Talily Soa Nisorate i Matio 19:1-30
19 Naho fa boake nirehake ze raha zay ty Jesosy, le niala ta Galelia tao. Nandalo tamy i Renerano i Jordanay eo reke, le niavy amy ty efe-tane i Joda agne.
2 Nisy vahoake maro nagnorike aze ka ty tagne, le nisitragne’e iaby ze narare.
3 Tafara izay, le nimbama’e mbeo o Fariseò mba hitsapa hevetse aze. Nagnontane iareo tie: “Azo ty lahilahy atao vao ty misarake amy ty vali’e ndra inogn’ino ty anto’e?”
4 Le hoe ty navale’e iareo: “Mbe tsy nivakie’areo vao fa i namorogne o ndatio tam-boaloha’e tagney, le nanao aze ho lahilahy naho ampela.
5 Le nisaontsy reke tie: ‘Naho izay areke, le hienga ty rae’e naho ty rene’e ty lahilahy, le hiharo amy ty vali’e sady hanjare ho nofotse raike avao iareo.’
6 Fa tsy roe sasa iareo fa nofotse raike avao. Ao areke ze naharon’Andrianagnahare baogne, tsy hosarahe o ndaty.”
7 Le hoe iareo tama’e: “A nagnino ty Mosesy ro nirehake tie afake misarake amy ty vali’e ty lahilahy, sady afake magnomey taratasy fisaraham-panambaliagne aze?”
8 Le hoe ty Jesosy tamy iareo: “Noho inareo mafe loha ty nahavy i Mosesy nagnenga anareo hisarake amy ty vali’areo. Faie tsy izay ty nanoan’Andrianagnahare aze tam-boaloha’e tagne.
9 Rehafeko ama’areo, fa ndra ia ndra ia misarake amy ty vali’e sady manambaly ampela hafa, le magnitsakitsa-baly. Anto’e raike avao ty ahafaha iareo misarake, le tihoe nila ampela hafa ankoatse i vali’e i lahilahỳ.”
10 Le hoe i mpiana’e rey tama’e: “Naho toe izay ty manjò o lahilahy manambalio, le ndra aleo tsy manambaly.”
11 Le hoe ty navale’e iareo: “Tsy ze kila ndaty ro afake manao izay, fa ze nahazo i fagnomezagney avao.
12 Ty ila’e zao tsy manambaly satria misy handra’e boake an-troke agne. Ty ila’e ka tsy manambaly satria nivosire* o ndaty. Faie misy ka tsy manambaly, amy izay mahavita raha maro hoahy i Fanjakà i lagnitseỳ. Soa areke ty tsy manambaly hoahy ze mahavita manao izay.”
13 Ie naho fa niavy eo, le nisy ajaja nindesegne mbama’e mbeo mba homea’e tso-drano* naho hovavahe’e. Faie nendeha i mpianatse rey i ndaty ninday i ajaja reỳ.
14 Faie hoe ty Jesosy tamy iareo: “Engao’areo avao o ajaja reo fa ko sakana’areo tsy ho mbamako mbetoa, satria ze ndaty manahake iareo ro hahazo i Fanjakà i lagnitseỳ.”
15 Nimea’e tso-drano areke i ajaja rey, le nandeha naho fa niavy eo.
16 Tafara izay, le nisy lahilahy raike zay niharine aze sady nagnontane tihoe: “O Mpagnanatse, ino ty raha soa tsy maintsy ataoko mba hahazoako i havelogne nainai’ey?”
17 Le hoe reke tama’e: “Nagnino rehe ro magnontane ahy miomba ty raha soa tsy maintsy atao’o? Raike avao ty fagneva ty hotokavegne tihoe soa.* Naho tea’o ty hahazo i havelogney, le oriho lognandro ty lilin’Agnahare.”
18 Le hoe reke tamy i Jesosy: “I lili’e manao akorey zay?” Le hoe ty Jesosy: “Ko mamono ndaty, ko magnitsakitsa-baly, ko mangalatse, ko mitsangagne ho vavolombelogne mavande,
19 hajao ty rae’o naho ty rene’o, le teavo manahake ty vata’o ty nama’o.”
20 Le hoe i lahilahỳ tamy i Jesosy: “Fa noriheko iaby i raha rezay. Ino ka ty mbe mila ataoko?”
21 Le hoe ty Jesosy tama’e: “Naho tea’o ty tsy hisy tsiko’e,* le mandehana avaroto iaby ty fanagna’o, le zarao amo o mahantrao ty vili’e sady andao hagnorike ty liako. Hanagne harena mihaja an-dagnitse agne rehe naho manao izay.”
22 Nalahelo mafe i lahilahỳ naho fa naharey izay, le nandeha. Ty anto’e, nimaro ty fanagna’e.
23 Le hoe ty Jesosy tamy i mpiana’e rey naho fa niavy eo: “Volagneko ama’areo,* fa ho sarotse amo o mpagnarivò ty ho agnisa i Fanjakà i lagnitseỳ.
24 Rehafeko ama’areo ka, fa ndra mbe ho moramora ty hiziliha o ramevao amo o lavam-pinjaitseo ta tie hiziliha o mpagnarivò amy i Fanjakàn’Andrianagnaharey ao.”
25 Tena nilatsa i mpianatse rey naho fa naharey izay, le hoe iareo: “Hisy ndaty ho voavonje avao koahe naho izay?”
26 Le nihentea i Jesosy soa iareo sady hoe reke tamy iareo: “Naho amo o ndatio le tsy hovita zay, faie tsisy raha tsy hovitan’Agnahare.”
27 Le hoe ty navale i Petera aze: “Fa nafoe’ay iaby ze kila raha, le nagnorike azo zahay. Ino zane ty raha hoazo’ay?”
28 Le hoe ty Jesosy tamy iareo: “Volagneko ama’areo, fa amy i fotoagne fagnavaozagne ze kila rahay, le hitoboke amy ty sezan-droandriagne mamilepiletse eo i Ana o ndatỳ. Le inareo nagnorike ty liako, hitoboke amy ty sezan-droandriagne 12, hitsara ty foko 12 o Israelio.
29 Le ze ndaty fa nahafoe tragno, ndra rahalahy, ndra rahavave, ndra rae, ndra rene, ndra anake, ndra tane noho ty agnarako, le hahazo raha mihoatse lavitse* o raha nafoe’e reo sady hahazo* i havelogne nainai’ey.
30 “Faie maro amy ze voaloha’e ro hanjare fara’e, le ze fara’e ro hanjare voaloha’e.
Fagnamarehagne ambane peje
^ Abt: “ionoka.”
^ Abt: “hametraha’e tagnagne.”
^ Ndra: “Raike avao ty mamaritse ty atao tihoe soa.”
^ Ndra: “ho maregne agnatrehan’Andrianagnahare eo.”
^ Abt: “Volagneko ama’areo to vata’e.”
^ Abt: “hahazo miheregne in-jato.”
^ Abt: “handova.”
