Saontsin’Andrianagnahare o Baiboly Masigneo, sady nisorategne hoahy ty ndaty iaby. Naho teantikagne ty hahafantatse i nampanoratse Azey, le ilaentikagne ty mianatse o Baibolio. (Jaona 17:3; 2 Timoty 3:16) Saontsie i Jehovah Andrianagnahare ao ty safiri’e miomba o ndatio naho ty tane toy.—Genesisy 3:15; Apokalipsy 21:3, 4.

Miambake amy ty boke hafa o Baibolio satria tena misy voka’e bey amy ty fiaigna o ndatio. Magnampe antika mba hanagne ty toetse i Jehovah retoagne o boke iohoe: Hatea, fitretrézagne naho fiferegnesagne. Magnomey fanantenagne ka o boke iohoe, le magnampe o ndatio mba hiaretse haoreagne fara izay ty mafe. Ze raha tsy mifagnarake amy ty zoton’arofon’Andrianagnahare amy ty tontolo toy eto, le mbe ampahafantare o Baibolio antika hatrake amy izao.—Salamo 119:105; Hebreo 4:12; 1 Jaona 2:15-17.

Tamy ty voaloha’e, le sinoratse tamy ty rehake hebreo, aramiana naho grike o Baibolio. Amy izao o Baibolio, le fa nadika amy ty firehake 3 000 mahery, ndra ie iaby zay ndra ty ampaha’e ama’e. Io ty boke fara izay ty miely naho voadika amy ty firehake maro hatrake amy izay. Tsy mahalatsa zay, satria mirehake ty faminania ty Baiboly tie: “Hotoriegne amy ty tane toy iaby ka ty talily soa i Fanjakagney, amy izay maharey o firenenao iaby. Ie vita zay vaho ho avy ty fara’e.”—Matio 24:14.

Nikezake mafe zahay mba tsy hagnova ty hafatse agnate o Baibolio ao naho fa nanao ty fagnavaozagne toy. Ty anto’e, fanta’ay tie tena lahibey ze hafatse zay, sady andraikitse lahibey ka ty mampahafantatse izay amy ty fomba maregne soa. Nadika boake amy ty Soratse Masigne Dikan-drehake Tontolo Vaovao angilé ty Baiboly nihavaozegne toy. Fa ho 60 taogne mahery zay ty nampiboahagne voaloha’e ty Dikan-drehake Tontolo Vaovao amy ty rehake angilé, sady fa nihavaozegne mateteke o Baiboly iohoe. Tena soa i fandikan-drehake rey, faie miovaova avao o firehake angiléo hatrake amy izao. Nanapa-kevetse areke ty Komity ty Fandikagne ty Baiboly Tontolo Vaovao tie hohavaozegne iaby i Dikan-drehake Tontolo Vaovao amy ty rehake angiléy. Ty tanjo’ay le ty hampiboake Baiboly maregne soa, faie sady mazava ro mora vakiegne. Mirehake ty raha ila’e nihasoaegne tamy ty Baiboly toy ty “Fagnazavagne Fagnampe’e” amy ty lahatsoratse retoa: “Torolalagne Orihegne Naho fa Mandika Baiboly,” “Ty Mampiambake ty Fandikan-drehake Toy,” naho tihoe “Akore ty Nahavy o Baibolio mbe Misy Hatrake amy Izao?”

Te hahazo Baiboly maregne soa naho mora azo ty ndaty tea naho manompo i Jehovah Andrianagnahare. (1 Timoty 2:4) Izay ty anto’e nampiboahagne ty dikan-drehake nihavaozegne tamy ty rehake angilé. Kezahegne mba hadika amy ty firehake maro o Baiboly iohoe. Mivavake zahay sady mitamà ka fa hahasoa azo ty dikan-drehake toy, satria ‘tena hahatrea an’Andrianagnahare rehe naho mikezake mipay aze.’—Asa o Apostolio 17:27.