Talily Soa Nisorate i Matio 9:1-38
-
Nagnasitragne lahilahy raike maleme ty Jesosy (1-8)
-
Nitoka i Matio ty Jesosy (9-13)
-
Fagnonteneagne miomba ty fifaliagne hanegne (14-17)
-
I anak’ampela i Jairoy; i ampela nitsapa ty rambo i akanjo i Jesosỳ (18-26)
-
Nagnasitragne goa naho moagne ty Jesosy (27-34)
-
Maro i vokatsey fa i mpiasay ro tsy ampe (35-38)
9 Nijogne agnate lakagne ao reke, le nandeha amy i tanàgne nipetraha’ey agne.
2 Naho fa niavy eo, le nisy lahilahy raike maleme zay nindese ze ndaty rezay tamy ty fandreagne tama’e teo. Naho fa nahatrea ty finoa iareo ty Jesosy, le hoe reke tamy i lahilahy malemey: “Mahereza anake! Voavela ty fahota’o.”
3 Le hoe i mpampianatse lalàna rey tagn’eretsere iareo agne: “Manivetive an’Agnahare ty lahy tia!”
4 Faie nihay i Jesosy ze eretsere iareo zay, le hoe reke tamy iareo: “Nagnino ie raty ty agn’eretsere’areo agneo?
5 Aia ohatse ty mora, ty mirehake tihoe ‘voavela ty fahota’o’ vao sa ty mirehake tihoe ‘mitsangana, le akia mandehana’?
6 Fa mba hahafantara’areo tie managne fahefagne hamela heloke an-tane etoy i Ana o ndatỳ...”, le hoe reke tamy i lahilahy malemey: “Mitsangana rehe, le andeso o fandrea’ò, le molia an-tragno’o agne.”
7 Le nitsangagne i lahilahỳ, le noly an-tragno’e agne.
8 Naho fa nitrea i vahoakey ze raha zay, le nigaga* iareo sady nagnomey voninahitse an’Agnahare, noho ireke nagnomey ze fahefagne zay hoahy o ndatio.
9 Naho fa niala teo ty Jesosy, le nahatrea lahilahy raike nitoboke tamy i birò famoriagne hetray ao. I Matio ty agnara’e. Le hoe reke tama’e: “Andao hagnorike ahy.” Le avy le nitsangagne ty Matio sady nagnorike aze.
10 Tafara izay, tamy i Jesosy nitoboke hihinagne an-tragno i Matio aoy, le nisy mpitake hetra maro naho mpanota niavy ty eo mba hiarake hihinagne ama’e naho i mpiana’e rey.
11 Faie naho fa nahita izay o Fariseò, le hoe iareo tamy i mpiana i Jesosy rey: “Nagnino i Mpagnanatse anareoy ie miarake mihinagne amo o mpitake hetrao naho o mpanotaò?”
12 Naho fa nirey i Jesosy zay, le hoe reke: “Tsy ty ndaty salama ro mipay dokotera fa ty ndaty marare.
13 Ianaro areke ty dika i raha nisaontsien’Andrianagnahare tihoey tie: ‘Ndaty mamindra fo ro teako fa tsy ndaty manao sorogne.’ Tsy hitoka o ndaty maregneo ty niaviako fa o mpanotao.”
14 Nimbama’e mbeo i mpiana i Jaona rey, le nagnontane aze tie: “Nagnino zahay naho o Fariseò ro mifaly hanegne, fa o mpiana’ò tsy mifaly hanegne?”
15 Le hoe ty Jesosy tamy iareo: “Tsy misy anto’e toko’e hampalahelo ty nama i mpagnengay naho mbe amy iareo eo i mpagnengay. Faie ho avy ty andro hampialagne aze amy iareo eo, le amy izay iareo vaho hifaly hanegne.
16 Tsy misy ndaty manakeke vorodea amy ty tapa-damba vaovao. Ty anto’e, horirite i tapa-damba vaovaoy i vorodeay, le vao mainke hindra i riatse ama’ey.
17 Tsy misy ndaty ka hagniligne divay vaovao amy ty siny holitse fa voroke. Satria naho manao izay iareo, le horiatse i siny holitsey sady hirarake an-tane eo i divaỳ, le i siny holitsey ka hosimba. Fa tsy maintsy siny holitse vaovao ro asia o ndatio divay vaovao, amy izay sambe tsy hosimba ndra i divaỳ ndra i siny holitsey.”
18 Tamy ireke mbe nirehake izaỳ, le nisy ndaty mpifehe sinagoga zay nimbama’e mbeo sady niankohoke tama’e teo. Hoe reke: “Fa mate zay i anak’ampelakoy satria fa heta’e ie nengako ao zay. Faie andao rehe hametra-tagnagne ama’e, amy izay reke hovelogne.”
19 Le nitsangagne ty Jesosy naho i mpiana’e rey, le nagnorike i lahilahỳ iareo.
20 Nisy ampela niazo ty lio lava tagnate ty 12 taogne zay, niharine i Jesosy boake afara’e ao, le nitsapa ty ramborambo i akanjo’ey
21 satria hoe reke tagn’eretsere’e agne: “Ndra i akanjo’ey avao aza ro tsapaeko, le hositragne raho.”
22 Nitolike ty Jesosy le nahatrea aze sady nirehake tie: “Ko matahotse anake, ty finoa’o ro nahasitragne azo.” Eo naho eo avao i ampelay le avy le nisitragne.
23 Naho fa niavy tan-tragno i mpifehe i sinagogay ao ty Jesosy, le nahatrea ndaty nitioke soly naho ndaty maro nangoihoy ty tagny.
24 Le hoe reke tamy iareo: “Miboaha agne nareo fa tsy raha mate o ajajao fa miroro.” Le nihehea iareo reke.
25 Naho fa niakatse i ndaty rey, le nilitse tamy ty tragno nisy ty fate i ajaja ampelay ao ty Jesosy. Nirambese’e ty tagna i ajajay naho fa niavy eo, le nifoha i ajajay.
26 Azo antoke fa naharey ze raha natao i Jesosy zay ty ndaty amy ty faritse nagnodidigne o tanàgne iohoe.
27 Naho fa niala ty eo ty Jesosy, le nisy lahilahy roe goa zay nagnorike aze. Nitaraigne tamy i Jesosy iareo tie: “Mba iferegneso zahay ry Ana i Davida.”
28 Ie naho fa nizilike tamy ze tragno raike zay ty Jesosy, le nimbama’e mbeo i goa roe lahy rey, le hoe reke tamy iareo: “Inoa’areo vata’e vao fa vitako ty mampahatrea anareo?” Le hoe iareo tama’e: “Eka Tompo.”
29 Nitsapae’e i maso iareoy tafara izay sady hoe reke tamy iareo: “Satria nareo manam-pinoagne, le hahatrea i maso’areoy.”
30 Le nahatrea i maso iareoy. Naho fa niavy eo, le nampitao iareo hoe izao ty Jesosy: “Ao tsy hambarambara’areo ndaty i raha nataoko tama’areo teoy!”
31 Faie naho fa niakatse boake agnate tragno ao iareo, le nambara iareo tamy ty ndaty tamy ty faritse nagnodidigne i tanàgney teo i rahay.
32 Naho fa nandeha i lahilahy rey, le nindese o ndatio tama’e eo ze lahilahy moagne misy demonia zay.
33 Le avy le nahay nirehake o lahilahy iohoe naho fa niroahe i Jesosy boake ama’e ao i demoniay. Nilatsa i vahoakey naho fa nahatrea izay, le nirehake tie: “Mbe tsy nisy raha hoe izao indraike ty tamo o Israelio eo!”
34 Faie nirehake o Fariseò tie: “Fahefagne boake amy ty lahibey o demoniao ro ahafaha’e mandroake demonia.”
35 Le nandeha nitsoeke ze hene rova naho ze tanàgne ambanevohitse ty Jesosy, le nampianatse tamo o sinagogao tao naho nitory ty talily soa i Fanjakagney. Nisitragne’e iaby ka ze karazan’aretegne nahazo o ndatio.
36 Naho fa nahatrea i vahoakey reke, le niferenaigne iareo satria nampijalegne sady tsy nisy mpidare manahake o agnondry tsy misy mpiarakeo iareo.
37 Le hoe reke tamy i mpiana’e rey: “Maro i vokatsey fa i mpiasay ro tsy ampe.
38 Angataho’areo areke i Tompo i vokatseỳ, mba hagnirake mpiasa maro hamory i vokatsey.”
Fagnamarehagne ambane peje
^ Ndra va’e: “natahotse.”
