Addinta Kaaˈlanno Biddishsha
Hanni Qullaawu Maxaafi lowo miliyoone ikkanno manna kaaˈlinota shoole doogga laˈno.
1. Adhama
Mannaho, adhamatenna adhama hagiirru noota assiˈrate daafira noonsa lao addi addite.
QULLAAWU MAXAAFI YAANNORE: “Mittu mittunku galtesi umisi gede asse baxo. Galteno minaannase ayirrisso.”—Efesooni Sokka 5:33.
TIRO: Adhanna adhama Maganu qixxeessino qixxaawooti; hakko daafira isi, minaanninna minaama hagiirraamma ikkanno gede mayi hasiisannonsaro afino. (Maarqoosi 10:6-9) Minaanninna minaama uminsa daafira hedantenni, kuˈu kuˈunni daafira roorse hedannoha ikkiro hagiirraamma ikkanno. Minaamasi baxanno minaanni baxannoseta leellishate, towaatannose hattono shaqqille leellishannose. Minaannase ayirrissanno minaama qolte coyidhannorinninna assitannorinni ayirrissannosita leellishshanno.
QULLAAWU MAXAAFI BIDDISHSHI KAAˈLANNOHO: Veetinaamete heedhannori Kiwaanginna Tii yinanni minaanninna minaama, ‘Adhamanke hagiirru noota horo diˈˈikkitanno’ yee hedino. Kiwaangi duucha woyite isera shaqqille dileellishanno. Isi togo yiino: “Alba Tii dadillitakka woy koffi yitakka yee horo dihedeemmo; qoleno duucha woyite afanni heeˈrenni saalfattanno gede asseemmo.” Konnira Tii adhamansa diigate heddino. Ise togo yitino: “Xaate minaannaˈya ayirrisa woy addaxxa didandeemma yee hedoomma.”
Gedensoonni Kiwaanginna Tii Qullaawa Maxaafa xiinxallino; hattono Efesooni Sokka 5:33 noo amaale loosu aana hosiisa dandiinanni gara rosino. Kiwaangi togo yiino: “Kuni qummeeshshi shaqqille leellisha, Tii baxeemmoseta affanno gede assa, hattono isera hasiisannosere wonshe towaata hasiissannoeta huwateemmo gede kaaˈlinoe. Kuri coyibba assummota ise albinni roore baxxinoe hattono ayirrissinoe.” Tiino togo yitino: “Efesooni Sokka 5:33 noo amaale roore loosu aana hosiisummanna minaannaˈya ayirrisumma kiiro isino albinni roore baxinoe, towaatinoe, hattono keere afiˈroomma.”
Adhanna adhamate daafira ledde afate, “Maate Seekkannoha 12 Qara Coye” yitannota Baqqi Yiiyye! yinanni metseete Kiiro 2 2018 jw.org aana nabbawi.
2. Wolootu Ledo Noonke Aante
Duucha woyite mannu manna sirchonsa lae, wole gobbaha ikkino daafira, danansa lae, woy ammaˈnonsanni kainohunni miicanno.
QULLAAWU MAXAAFI YAANNORE: “Manna baala ayirrisse.”—1 Pheexiroosi 2:17.
TIRO: Qullaawu Maxaafi ninke sircho ikkinokki manna, woy wole gobba manna gibbe yee dirosiisanno. Hatteentenni sirchinsa, gobbansa woy dagoomu giddo noonsa bayichi ikkihano ikkiro baalanka manna ayirrisa hasiissannonketa rosiisanno. (Soqqamaasinete Looso 10:34) Wolu manni lao woy assoote banxeemmokkiha ikkiro nafa, insa ayirrisa woy shaqqille leellisha dandiineemmo.—Maatewoosi 7:12.
QULLAAWU MAXAAFI BIDDISHSHI KAAˈLANNOHO: Daanieelira Iisiyunni daanno manni allaggaho yine rosiinsoonnisi. Konnira isi Iisiyunni dayino manna baala giwannoha ikkino; qoleno insa duucha woyite faajjete xonanno. Daanieeli togo yiino: “Hakkawaro gobbaˈya kaaˈlanni noommo yee hedeemmo. Hedoˈyanna assootiˈya gara diˈˈikkino yee horo hede nafa diegennoommo.”
Daanieeli gedensoonni Qullaawa Maxaafa xiinxallino. Isi togo yiino: “Hedeemmo gara woˈmunni woˈma biddi assiˈra hasiissinoe. Dayino bayichi ikkihano ikkiro, baalanka manna Maganu laˈˈanno garinni laˈˈa hasiissinoe; isi albaanni baalunku manni taaloho.” Daanieeli xa mannunni xaadanno woyite hiitto ikkannoro coyiˈranni togo yiino: “Duucha woyite insa mamiinni dagginoro heda nafa dihedeemmo. Xa duuchunku gari manna baxeemmo; hattono alamete aana duuchankawa noo manni ledo muli jaalooma kalaqiˈroommo.”
Ledde afate, “Manna Mulla Kaˈne Giwa Agurate Nyaau Xagichi Heeˈrakka?” (Amaaru Afoo) yaanno birxicho afidhinota Baqqi Yiiyye! yinanni metseete Kiiro 3 2020 jw.org aana nabbawi.
3. Woxe
Batinyu manni hagiirraamma ikkatenna albillitte dancha heeshsho heeˈrate yee jiro shorranno.
QULLAAWU MAXAAFI YAANNORE: “Egenno woxu gedee caaleeti. Egenno kayinni egennaammu lubbo gargaratenni roortanno.”—Rosiisaancho 7:12.
TIRO: Woxu hasiisannonke; kayinni woxu hagiirraamma ikkineemmo gede woy albillitte teense heeˈneemmo gede assa didandaanno. (Lawishsha 18:11; 23:4, 5) Hatteentenni, addu hagiirre afiˈranna albillitte teense heeˈra dandiinannihu Maganu Qaali giddo noo amaale loosu aana hosiinsirooti.—1 Ximootewoosi 6:17-19.
QULLAAWU MAXAAFI BIDDISHSHI KAAˈLANNOHO: Indooneezhiyaho heeˈrannohu Kaardo yinanni manchi jiro duuˈnate murciˈrino. Isi togo yiino: “Lowo manni halchanno coyi baalu nooe. Baxummowa haˈra dandeemmo; lowo waaginni hirranni uduunni, makeennanna minna nooe.” Tini qawaaxxo kayinni digeeddino. Kaardo togo yiino: “Woxeˈya hanaanqe adhinie; hakko daafira, lowo diro dafe daafure afiˈroommo woxe illete lipheessi giddo hoogoommo.” Ledeno togo yiino: “Lowo diro jiro shorranni heeˈroommo; kayinni jeefote mulla anganni gatoommo daafira, hexxo mudhe waagu dinoe yee hedoommo.”
Kaardo Qullaawu Maxaafi woxu daafira kulanno amaale loosu aana hosiisa hanafino. Isi jiro duuˈnate wolqasi guda agure bikku heeshsho heeˈra doodhino. Isi togo yiino: “Xa Maganu ledo danchu jaaloomi nooe daafira addu jiro afiˈroommo. Hashshu kiiro dancha goxicho goxeemmo hattono addu hagiirre afiˈroommo.”
Qullaawu Maxaafi woxu daafira mayyaannoro ledde afate, Kiiro 3 2021 Agarooshshu Shaera fulinoha “Rosunna Jiro Teense Heeˈnanni Gede Assitanno?” yaanno birxicho jw.org aana nabbawi.
4. Siimu Xaadooshshe
Mannaho siimu xaadooshshi daafira noonsa lao addi addite.
QULLAAWU MAXAAFI YAANNORE: “Maganu halcho, kiˈne qullaawoota ikkitinanni gedeetinna horonta foorretewiinni xeertidhinanni gedeeti. Mittu mittunku galteˈne ledo hiitto ikkitine qullaawanna ayirrado heeshsho heedhinanniro afa hasiissannoˈne. Magano affinokki daga gede foorrete hamaande heedhoonkeˈne.”—1 Teselonqe 4:3-5.
TIRO: Qullaawu Maxaafi siimu xaadooshshi hasattonkera dannu heeˈra hasiissannota kulanno. Soorro, fotaancho ikka (woxeho yine foora), galtenke ikkinokkihu ledo siimu xaadooshshe assa, labbaahu labbaahu ledo woy meyaati meyate ledo adhamanna saadate ledo akkimala foorrete. (1 Qorontoosi 6:9, 10) Siimu xaadooshshi Maganu minaanniranna minaamara calla uyino eltooti.—Lawishsha 5:18, 19.
QULLAAWU MAXAAFI BIDDISHSHI KAAˈLANNOHO: Awustiraaliyaho heedhannoti Kiyile togo yitino: “Mine assiˈroommakki yannara, mittu manchi ledo siimu xaadooshshe assummaro hakku manchi albinni roore baxannoehanna towaatannoeha lawinoe. Kayinni coyi ani hedoomma gede diˈˈikkino. Dadillaame ikkoomma, halchoomma baxilleno diafiˈroomma.”
Gedensoonni Kiyile Qullaawu Maxaafi siimu xaadooshshi daafira mayyaannoro rossino hattono rossinore loosu aana hosiissino. Togo yitino: “Maganu biddishsha uyinonkehu xissiisiˈneemmonna qarrammeemmo gede assannonke coyiwiinni agarankera yee ikkinota xa wodanchoomma. Xa Yihowa hasiˈrannore asseemma daafira beˈe diyeemma; qoleno baxannoe minaanni nooe. Qullaawu Maxaafi biddishsha harunsaˈya lowo qarrinni gatissinoe!”
Tenne daafira ledde afate, jw.org aana fulinoha “Qullaawu Maxaafi Adhammikki Mitteenni Heeˈrate Daafira Mayyaanno?” yaanno birxicho nabbawi.
Kalaqaanchinke garanna gara ikkinokkire bande anfeemmo gede kaaˈlannonke. Isi fushshino biddishsha harunsa woˈma woyite shota ikka hooggurono, tenne assate sharrama kayinni gaabbissannota diˈˈikkitino. Hatto assinummoro, woˈmanka woyite geedote hagiirre afiˈneemmota addaxxa dandiineemmo.
