Sehloohong se fetileng re ile ra bona matšoao ao Jesu a faneng ka ’ona. Matšoao ao a bontša ka ho hlaka hore ’Muso oa Molimo o se o hlonngoe leholimong le hore Jesu ke morena oa oona.

Bibele e re hang ka mor’a hore Jesu a nke matla a puso, o ile a leleka Satane le bademona ba hae leholimong. Hona joale ba se ba ka lalasa lefatšeng feela ’me leo ke lona lebaka le entseng hore ho be le mathata lefatšeng ho tloha ka selemo sa 1914.​—Tšenolo 12:​7, 9.

Ho sa tsotellehe maemo a ntseng a mpefala lefatšeng, Morena oa ’Muso oa Molimo e leng Jesu, o se a entse lintho tse ling ho thusa batho lefatšeng lohle. Batho ba khona ho ithuta Bibele le ho sebelisa lintho tseo ba ithutileng tsona bophelong letsatsi le letsatsi ka lebaka la mosebetsi o etsoang lefatšeng lohle oa ho ruta batho Bibele oo Jesu a ileng a profeta ka oona. (Esaia 2:​2-4) Batho ba limilione ba ithutile hore ba be le pono e nepahetseng ka mosebetsi, hore ba be le malapa a thabileng, le hore ba thabele lintho tseo ba li sebelelitseng ba sa fetohe makhoba a tsona. Batho bana ba ntse  ba ithuta ’me ba rua molemo linthong tseo ba ithutang tsona kahoo eba batho bao Molimo a thabelang hore e be bafo ba ’Muso oa hae.

Le hoja Jesu a se a busa leholimong, batho ke bona ba ntseng ba busa lefatšeng. Leha ho le joalo, Molimo o laetse Jesu a re: “Qala ho busa har’a lira tsa hao.” (Pesaleme ea 110:2) Haufinyane Jesu o tla felisa bahanyetsi bohle ba ’Muso oa Molimo ’me a imolle batho bohle ba ratang ho khahlisa Molimo.

Ka nako eo ’Muso oa Molimo o tla

• Felisa bolumeli ba bohata. Malumeli ’ohle a rutileng mashano ka Molimo ’me a thatafalletsa batho bophelo a tla felisoa. Bibele e bapisa malumeli ana le letekatse. Batho ba bangata ba tla makala ha malumeli ana a felisoa.​—Tšenolo 17:​15, 16.

• Felisa mebuso ea batho. ’Muso oa Molimo o tla ‘felisa mebuso’ ea batho.​—Tšenolo 19:​15, 17, 18.

• Felisa batho ba khopo. Ho tla etsahala’ng ka batho ba ikemiselitseng ho etsa lintho tse mpe le ba sa batleng ho mamela Molimo? “Ha e le ba khopo, ba tla felisoa lefatšeng, ha e le ba bolotsana, ba tla tlosoa ho lona.”​—Liproverbia 2:22.

• Felisa Satane le Bademona. Satane le bademona ba ke ke ba hlola ba “khelosa lichaba.”​—Tšenolo 20:​3, 10.

See se tla be se bolela’ng ho batho bohle ba ikemiselitseng ho busoa ke Molimo?

Ha Jesu a se a busa lefatše o tla etsetsa batho lintho tse molemo ho feta tseo babusi leha e le bafe ba neng ba ka li etsetsa batho. O tla busa le ba 144 000 ba tla beng ba tsoa lefatšeng. (Tšenolo 5:​9, 10; 14:​1, 3) O tla etsa bonnete ba hore thato ea Molimo e etsahala lefatšeng lohle. ’Muso oa Molimo o tla etsetsa batho eng lefatšeng?

• O tla felisa ho kula le lefu. “Ha ho moahi ea tla re: ‘Kea kula,’ ” hape “lefu ha le sa tla hlola le e-ba teng.”​—Esaia 33:​24; Tšenolo 21:4.

• O tla tlisa khotso le tšireletseho. “Khotso ea bara ba hao e tla ba ngata,” hape “e mong le e mong o tla lula tlas’a sefate sa hae sa morara le tlas’a sefate sa hae sa feiga, ho ke ke ha e-ba le ea etsang hore ba thothomele.”​—Esaia 54:​13; Mikea 4:4.

• O tla etsa hore batho ba be le mesebetsi e khotsofatsang. “Bakhethoa ba ka ba tla sebelisa mosebetsi oa matsoho a bona ka botlalo. Ba ke ke ba sehlela lefeela.”​—Esaia 65:​22, 23.

• O tla felisa mathata a tikoloho. “Lefeella le sebaka se se nang metsi li tla thaba, le thota ea lehoatata e tla thaba ’me e thunye joaloka safrone.”​—Esaia 35:1.

• O tla ruta batho seo ba lokelang ho se etsa e le hore ba phele ka ho sa feleng. “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.”​—Johanne 17:3.

Molimo o batla hore u thabele litlhohonolofatso tsena. (Esaia 48:​18) Sehlooho se latelang se tla u bontša hore na u ka etsa’ng e le hore le uena u tle u be le bokamoso bona bo thabisang.