndakwaambila kuti ndalikubwene munsi lyamukuyu? Uyoobona zintu zipati kwiinda zyeezyi.”
51 Mpoonya wakamwaambila kuti: “Ncobeni nobaalumi nywebo ndimwaambila masimpe kuti, muyoobona julu kalijalukide alimwi abangelo ba Leza kabatanta kuya nkuko akuseluka kuboola ku Mwanaamuntu.”+
Bupanduluzi buyungizyidwe
^ Naa “mbuli Leza.”
^ Mu Chigiriki, “mubili wanyama”
^ Naa “kucamba ca Usyi.” Eeci caamba kuyandwa kapati.
^ Amubone Makani Aayungizyidwe A5.
^ Nkokuti, cakuma 4 koloko yakumazuba.