Talily Soa Nisorate i Matio 20:1-34
20 “I Fanjakà i lagnitseỳ, le manahake ty lahilahy raike managne tanem-boaloboke. Nagnalegnalegne maraindray bey reke mba hipay mpiasa hiasa i tanem-boalobo’ey.
2 Ie naho fa nahita mpiasa reke, le nifagnarake iareo tie, denaria raike ty hokarama iareo agnate ty andro raike. Tafara izay, le nirahe’e iareo mba hiasa i tanem-boalobo’ey.
3 Ie tokotoko’e ho tamy i lera fahatelo* amy i androy, le nandeha a bezara agne i lahilahy tompo i tanem-boalobokeỳ, le nifanojo amy ty ndaty maromaro tsy nahatrea asa.
4 Hoe reke tamy iareo: ‘Mandehana nareo miasa an-tanem-boaloboko agne fa homeiko anareo ty karama toko’e hoazo’areo.’
5 Le nandeha niasa iareo. Mbe nandeha a bezara agne indraike i lahilahy tompo i tanem-boalobokeỳ tamy ty lera fahaenegne naho tamy ty lera fahasive,* le mbe nagnirake mpiasa hafa hiasa an-tanem-boalobo’e agne ka.
6 Nandeha a bezara agne fara’e reke tamy ty lera faha-11,* le mbe nahatrea ndaty tey tsy nahatrea asa. Le hoe reke tamy iareo: ‘Nagnino nareo hoe mitsangagne eto avao t’androany fa tsy nandeha niasao?’
7 Le hoe iareo: ‘Satria tsy nisy ndaty nagnomey asa anay.’ Le hoe reke tamy iareo: ‘Akia areke nareo hiasa an-tanem-boaloboko agne.’
8 “Naho fa niharivariva i androy, le hoe i lahilahy tompo i tanem-boalobokey tamy i lahilahy nampiandraikete’e i asa’eỳ: ‘Tokavo iaby i mpiasa rey fa hagnomey iareo i karama iareoy raho. Tokavo aloha i ila’e niavy tafara rey vaho izay i ila’e niavy taloha rey.’
9 Naho fa nitokavegne i ila’e niasa tamy i lera faha-11 rey, le nahazo denaria raike isa’e.
10 Ie naho fa nitokavegne i ila’e niavy voaloha’e rey, le nieretseretse tie, mba hihoatse ty niazo i ila’e niavy tafara rey ty ho niazo iareo. Faie denaria raike avao ka ty nimeigne iareo.
11 Ie niazo iareo i karama iareoy, le nimea iareo tsiny i lahilahy tompo i tanem-boalobokeỳ.
12 Hoe iareo: ‘Nagnino nampitovie’o tamy i niasa tafara rey avao ty karama’aio? Ie amy izao iareo niasa lera’e raike avao, fa izahay niasa avao tagnate i androy sady dinemo i tarignandrokey.’
13 Faie izao ty navale’e ty raike amy iareo: ‘Tsy migege azo raho. Tsy fa nifagnarake vao itikao tie, denaria raike ty hokarama’areo?
14 Rambeso ty karama’o toy, le akia rehe mandenà. Teako hampitoviegne amy ty karama’o avao ka ty karama i ila’e niavy tafara rey.
15 Tsy managne fahefagne hanao ze teako hatao amo o fanagnakò vao raho? Sa rehe mialogne satria nanehoako hasoa fagnahy iareo?’ ”
16 Tafara izay, le hoe ty Jesosy: “Maro areke ty fara’e hanjare voaloha’e, le maro ty voaloha’e hanjare fara’e.”
17 Tamy i Jesosy an-dalagne ho a Jerosalema agney, le nandese’e tamy ty toeragne mitokagne i mpiana’e 12 rey, le hoe reke tamy iareo:
18 “Hai’areo, ho a Jerosalema agne itikagne hinane zao, le hatolotse an-tagna o lahibey mpisorogneo eo naho o mpampianatse lalànao eo i Ana o ndatỳ. Le hatao iareo ty hahavy aze hovoaheloke hovonoegne.
19 Le hatolo iareo o hafa firenenao reke, le hatao iareo fiheheagne vaho hokaravasie iareo, le avy eo hopehe iareo amy ty boda-katae. Faie hovelomegne indraike reke naho fa afake telo andro.”
20 Naho fa niavy eo, le nimbamy i Jesosy mbeo i valy i Zebedioy naho i ana’e roe lahy rey. Le nanongaleke agnatreha i Jesosy eo reke satria misy raha tea’e hangatahegne ama’e.
21 Le hoe ty Jesosy tama’e: “Ino ty tea’o hataoko ama’o?” Le hoe i rakembay tama’e: “Naho avy amy i Fanjakà’oy agne rehe, le engao hitoboke agnila’o eo ty ana-dahiko roe lahy retoa. Ty raike ankavia’o eo, le ty raike ankavana’o eo.”
22 Le hoe ty Jesosy: “Tsy fanta’areo ty raha angatahe’areo. Vita’areo vao ty hinogne amy i kope hinomakoy?” Le hoe iareo tie: “Vita’ay.”
23 Le hoe reke tamy iareo: “Maregne fa hinogne amy i kope hinomakoy nareo, fa ze hitoboke ankaviako eo naho ankavanako eo, le tsy iraho ty manendre aze, fa ze nijobognen-dRaeko avao ro afake mitoboke ankaviako eo naho ankavanako eo.”
24 Tsy nifale tamy iareo roe lahy i apostoly 10 rey naho fa naharey ty miomba izay.
25 Faie nitokave i Jesosy mbama’e mbeo iareo, le hoe reke: “Fanta’areo fa manjakazaka amy ty ndaty indese’e o mpitondrao, le o manam-pahefagne amboneo magnampatse fahefagne amy ty ndaty fehe’e.
26 Faie tsy toko’e hanao manahake iareo nareo. Fa ze te ho ambone ama’areo ro tsy maintsy ho mpanompo’areo.
27 Le ze te ho voaloha’e ama’areo ro tsy maintsy ho mpanompo’areo.
28 Fa hoe izay ka ty atao i Ana o ndatỳ, tsy niavy mba hotompoegne reke fa mba hanompo, le hagnomey ty fiai’e ho solovoigne mba hagnavotagne ndaty maro.”
29 Tamy iareo nandeha a Jeriko agney, le nisy vahoake maro nagnorike aze.
30 Nisy goa roe lahy zay nitoboke a moron-dalagne eo. Ie naho fa nirey iareo tie nandalo tamy i lalagney eo ty Jesosy, le nitoka mafe hoe izao iareo tie: “O Tompo ana i Davida, mba amindrao fo zahay.”
31 Faie nasiaha i ndaty maroy naho nampitsigne’e iareo. Ndra tie teo zay, le vao mainke nitoka mafe iareo tie: “O Tompo ana i Davida, mba amindrao fo zahay.”
32 Nijanogne areke ty Jesosy sady nitoka iareo, le hoe reke: “Ino ty raha tea’areo hataoko ama’areo?”
33 Le hoe iareo tama’e: “O Tompo, mba ampahatreavo zahay.”
34 Niferegnesa i Jesosy iareo, le nitsapae’e i maso iareoy. Eo naho eo avao, le avy le nahatrea iareo sady nagnorike aze.
Fagnamarehagne ambane peje
^ Ndra: “amy 9:00 maraindray eo ho eo.”
^ Ndra: “tamy 12:00 atoandro eo ho eo naho tamy 3:00 folakandro eo ho eo.”
^ Ndra: “tamy 5:00 folakandro eo ho eo.”
