Doodha Hasiissannohe Doorsha
Doodhineemmo doorshi hagiidhineemmo woy dadillineemmo gede assankera dandaanno. Yihowa tenne afino. Isi biddishshisi garinni heeˈnammora hasiˈrannohu iseraati.
Yihowa keerunna hagiirru noo heeshsho heeˈnammora hasiˈranno.
“Woyyannoˈnere baala rosiiseemmoˈnehunna, hadhinanni doogo kuleemmoˈnehu Maganiˈne Kaaliiqi aneeti. Hajajoˈya seekkitine macciishshitinoonniha ikkoommero, keeru moolannokki wayi gede, keeraanchimmano baaru dambali gede ikkite heedhannoˈne.”—Isayaasi 48:17, 18.
Maganu Kalaqaanchonke ikkino daafira, heeˈra hasiissannonketa baalantenni woyyitino heeshsho afino. Isi biddishshisi kaaˈlannonketa afinohura, biddishshisi garinni heeˈnammora hasiˈranno. Maganu hajajo agadhineemmoha ikkiro, doodhineemmo doorshi dancha guma abbannoronna teˈee dihuluullammeemmo. Woˈmanka woyite geedote keerenna hagiirre abbannoha gara ikkino doorsha doodhineemmo.
Yihowa dandiineemmokkire asse diyaannonke.
“Techo eemmoˈne hajajo lowo geeshsha digoˈlitannote; woy hajajamateno diqarrissannote.”—Marro 30:11.
Maganu biddishshi garinni heeˈrate, hedonkenna assootenke biddi assiˈra hasiissannonkeha ikkara dandaanno. Ikkirono Yihowa dandiineemmokkire asse diyaannonke. Isi Kalaqaanchonke ikkino daafira dhukanke afino. Qoleno Yihowa roore anfanni haˈneemmo woyite, ‘hajajosino kaajjado ikkitinokkita’ huwanteemmo.—1 Yohaannisi 5:3.
Yihowa biddishshisi garinni heeˈra doodhitannore kaaˈlate qaale eino.
“Qiniiticho angakki irkiseemmohe; ‘Kaaˈleemmohena waajjitooti’ yeemmohehu, Maganikki ani Kaaliiqaati.”—Isayaasi 41:13.
Maganu kaaˈlannonke daafira isi biddishshi garinni heeˈra dandiineemmo. Isi jawaantenna hexxo aannohu Qaalisi Qullaawu Maxaafi widoonni kaaˈlannonke.
Alamete doyichora heeˈrannohu lowo miliyoone ikkanno manni, Qullaawu Maxaafi biddishshi garinni heeˈranno daafira heeshshonsa woyyaabbino. Qullaawu Maxaafi kulannota dancha amaale ledde rosatto gede koyinsoommohe! Woxe baaxxittokkinni jw.org aana noota Qullaawu Maxaafi aana xintantinota Hegerera Hagiidhitanni Heeˈra Dandaatto! yitanno biroshere nabbabbe hanafa dandaatto. Tini biroshere aane noo roso amaddino:
-
Qullaawu Maxaafi Kaaˈlannohehu Hiittoonniiti?
-
Qullaawu Maxaafi Kaajja Hexxo Noonketa Kulanno
-
Qullaawu Maxaafi Yaannore Ammana Dandiineemmo?
Maganu Qaale Qullaawa Maxaafa xiinxallatto woyite, kuni Maxaafi diru shaarannokkihanna ‘hegerera soorramannokkiha’ ikkinota wodanchatto. (Faarso 111:8) Garanna gara ikkinokki coyi daafira Qullaawu Maxaafi kulanno biddishsha harunsa, baalantenni woyyitino heeshsho heeˈneemmo gede kaaˈlitannonke. Ikkirono, Maganu tenne assineemmo gede digiddeessannonke. (Marro 30:19, 20; Iyyaasu 24:15) Kuni ninke mittu mittunku banxe doodhineemmo doorshaati.
