1. San ben kan de a moro takru momenti fu Petrus en libi?

NOITI Petrus ben o frigiti a momenti di en ai miti nanga a di fu Yesus. A no ben e firi switi srefisrefi. A fasi fa Yesus ben e luku en ben e sori taki a ben e sari noso taki a ben e mandi? Wi no sabi, fu di Bijbel e taki nomo dati „Masra drai luku Petrus” (Luk. 22:61). Ma na a syatu momenti dati, Petrus kon si taki a ben meki wan bigi fowtu. A ben frustan taki a ben du soifri a sani di Yesus ben taki dati a ben o du, aladi ensrefi ben taki dati a no ben o du dati noiti. Iya, a ben taki dati a no ben sabi en lobi Masra. Petrus ben brokosaka srefisrefi, èn kande disi ben de a moro hebi momenti noso a moro takru dei fu en libi.

2. San Petrus ben musu leri, èn san wi kan leri fu a tori fu en?

² Ma disi no ben wani taki dati yepi no ben de moro gi en. Fu di Petrus ben abi wan tranga bribi, meki a ben abi na okasi ete fu sori berow gi a fowtu di a ben meki èn fu leri wan fu den moro prenspari sani di Yesus ben wani leri en. A ben musu leri fu gi trawan pardon. Ibriwan fu wi musu leri a sani disi. Sobun, meki wi go luku fa Petrus leri a sani disi.

3, 4. (a) San Petrus aksi Yesus, èn san Petrus ben denki kande? (b) Fa Yesus sori taki Petrus ben abi a denki di furu sma na ini a ten dati ben abi?

³ Sowan siksi mun na fesi, di Petrus ben de na ini Kaperna-um, a foto pe a ben e tan, dan a go na Yesus èn a aksi en: „Masra, omeni tron mi musu gi mi brada pardon te a sondu teige mi? Mi musu du dati te nanga seibi tron?” Kande Petrus ben denki fu ensrefi taki a ben e gi trawan pardon  furu leisi. Fu taki en leti, den kerki fesiman fu a ten dati ben e leri sma taki den ben musu gi trawan pardon dri leisi nomo. Yesus piki Petrus: „A no te nanga seibi tron, ma te nanga seibitenti na seibi tron.”​—Mat. 18:21, 22.

⁴ Yesus ben wani taki Petrus ben musu teri omeni leisi wan sma sondu teige en? Nôno, di Yesus taigi Petrus taki a no musu gi sma pardon 7 tron nomo ma 77 tron, dan a ben wani sori en taki a no ben musu teri omeni leisi a gi trawan pardon (1 Kor. 13:4, 5). Yesus ben sori taki Petrus ben abi a srefi denki fu den sma na ini a ten dati di no ben abi switifasi èn di no ben de klariklari fu gi trawan pardon. Den sma disi ben e teri omeni leisi den gi trawan pardon, neleki fa wan sma di e luku moni tori e skrifi omeni moni sma musu pai en. Ma efu wi wani teki na eksempre fu Gado, dan wi musu de klariklari fu gi trawan pardon ibri leisi baka.​—Leisi  1 Yohanes 1:7-9.

5. O ten wi e leri o prenspari a de fu gi trawan pardon?

⁵ Petrus no haritaki nanga Yesus. Ma a sani disi di Yesus leri en, ben doro en ati? Son leisi, na te wi musu begi trawan pardon, dan fosi wi e frustan o prenspari a de fu gi trawan pardon. Sobun, meki wi go luku baka san ben pasa na a ten bifo Yesus dede. Na ini a muilek pisi ten dati, Petrus du furu sani di meki taki en Masra ben musu gi en pardon.

6. San Petrus du di Yesus pruberi fu leri den apostel fu abi sakafasi? Ma san Yesus du?

⁶ A ben de wan tumusi prenspari neti. A ben de a lasti neti fu Yesus en libi na grontapu. Yesus ben abi furu sani ete fu leri den apostel fu en. Fu eksempre, a ben musu leri den fu abi sakafasi. Dati meki Yesus sori sakafasi, èn a wasi den futu fu den. Disi ben de wan wroko di den moro lagi futuboi ben gwenti du. Na a bigin, Petrus no ben frustan fu san ede Yesus ben du dati. Ne, a no ben wani taki Yesus wasi en futu. Baka dati, a ben de nomonomo taki a no en futu wawan Yesus ben musu wasi, ma sosrefi en anu nanga en ede! Yesus no lasi pasensi nanga en, ma a teki en ten fu meki a kon frustan san a ben e du èn o prenspari a sani dati ben de.​—Yoh. 13:1-17.

7, 8. (a) Fu san ede Yesus ben musu abi pasensi nanga Petrus? (b) Fa Yesus tan gi Petrus pardon nanga en heri ati?

 ⁷ Syatu baka dati, Yesus ben musu abi pasensi baka nanga Petrus. Den apostel bigin haritaki nanga makandra suma fu den ben de a moro bigiwan. A no de fu taki dati Petrus ben de tu na ini a tori, èn a sani disi ben e sori taki den ben abi bigifasi. Toku Yesus piri-ai gi den na wan switi fasi èn a prèise den gi den sani di den ben du bun. Iya, den ben tan horibaka gi a Masra fu den. Ma Yesus taigi den tu taki den alamala ben o gowe libi en. Petrus piki taki en ben o tan nanga Yesus, awansi a ben musu dede makandra nanga en. Ma Yesus taki wan heri tra sani. A taki dati na a srefi neti dati, fosi wan kakafowru bari tu leisi, Petrus ben o taki dri leisi taki a no sabi en Masra. Ne Petrus taki dati noiti a ben o du dati nanga Yesus, èn a meki bigi srefi taki awansi ala den tra apostel ben o gowe libi Yesus, toku a ben o tan horibaka gi en.​—Mat. 26:31-35; Mark. 14:27-31; Luk. 22:24-28; Yoh. 13:36-38.

⁸ Yesus ben o lasi pasensi nanga Petrus? Fu taki en leti, na ini a muilek pisi ten dati, Yesus ben e tan poti prakseri na den bun fasi fu den apostel fu en di ben de sondu sma. Yesus ben sabi taki Petrus ben o naki futu, ma toku a taigi en: „Mi begi fayafaya gi yu taki yu no o lasi a bribi fu yu. Te yu bribi kon tranga baka, dan yu musu meki a bribi fu den brada fu yu kon tranga tu” (Luk. 22:32). Na so Yesus sori taki a ben abi a frutrow taki Petrus ben o sori berow gi a fowtu di a ben meki èn taki a ben o go doro fu dini Gado nanga en heri ati. A no de fu taki dati Yesus ben gi Petrus pardon nanga en heri ati!

9, 10. (a) Sortu piri-ai Yesus ben musu gi Petrus na ini a dyari fu Getseimanei? (b) Na sortu sani a tori fu Petrus e memre wi?

⁹ Bakaten, di den ben de na ini a dyari fu Getseimanei, dan Yesus ben musu gi Petrus piri-ai moro leki wán leisi. Yesus aksi en, sosrefi Yakobus nanga Yohanes, fu tan na ai aladi a ben e begi. A ben hebi srefisrefi gi Yesus èn a ben abi sma fanowdu fu gi en deki-ati, ma ibri tron baka Petrus nanga den trawan ben e fadon na sribi. Yesus taki wan sani di sori taki a ben e frustan den èn taki a ben gi den pardon. A  taki: „A tru taki na ati wani, ma a skin swaki.”​—Mark. 14:32-41.

¹⁰ Syatu baka dati, wan ipi sma doro nanga frambo, feti-owru, nanga kodya. Disi ben de wan situwâsi fu luku bun èn fu handri nanga koni. Ma toku Petrus hari en feti-owru sondro fu denki, èn a koti a yesi puru fu Malkus, wan srafu fu a granpriester. Sondro fu atibron, Yesus piri-ai gi Petrus, a dresi a man en yesi, èn a tyari kon na krin fu san ede den bakaman fu en no musu du ogri. Te na a dei fu tide, den bakaman fu en e hori densrefi na a leri disi (Mat. 26:47-55; Luk. 22:47-51; Yoh. 18:10, 11). Yesus ben musu gi Petrus pardon gi furu sani kaba. Kande a tori disi e memre wi taki wi alamala e sondu furu tron. (Leisi Yakobus 3:2.) Suma fu wi Gado no musu gi pardon ibri dei? Ma gi Petrus, moro sani ben o pasa ete na a neti disi. A ben o meki wan moro bigi fowtu.

11, 12. (a) Fa Petrus sori deki-ati baka di den grabu Yesus? (b) Fa Petrus sori taki a no ben man du san a ben taki?

¹¹ Yesus taigi den ipi-ipi sma taki efu na en den ben e suku, dan den ben musu libi den apostel fu en meki den gowe. Petrus no ben man du noti, ma a ben e tanapu e luku nomo fa den sma ben e tai Yesus. Ne Petrus lon gowe, neleki den tra apostel.

¹² Di Petrus nanga Yohanes tapu fu lon, dan a kan taki den ben doro krosibei fu na oso fu Anas, di ben de granpriester fosi. Na drape sma ben tyari Yesus go fosi fu poti aksi gi en. Di den tyari Yesus gowe fu drape, dan Petrus nanga Yohanes go na den baka, ma den „tan bun fara” na baka (Mat. 26:58; Yoh. 18:12, 13). Petrus no ben de wan fredeman. A no de fu taki dati a ben abi deki-ati, fu di a waka go luku pe den ben e tyari Yesus. Den sma ben abi feti-owru, èn Petrus ben gi wan fu den mankeri kaba. Toku wi e si taki Petrus no tan horibaka gi en Masra soleki fa ensrefi ben taki. Iya, a ben taki dati a ben o de klariklari fu dede makandra nanga en Masra efu dati ben de fanowdu.​—Mark. 14:31.

13. San na a wan-enkri fasi fa wi kan waka soifri baka Krestes?

¹³ Neleki Petrus, furu sma na ini a ten disi e suku fu waka  baka Krestes, ma den e waka „bun fara” na baka, so taki nowan sma man si den. Ma soleki fa Petrus srefi ben skrifi bakaten, dan a wan-enkri fasi fa wi kan waka soifri baka Krestes, na te wi tan krosibei fu en. Iya, wi musu teki na eksempre fu en na ini ala sani, awansi sortu bakapisi dati o abi.​—Leisi 1 Petrus 2:21.

14. San Petrus du na ini den yuru di sma ben e krutu Yesus?

¹⁴ Te fu kaba, Petrus doro na a portu fu wan fu den moro bigi èn moro moi oso na ini Yerusalem. A ben doro na a oso fu Kayafas, a granpriester di ben gudu èn di ben abi makti. Nofo tron den oso disi ben abi wan dyari, èn wan portu ben de na fesisei. Di Petrus doro na a portu, sma no ben wani gi en primisi fu go na inisei. Yohanes di ben sabi a granpriester èn di ben de na inisei kaba, kon taki nanga a waktiman fu meki Petrus kon na inisei. Soleki fa a sori, dan Petrus no tan krosibei fu Yohanes. A no pruberi tu fu go na ini na oso fu man tanapu na sei en Masra. Petrus tan na ini a dyari, pe wan tu srafu nanga futuboi ben e tanapu lontu wan faya fu di a ben kowru a neti dati. Den ben e luku fa falsi kotoigi ben e go-kon fu taki na ini a krutu di ben e hori na ini na oso.​—Mark. 14:54-57; Yoh. 18:15, 16, 18.

15, 16. Fruteri fa Petrus lei dri leisi, soleki fa Yesus ben taki.

¹⁵ Na ini a leti fu a faya, a meisje di ben meki Petrus kon na inisei, ben man si en moro bun. Di a si suma na en, dan a taki: „Yu ben de tu nanga Yesus, a Galileasma!” Fu di Petrus no ben fruwakti disi, meki a taki dati a no sabi Yesus, èn a du srefi leki a no ben sabi fu san a meisje ben e taki. Petrus go tanapu krosibei fu a portu, fu di a no ben wani taki sma si en. Ma wan tra meisje si en èn a taki wan srefi sortu sani: „A man disi ben de nanga Yesus fu Nasaret.” Petrus sweri: „Mi no sabi a man!” (Mat. 26:69-72; Mark. 14:66-68) A kan taki di Petrus taki fu a di fu tu leisi taki a no sabi Yesus, dan a yere wan kakafowru bari. Ma a ben abi  someni sani na en ede taki a no memre san Yesus ben taki wan tu yuru nomo na fesi.

¹⁶ Wan pisi ten baka dati, Petrus ben e suku ala sortu fasi ete fu sorgu taki sma no poti prakseri na en. Ma wan grupu sma di ben e tanapu lontu a dyari, waka kon na en. Wan fu den sma disi ben de wan famiri fu Malkus, a srafu di Petrus ben koti en yesi puru. A taigi Petrus: „A no yu nanga en mi si na ini a dyari?” Petrus ben feni taki a ben musu overtoigi den taki den no ben si bun. Dati meki a sweri taki a no en, èn kande a taigi den srefi taki wan fluku ben musu kon na en tapu efu a ben e lei. Now Petrus ben lei fu a di fu dri leisi. Fa a kaba taki a sani dati, wan kakafowru bari. A ben de a di fu tu leisi di Petrus ben yere wan kakafowru bari a neti dati.​—Yoh. 18:26, 27; Mark. 14:71, 72.

17, 18. (a) San Petrus du di a kon frustan sortu bigi fowtu a ben meki? (b) San Petrus ben aksi ensrefi kande?

¹⁷ No langa na fesi, Yesus ben kon na tapu a balkon pe a ben kan luku go na ini a dyari. Soleki fa a skrifi na a bigin fu a kapitel disi, dan na a momenti dati en ai miti nanga a di fu Petrus. Petrus ben frustan now sortu bigi fowtu a ben meki. A gowe libi a dyari, èn a ben hati en srefisrefi taki a ben meki so wan bigi fowtu. A go na ini a foto èn a waka lontu na ini a leti fu a mun di ben e saka. En ai ben e furu nanga watra. A no ben man si krin pe a ben e go. Ne a bari krei.​—Mark. 14:72; Luk. 22:61, 62.

¹⁸ Te wan sma meki so wan seryusu fowtu, dan heri esi a kan bigin denki taki a no o kisi pardon noiti fu di a sondu fu en bigi tumusi. Kande Petrus ben abi a srefi denki dati. A ben o kisi pardon gi a fowtu fu en?

19. Fa Petrus ben firi kande di a meki so wan bigi fowtu, ma fa wi du sabi taki a no lasi-ati?

¹⁹ A musu de so taki Petrus ben firi moro sari a dei baka dati, di a si san ben e pasa nanga Yesus. A ben musu fu mandi nanga ensrefi di Yesus dede moro lati a dei dati, baka di a ben nyan pina omeni yuru langa. Kande ibri leisi baka a ben e hati Petrus te a ben e prakseri fa a sani di a du meki taki en Masra sari srefisrefi na a lasti dei fu en libi leki libisma.  Aladi Petrus ben e sari srefisrefi, toku a no lasi-ati. Wi sabi disi, fu di a tori e taki dati syatu baka dati a ben de makandra baka nanga den tra apostel (Luk. 24:33). A no de fu taki dati ala den apostel ben e sari fu a fasi fa den ben handri a neti di so furu sari sani pasa, èn a musu de so taki den trowstu makandra.

20. San wi kan leri fu a bun bosroiti di Petrus ben teki?

²⁰ Te yu luku en bun, dan disi na wan fu den moro koni bosroiti di Petrus teki. Te wan futuboi fu Gado e naki futu, dan a no a fowtu di a meki na a moro prenspari sani, ma na a tranga muiti di a e du fu opo baka èn fu meki sani kon bun baka. (Leisi Odo 24:16.) Petrus ben sori trutru bribi di a kon makandra nanga den brada fu en, aladi a ben e firi brokosaka. Te wan sma e sari noso te a e hati en taki a meki wan fowtu, dan nofo tron a wani de en wawan, aladi a sani disi no bun kwetikweti (Odo 18:1). A moro bun sani di a kan du, na fu tan abi demakandra nanga en Kresten brada nanga sisa, so taki a kan kisi krakti baka fu tan dini Gado.​—Hebr. 10:24, 25.

21. Sortu nyunsu Petrus kon yere fu di a ben de makandra nanga den tra disipel?

²¹ Fu di Petrus ben de nanga den tra disipel, meki a yere a takru nyunsu taki Yesus en skin no ben de moro na ini a grebi. Petrus nanga Yohanes lon go na a grebi fu Yesus pe sma ben lolo wan bigi ston poti na en fesi. Yohanes di ben de moro yongu kande, doro drape fosi den. Di a si taki a grebi opo now, dan a ben frede fu go na inisei. Ma Petrus no ben frede. Aladi en blo ben de na tapu, toku a waka go langalanga na ini a grebi. A grebi ben leigi!​—Yoh. 20:3-9.

22. San yepi Petrus fu no sari moro èn fu no tweifri moro?

²² Petrus ben bribi taki Yesus kisi wan opobaka? Na a bigin a no ben wani bribi, aladi wan tu umasma di ben de disipel tu ben fruteri taki engel ben kon na den fu meki bekènti taki Yesus opo baka fu dede (Luk. 23:55–24:11). Ma na a kaba fu a dei dati, Petrus no ben e sari moro èn a no ben e tweifri moro. Yesus ben de na libi, èn now a ben de wan makti yeye! Yesus sori ensrefi na fesi ala den apostel fu en. Ma fosi a du dati, a sori ensrefi na Petrus wawan. A dei dati den apostel taki: „Masra opo baka trutru èn a kon na  Simon!” (Luk. 24:34) Bakaten, na apostel Paulus ben skrifi tu fu a tumusi aparti dei di Yesus ben „sori ensrefi na Seifas, èn baka dati na den twarfu apostel” (1 Kor. 15:5). Seifas nanga Simon na tra nen gi Petrus. Na a dei dati Yesus ben sori ensrefi na en, èn a de krin taki Petrus ben de en wawan.

23. Fu san ede Kresten di sondu musu prakseri a tori fu Petrus?

²³ Bijbel no e taki san pasa na a aparti momenti dati di Yesus nanga Petrus miti baka. Ma wi kan frustan taki Petrus ben breiti srefisrefi fu si a lobi Masra fu en libilibi baka èn fu kisi na okasi fu taigi en fa a ben hati en taki a ben meki so wan bigi fowtu. A wan-enkri sani di Petrus ben wani, na taki Yesus gi en pardon. Wi no abi fu tweifri srefisrefi taki Yesus gi en pardon, èn a du dati nanga en heri ati tu. Na ini a ten disi, Kresten di du wan sondu, musu prakseri a tori fu Petrus. Noiti wi musu denki taki a sondu fu wi bigi so te, taki Gado no o man gi wi pardon. Yesus na wan tumusi bun eksempre fu en Tata, di ’o gi pardon nanga en heri ati’.​—Yes. 55:7.

24, 25. (a) Fruteri fa a ben de di Petrus go fisi wan neti na tapu a Se fu Galilea. (b) San Petrus du di Yesus du wan wondru a tra mamanten?

²⁴ Yesus ben taigi den apostel fu en fu go na Galilea, pe den ben o miti nanga en baka. Di den doro drape, Petrus bosroiti fu go fisi na a Se fu Galilea. Wan tu tra sma ben go makandra nanga en. Petrus ben de baka na tapu a se pe a ben gwenti wroko fosi. A musu fu de so taki a ben switi gi en fu de baka na ini wan boto, fu firi fa den skwala ben e naki kon, èn fu firi a grofu titei fu den nèt baka na ini en anu. Den man no fanga nowan fisi a neti dati.​—Mat. 26:32; Yoh. 21:1-3.

²⁵ Ma fruku mamanten, wan sma na syoro bari gi den fisiman fu trowe den nèt na a tra sei fu a boto. Den du dati, èn den hari 153 fisi kon na ini a boto! Petrus ben sabi suma ben de a sma dati. A dyompo komoto na ini a boto èn a swen go na syoro. Di a doro drape, dan Yesus gi den bun mati fu en fisi di a ben losi na tapu krofaya. A poti prakseri moro furu na Petrus.​—Yoh. 21:4-14.

26, 27. (a) Sortu okasi Yesus gi Petrus dri leisi? (b) Fa Yesus sori taki a ben gi Petrus pardon nanga en heri ati?

 ²⁶ Yesus aksi Petrus efu a ben lobi en Masra „moro den wan disi”. Kande a sori go na a bigi ipi fisi di den fanga. A ben de so taki Petrus ben lobi a fisi bisnis moro leki fa a ben lobi Yesus? Neleki fa Petrus ben taki dri leisi taki a no sabi en Masra, na so Yesus gi en na okasi fu sori dri leisi na fesi den mati fu en taki a lobi en Masra. Di Petrus du dati, Yesus  taigi en fa fu sori a lobi dati. A ben musu poti a santa diniwroko fu en na fesi ala tra sani, a ben musu gi nyanyan na den reti-ati futuboi fu Krestes, a ben musu tranga den, èn a ben musu luku den bun.​—Luk. 22:32; Yoh. 21:15-17.

²⁷ Na so Yesus sori krin taki en nanga en Tata ben kan gebroiki Petrus ete na ini a diniwroko. Petrus ben o du wan prenspari wroko na ini a gemeente di Krestes e tiri. A sani disi e sori krin taki Yesus gi Petrus pardon nanga en heri ati! A no de fu taki dati a naki Petrus en ati trutru di Yesus sori sari-ati gi en.

28. Fa Petrus kon de wan bigi ston, soleki fa a nen fu en wani taki?

²⁸ Furu yari langa Petrus tan du a diniwroko fu en nanga en heri ati. A gi den brada fu en deki-ati, soleki fa Yesus ben taigi en fu du a neti bifo a dede. Na wan switi fasi èn nanga pasensi Petrus tiri den skapu, noso bakaman fu Krestes, èn a gi den nyanyan. A man disi di ben nen Simon, sori taki a ben warti fu tyari a nen di Yesus ben gi en. Iya, a ben warti fu tyari a nen Petrus, san wani taki Bigi Ston, fu di a tron wan man di ben e tanapu kánkan, a ben abi wan tranga bribi, èn a ben de wan moi eksempre gi a gemeente. Furu buweisi de taki Petrus ben de so wan man. Wi kan si dati na ini den tu moi brifi di Petrus skrifi èn di tron prenspari buku fu Bijbel. Den brifi dati e sori tu taki Petrus noiti no frigiti fa Yesus leri en fu gi trawan pardon.​—Leisi 1 Petrus 3:8, 9; 4:8.

29. Fa wi kan sori bribi neleki Petrus èn sari-ati neleki en Masra?

²⁹ Wi musu leri tu fu gi trawan pardon. Wi e aksi Gado pardon ibri dei fu den furu fowtu di wi e meki? Wi e bribi taki a gi wi pardon trutru èn taki a sani dati e gi wi okasi fu abi wan krin konsensi? Wi e gi pardon na den sma na wi lontu? Efu wi e du dati, dan wi sa sori bribi neleki Petrus, èn wi sa sori sari-ati neleki en Masra.