Talily Soa Nisorate i Matio 24:1-51
-
FAMANTARAGNE TY FAGNATREHA I KRISTY (1-51)
24 Naho fa niakatse boake amy i tempolỳ ao ty Jesosy, le natoro i mpiana’e rey aze i tempolỳ naho ty manda’e.
2 Le hoe ty Jesosy tamy iareo: “Trea’areo o raha iaby reo? Volagneko ama’areo,* fa hahomake iaby o raha rehoe sady tsy hisy vato hifanongoa ndra raike.”
3 Naho fa niavy tamy i vohitse Olivay ey ty Jesosy, le nitoboke. Nimbama’e mbeo i mpiana’e rey sady nagnontane tie: “Ambarao anay tie ombia ty hisehoa ze raha iaby zay, naho ty ho famantaragne ty fagnatreha’o vaho ty fotoagne hifaragna ty tontolo toy?”
4 Le izao ty navale i Jesosy iareo: “Mitaoa nareo mba tsy ho voafita o ndatio,
5 satria maro ty ho avy amy ty agnarako, le hirehake tie: ‘Iraho ro Kristy’, le maro ty ho voafitake.
6 Haharey aly naho talily miomba ty aly nareo. Ao nareo tsy hatahotse satria tsy maintsy hiseho ze raha zay faie mbe tsy ho avy amy ze fotoagne zay i fara’ey.
7 “Hisy firenena hanafike firenena, le hisy fanjakagne hialy amy ty fanjakagne. Hisy keré vaho horohoron-tane amy ty tane sambe hafa.
8 I raha iaby zay ty ho fanomboha i haoreagney.
9 “Hampijale anareo o ndatio, le hamono anareo. Hoheje ty ndaty amy ty firenena iaby ka nareo noho ty agnarako.
10 Maro ka ty hiala aman’Agnahare, le ty ila’e hifotetse ty nama’e vaho hifankalaigne.
11 Maro ty mpaminany sandoke ho avy, le hamitake ndaty maro.
12 Ho maro ty ndaty tsy hifankatea naho tsy hotea an’Andrianagnahare* satria hitombo o raha ratio.*
13 Faie ze ndaty miaretse hatrake am-para’e ro ho voavonje.
14 Hotoriegne amy ty tane toy iaby ka ty talily soa i Fanjakagney, amy izay maharey o firenenao iaby.* Ie vita zay vaho ho avy ty fara’e.
15 “Naho fa trea’areo amy i toeragne masigney ao, i raha mampangorìgne mahavy faharavàgne nirehafe i Daniela mpaminanỳ (mandineha soa ze mamaky io),
16 le ze a Jodia ao, milaisa am-bohitse agne.
17 Ao ka ze ndaty ambone tafo-tragno ey, tsy hangalake ty fanagna’e an-tragno’e ao hey amy ie mizotso boake eỳ.
18 Le ao ka ze an-teteke agne, tsy holy hey hangalake i akanjobei’ey.
19 Loza ty hanjò ty ampela mivesatse naho ze mampinono amy ze andro zay.
20 Mivavaha lognandro nareo mba tsy ho amy ty asotry naho amy ty andro Sabata* ty hilaisa’areo.
21 Ty anto’e, amy ze andro zay, le hisy haoreagne lahibey mbe tsy nisy nanahake aze nanomboke ty nisia o ndatio,* hatrake amy izao sady tsy hisy sasa ka.
22 Naho tsy nihafohezegne ze andro zay, le tsy hisy ndaty* hovoavonje. Faie noho ty amo o ndaty jinobogneo, le hohafohezegne ze andro zay.
23 “Ko inoa’areo naho misy ndaty mirehake tie: ‘Intia i Kristy’ ndra ‘Aroa ty Kristy.’
24 Hisy Kristy sandoke naho mpaminany sandoke ho avy, le hanao famantaragne lahibey naho fahagagagne mba hamitahagne o ndatio, ndra o ndaty jinobogneo aza.
25 Tsiarovo avao ze raha nampitaoako anareo zay.
26 Fagnampe izay ka, naho misy ndaty mirehake ama’areo tie: ‘Am-patrambey agne ty Kristy, le ko mandeha mbeo.’ Ko inoagne ka naho misy manao izao tie: ‘Amy ty efetse agnate’e amy i tragnoy ao reke.’
27 Manahake o helatse boake atignanagne agneo, mazava hatrake ahandrefagne agneo, ty ho fagnatreha i Ana o ndatỳ.
28 Amy ze misy faten-draha* agne ro hivoria o voromaherio.
29 “Afara i haoreagne amy ze fotoagne zaỳ, le avy le haiegne i masoandroy, tsy hagnomey hazavagne ka i volagney, vaho hopoke boake an-dagnitse ey o vasiagneo. Hohezegnezegnegne ka ty hery i lagnitsey.
30 Afara izay, le hiseho amy i lagnitsey ey ty famantaragne i Ana o ndatỳ. Le hangoihoy ty tagny* ty foko iaby amy ty tane toy. Hotrea iareo ka i Ana o ndatỳ ho avy amy ty heri’e naho ty voninahi’e, amy i rahogney ey.
31 Naho fa tiofegne mafe i trompetray, le handefa o anjeli’eo reke mba hamory ze ndaty jinobogne, boake amy ty tane toy iaby* naho boake amy ty ifotora i lagnitsey agne hatrake amy ty ifaragna’e agne iaby.
32 “Mandrambesa fianaragne boake amy ty fagnoharagne miomba o fihamio* toy: Naho vaho misy rave’e mitiry ty amy i sampa’e miboakey eo, le hai’areo fa ho avy i asaray.
33 Hoe izay ka fa naho fa mahatrea i raha iaby rey nareo, le fantaro fa marine reke sady fa an-dalagne eo.
34 Volagneko ama’areo fa tsy hofoagne ty taranake toy, amparake ty hisehoa ze raha zay iaby.
35 Hofoagne i lagnitsey naho ty tane toy, fa ty raha rehafeko tsy ombia hofoagne.
36 “Tsy misy mahay ty andro naho ty lera hiavia ze raha zay, ndra o anjely an-dagnitse agneo, ndra i Anakey, naho tsy i Rae raike avao.
37 Hanahake ty tamy ty andro i Noa ty fagnatreha i Ana o ndatỳ.
38 Tamy tie mbe tsy niavy i ranobeỳ, le nihinagne naho ninogne o ndatio, nagnenga vao naho nengaem-bao, amparake ty niavia i andro nidira i Noa tagnate i sambobeỳ* ao.
39 Tsy nidarea iareo ty raha nirey iareo naho nitrea iareo, amparake ty niavia i Ranobey namaoke iareo iabỳ. Le hanahake izay ka ty fagnatreha i Ana o ndatỳ.
40 Hisy lahilahy roe ty an-teteke agne, ty raike handesegne, le ty raike hengagne.
41 Hisy ampela roe higosa vare amy i vato figosam-barey eo, ty raike handesegne, le ty raike hengagne.
42 Miambena lognandro areke nareo satria tsy fanta’areo ty andro hiavia i Tompo’areoy.
43 “Tadidio’areo toy: Naho nifanta i tompon-tragnoy tie amy fire ty lera hiavia i mpangalatsey, le tsy ho niroro reke fa niambegne i tragno’ey tsy hidira i mpangalatsey.
44 Mivognona soa ka areke nareo satria ho avy amy ty lera tsy eretserete’areo i Ana o ndatỳ.
45 “Ia maregne moa i mpanompo azo atokisagne naho mahimbagne, tinendre i tompo’e hikarakara ty mpanompo an-tragno’e aoy sady hagnomey iareo hanegne amy ty fotoagne ilà iareo azey?
46 Sambatse ze mpanompo zay, naho zoe i tompo’ey manao ty asa’e naho fa avy reke.
47 Rehafeko ama’areo vata’e fa hotendre’e hiandraikitse ty fanagna’e iaby reke.
48 “Faie naho raty fagnahy i mpanompoy, le mieretseretse tie: ‘Ho tara ty hiavia i Tompokoy,’
49 le manomboke mijera o mpanompo hafao reke, sady miarake mihinagne naho minon-toake amo o ndaty mamolavao.
50 Le ho avy amy ty andro tsy ampoize ze mpanompo zay naho amy ty lera tsy fanta’e i tompo’ey.
51 Hampijalé i tompo’ey mafe ze mpanompo zay, sady haharo’e amy ty toeragne misy o mpanao soa miatrekeo agne. Agne reke ro hangoihoy ty tagny naho ho romotse.*
Fagnamarehagne ambane peje
^ Abt: “Volagneko ama’areo to vata’e.”
^ Abt: “Hihamanintsigne ty hatea o ndatio.”
^ Abt: “ty tsy fagnorihan-dalàna.”
^ Abt: “ho vavolombelogne o firenenao iaby.”
^ Rinara ty lalà i Mosesy fa tsy mahazo mandeha lavitse o ndatio naho fa Sabata i androy.
^ Abt: “tamy ty nanomboha ty tontolo toy.”
^ Abt: “nofotse.”
^ Ndra ka: “fate o ndaty; fatem-biby.”
^ Abt: “hijerajera ty vata’e.”
^ Abt: “boake amy i tioke efatsey.” Ty teagne horehafegne le i tioke boake avaratse, atignanagne, atimo naho ahandrefagney.
^ Ndra: “aviavy.”
^ Ndra: “sambofiara.”
^ Abt: “hagnily vazagne.”
