Talily Soa Nisorate i Matio 28:1-20
28 Tafara i Sabatay, amy i andro voaloha’e* amy i heregnandroy, le niavy tan-kibory agne ty Maria Magdalena naho i Maria rene i Jakoba naho i Josesy. Mbe mangararak’atignanagne tamy izay.
2 Le nisy horohoron-tane mafe tampoke ty tamy i toeragney eo, satria nisy anjely i Jehovah nizotso boake an-dagnitse agne. Navarimbari’e i vato hily i kiborỳ, le nitoboke tambone’e ey reke.
3 Namilepiletse manahake o helatseo reke, le ty akanjo’e foty bey.
4 Le nititike noho ty taho’e i mpiambegne rey sady tsy nahahetseke manahake o ndaty mateo.
5 Faie hoe i anjelỳ tamy i ampela rey: “Ko matahotse nareo. Haiko fa i Jesosy nivonoegne tamy i boda-kataey eoy paliae’areò.
6 Faie fa tsy ato reke fa nivelogne, arake i fa nirehafe’ey. Avia moa nareo hagnente i toeragne nisy i fate’eỳ.
7 Akia nareo mandenà malaky hitalily amo o mpiana’eo tie fa nivelomegne amy ty mate reke, le fa an-dalagne ho a Galelia agne reke zao. Agne ty hahatreava’areo aze. Hirehake izay ama’areo o niaviakò.”
8 Le avy le niala ty an-kibory eo areke i ampela rey. Natahotse iareo, faie tena nifale ka. Le nilay iareo mba hitalily i mpiana i Jesosy rey.
9 Le nifankatrea tamy i Jesosy iareo. Hoe ty Jesosy tamy iareo: “Akore nareo!” Le nimbamy i Jesosy mbeo iareo, le nitagne i tombo’ey naho niankohoke tama’e eo.
10 Le hoe ty Jesosy tamy iareo: “Ko matahotse nareo. Akia rehafo’areo i rahalahiko rey mba handeha a Galelia agne fa agne zahay ro hifankatrea.”
11 Tamy i ampela rey mbe tan-dalagneỳ, le nandeha an-tanàgne ao ty ila’e amy i mpiambegne rey, mba hirehake amo o lahibey o mpisorogneo ze raha iaby niseho zay.
12 Le niarake nivory o lahibey o mpisorogneo naho o mpitarike jiosio mba handineke ty hatao. Ie tafara izay, le nimea iareo vola maro i maramila rey
13 sady hoe iareo: “Rehafo’areo tie: ‘Niavy ao halegne i mpiana’e rey, le nangalatse aze tamy izahay niroroy.’
14 Naho ohatse rey i Pilato governora zay, le ko matahotse nareo fa mbe ho izahay ro hagnazava aze ama’e.”
15 Nalae i maramila rey areke i volay, le norihe iareo i raha nirehafegne tamy iareoy. Le nalaza tamo o Jiosio eo iaby ze raha zay hatrake androany.
16 Faie i mpianatse 11 rey nandeha a Galelia agne, amy i vohitse nirehafe i Jesosy tie hifankatreava iareoy.
17 Naho fa nahatrea aze iareo, le niankohoke tagnatreha’e eo. Faie ty ila’e nisalasala.
18 Le nimbamy iareo mbeo ty Jesosy sady nirehake tie: “Fa nimeigne ahy iaby ty fahefagne an-dagnitse agne naho an-tane etoy.
19 Mandehana areke nareo, le ampianaro ty ndaty amy ty firenena iaby mba hanjare ho mpanonjohy ty liako. Le anò badisa amy ty tahina* i Rae naho amy ty agnara i Anakey vaho amy ty agnara i fagnahy masigney iareo.
20 Ampianaro iareo mba hagnorike ze raha nandiliako anareo. Le tadidio’areo avao zao: Hiarake ama’areo avao raho, amparake ty hiavia ty fara ty tontolo toy.”
Fagnamarehagne ambane peje
^ Amo o Jiosio, le Lahady ty andro voaloha’e amy i heregnandroy tie amy iareo.
^ Ndra: “ze magneke ty fahefà i, ndra ty anjara asa i.”
