Sembulo Lesembulelwa Johane 16:1-21
16 Ngeva livi lelikhulu liphuma kulendzawo lengcwele+ litsi kuletingilosi letingu-7: “Hambani niyotitfululela emhlabeni letitja letingu-7 tentfukutselo yaNkulunkulu.”+
2 Ingilosi yekucala yahamba yatfululela sitja sayo emhlabeni.+ Bantfu lebebaneluphawu lwesilwane sesiganga,+ lebebakhonta nemfanekiso+ waso bahlaselwa silondza lesibuhlungu+ futsi lesibi.
3 Ingilosi yesibili yatfululela sitja sayo elwandle.+ Lwandle lwaba yingati+ lefana neyemuntfu lofile, konkhe lokuphilako kwafa, lokutintfo letikulolwandle.+
4 Ingilosi yesitsatfu yatfululela sitja sayo emifuleni nasemitfonjeni yemanti.+ Konkhe kwaba yingati.+
5 Ngeva lengilosi lesetikwemanti itsi: “Wena Lokhona, futsi lobekakhona,+ Nkulunkulu wetfu lowetsembekile,+ wena ulungile ngobe sewukhiphe letehlulelo,+
6 ngesizatfu sekutsi bacitse ingati yalabangcwele neyebaphrofethi,+ futsi ubanike ingati kutsi bayinatse;+ loku kubafanele.”+
7 Ngeva li-al’thare litsi: “Jehova* Nkulunkulu, Somandla,+ tiliciniso tehlulelo* takho futsi tilungile.”+
8 Ingilosi yesine yatfululela sitja sayo elangeni,+ futsi lilanga lavunyelwa kutsi lishise labantfu ngemlilo.
9 Labantfu bashiswa ngulokushisa lokukhulu, kodvwa bahlambalata libito laNkulunkulu loneligunya kuletinhlupho, abazange baphendvuke futsi abazange bamkhatimulise.
10 Ingilosi yesihlanu yatfululela sitja sayo esihlalweni sebukhosi salesilwane sesiganga. Umbuso waso waba mnyama,+ nalabantfu batiluma lulwimi ngenca yebuhlungu,
11 kodvwa bahlambalata Nkulunkulu welizulu ngesizatfu salobuhlungu naletilondza tabo, abaphendvukanga nasemisebentini yabo.
12 Ingilosi yesitfupha yatfululela sitja sayo emfuleni lomkhulu iYufrathe,+ emanti awo asha,+ kuze kulungiswe indlela yemakhosi+ lavela emphumalanga.
13 Ngabona tinkhulumo letiphefumulelwe letingcolile* letintsatfu lebetibukeka njengeticoco tiphuma emlonyeni wadrago,+ nasemlonyeni walesilwane sesiganga, kanye nasemlonyeni wemphrofethi wemanga.
14 Ecinisweni leti tinkhulumo letiphefumulelwe ngemadimoni, futsi tenta tibonakaliso,+ tiyaphuma tiye emakhosini emhlaba wonkhe, kuze tiwabutsele ndzawonye emphini+ yelilanga lelikhulu laNkulunkulu Somandla.+
15 “Ngita njengelisela.+ Uyajabula loyo lohlale aphapheme+ futsi lohlale agcoke tingubo takhe tangetulu, kuze angatohamba ngcunu, nebantfu babone lihlazo lakhe.”+
16 Tawabutsela ndzawonye lamakhosi endzaweni ngesiHebheru lebitwa ngekutsi yi-Amagedoni.*+
17 Ingilosi yesi-7 yatfululela sitja sayo emoyeni. Kwaphuma livi lelikhulu endzaweni lengcwele+ livela esihlalweni sebukhosi, litsi: “Sekwentekile!”
18 Kwaba nemibane, kwevakala emavi, kwaba nekudvuma kwelitulu, nekutamatama lokukhulu kwemhlaba lokungazange sekube khona kusukela kwadalwa bantfu emhlabeni,+ bekukukhulu futsi kunemandla kakhulu.
19 Lidolobha lelikhulu+ lehlukana laba tincenye letintsatfu, emadolobha etive awa, Nkulunkulu wayikhumbula iBhabhulona Lenkhulu,+ kuze ayinike indzebe yeliwayini lentfukutselo yelulaka lwakhe.+
20 Tonkhe tihlenge tabaleka, netintsaba atizange tisatfolakala.+
21 Kwehla nematje lamakhulu esangcotfo, lilinye belingaba ngangesisindvo selithalenta,* awela kubantfu avela ezulwini,+ futsi labantfu bahlambalata Nkulunkulu ngenca yalesishayo sesangcotfo,+ ngobe besisikhulu ngendlela lengaketayeleki.
Imibhalo lengentansi
^ Fundza Sandzisanchazo A5.
^ Nobe “tincumo tekwehlulela.”
^ NgesiGriki kutsi, “imimoya lengcolile.”
^ NgesiGriki kutsi, Har-Ma·ge·donʹ, leligama lisuselwa egameni lesiHebheru lelisho “iNtsaba yaseMegido.”
^ Lithalenta lemaGriki belilingana nemakhilogremu langu-20.4. Fundza Sandzisanchazo B14.
