ካብ ሓደጋ እንተ ድሒንካ፡ ነቲ ኻልኦት ብእኡ ዝሓለፉ ሰባት ዚስምዖም ስምባድን ድንጻወን ድንጋረን ጭንቀትን ሃተፍተፍን ትርድኦ ኢኻ። ብዙሓት ብሓደጋ እተዳህሉን ዝጨነቖምን ሰባት፡ ብህይወት ምንባር ይጽልኦም እዩ።

ኣብ ህይወትካ ሓደጋ እንተ ኣጋጢሙካ፡ ንስኻ እውን ‘ህይወት ኣኺሉኒ እዩ’ ኢልካ ትሓስብ ትኸውን። ብህይወት ካብ ምንባር፡ ሞት ከም ዚሓይሽ እውን ትሓስብ ትኸውን። መጽሓፍ ቅዱስ ግና ብህይወት ምንባር ከም ዚሓይሽ፡ ንዝሓሸ መጻኢ እውን ጽኑዕ ተስፋ ኺህልወካ ኸም ዚኽእል ይገልጽ እዩ።

መክብብ 7:8፡ “ካብ መጀመርታ ነገርሲ መወዳእታኡ ይሓይሽ” ትብል። ድሕሪ ሓደጋ ናብ ንቡር ህይወትካ ኽትምለስ ከለኻ፡ ኣብ መጀመርታ ተስፋ ትቐብጽ ትኸውን። ኰይኑ ግና፡ ብዓቕሊ ህይወትካ ዳግም ክትሃንጽ ምስ ጀመርካ፡ ኵነታትካ እናተመሓየሸ ይኸይድ እዩ።

መጽሓፍ ቅዱስ ብዛዕባ እቲ ‘ደሃይ ብኽያት ኰነ ኣውያት ጭንቂ ደጊም ዘይስምዓሉ’ እዋን ይንበ እዩ። (ኢሳይያስ 65:19) ምድሪ ኣብ ትሕቲ መንግስቲ ኣምላኽ ናብ ገነት ምስ ተቐየረት፡ እዚ ትንቢት እዚ ኺፍጸም እዩ። (መዝሙር 37:11, 29) ሓደጋታት ነበርያ ነበረ ኪኸውን እዩ። ኵሉ እቲ ሕማቕ ተዘክሮታትን ስምዒታዊ ስቓይን ንሓዋሩ ኺድምሰስ እዩ፣ ከመይሲ፡ እቲ ዅሉ ዚኽእል ኣምላኽ፡ “እቲ ናይ ቀደም ኣይኪዝከርን፡ ኣብ ልቢ እውን ኣይኪመጽእን እዩ” ኢሉ ኣተስፍዩ እዩ።—ኢሳይያስ 65:17።

ሕስብ እሞ ኣብሎ፦ ፈጣሪና “ብሩህ መጻእን ተስፋን፡” ማለት ኣብ ትሕቲ ፍጹም ግዝኣት ኣምላኽ ዚህሉ ሰላማዊ ህይወት ኪህበካ ተዳልዩ ኣሎ። (ኤርምያስ 29:11) ብዛዕባ እዚ ሓቂ እዚ ምፍላጥካስ ብህይወት ምንባር ከም ዚሓይሽዶ ኣይገብሮን እዩ፧ እታ ኣብ መኽፈቲ ዓንቀጽ እተጠቕሰት ሳሊ፡ “ነቲ መንግስቲ ኣምላኽ ኣብ መጻኢ እትገብረልና ዅሉ ዜደንቕ ነገራት እንተ ዘኪርካ፡ ንሕሉፍ ክትርስዕን ንህሉው ኽትሰግሮን ኪሕግዝ ይኽእል እዩ” ትብል።

እሞ ደኣ ብዛዕባ እቲ መንግስቲ ኣምላኽ ንደቂ ሰብ ኣብ ቀረባ ግዜ እትገብሮ ነገራት ስለምንታይ ዘይትምሃር፧ ከምኡ ምግባርካ፡ ዋላ እውን ዘጋጠመካ ሓደጋ ዘስዕቦ ሳዕቤን እናሃለወ፡ ነቲ ኻብ ሓደጋ ናጻ ዝዀነ መጻኢ እናተጸበኻ ብህይወት ምንባር ዝሓሸ ጌርካ ኽትርእዮ ይሕግዘካ እዩ። ክሳዕ ሽዑ ድማ፡ መጽሓፍ ቅዱስ ነቲ ሓደጋ ዝሓደጎ ሳዕቤናት ክትጻወር ዜኽእል ግብራዊ መምርሒ ይህብ እዩ። ሒደት ኣብነታት እስከ ርአ።