Qullaawu Maxaafi Giddo Addaxxinanni Biddishshi No
Mitto coye doodhineemmo woyite ninkera lawinonkere woy wolootu assitannore assineemmoha ikkiro, doodhinoommo doorshi dancha guma abba hoogara dandaanno. Qullaawu Maxaafi kuni ikkannohu mayiraatiro kulanno; kayi hakkiinni sainoreno kulanno. Qullaawu Maxaafi giddo garanna gara ikkinokkire bande anfeemmo gede kaaˈlannonkehu addaxxinanni biddishshi no; hagiirraamma ikkineemmo gede assannonkehu qaru coyi isooti.
MAGANU BIDDISHSHI HASIISANNONKE
Qullaawu Maxaafi, mannu oosora Maganu Yihowa a aanno biddishshi hasiisannonsatanna uminsa heeshshonsa qineessiˈra dandiitannokkita xawise kulanno. (Ermiyaasi 10:23) Maganu Qullaawu Maxaafi giddo nooha, garanna gara ikkinokki coyi daafira kulanno biddishsha uyinonkehu iseraati. Isi manna baxanno; hattono busha doorsha doodhine xissiisiˈnammoranna qarrammammora dihasiˈranno. (Marro 5:29; 1 Yohaannisi 4:8) Hakkiino sae, isi Kalaqaanchonke ikkino daafira ninkera baalanta roortanno amaale aate hayyonna egenno noosi. (Faarso 100:3; 104:24) Ikkirono, Maganu mannu biddishshasi harunsanno gede horo digiddeessanno.
Yihowa Addaamiranna Heewanira addu hagiirre afidhanno gede assannonsa coye baala uyinonsa. (Kalaqama 1:28, 29; 2:8, 15) Qoleno isi qarrissannokki hajajo uyinonsa. Ikkirono isi uyinonsa biddishshira hajajantannoronna teˈee uminsa doodhitanno gede fajjinonsa. (Kalaqama 2:9, 16, 17) Hige ma assinayi, Addaaminna Heewani Maganu biddishsha agurte uminsa biddishshinni heeˈra doodhitino. (Kalaqama 3:6) Tini mayi guma abbituyya? Mannu ooso garanna gara ikkinokkire uminsa doodhituro woyyanno? Diwoyyanno. Maganu biddishsha lashshi assa geedote keerenna hagiirre afiˈnanni gede assitannokkita xagge leellishshanno.—Rosiisaancho 8:9.
Qullaawu Maxaafi, lophinoommo gari woy budinke ikkihano ikkiro, dancha doorsha doodhate kaaˈlannonke biddishsha kulannonke. (2 Ximootewoosi 3:16, 17; “ Baalunku Mannira Kaaˈlanno Maxaafa” yitanno saaxine lai.) Hanni Qullaawu Maxaafi kaaˈlannonke gara laˈno.
Qullaawa Maxaafa ‘Maganu qaaleeti’ yaa garankolla yineemmohu mayiraatiro ledde rosi.—1 Teselonqe 2:13. JW.ORG aana fultinota Qullaawa Maxaafa Qixxeessinohu Ayeti? yitanno viidiyo lai.
QULLAAWU MAXAAFI MAGANU BIDDISHSHA KULANNO
Qullaawu Maxaafi, hundinni kayise Maganoho mannu ooso ledo noosi aante hiittootero kulannonke. Giddosi noo hedo, Maganu albaanni garanna gara ikkinokkiri hattono kaaˈlannorinna gawajjannori maatiro anfeemmo gede kaaˈlitannonke. (Faarso 19:7, 11) Qullaawu Maxaafinni barru barrunku dancha doorsha doodhineemmo gede kaaˈlannonkeha diru shaarannokkiha xintu seera ronseemmo.
Hanni Lawishsha 13:20 noo amaale laˈno: “Egennaamu ledo hosannohu egennaamo ikkanno; hawanyootu jaali kayinni qarru aana uwanno.” Kuni xintu seeri hundi yannara kaaˈlinte gede xaa yannarano kaaˈlannoho. Qullaawu Maxaafi giddo togoohu kaaˈlannohu batinyu xintu seeri no.—“ Qullaawu Maxaafita Diru Shaarannokki Hayyo” yitanno saaxine lai.
Kayinni, ‘Qullaawu Maxaafi amaale xaa yannara kaaˈlitannoeta mayinni buuxa dandeemmo?’ yite hedattoha ikkara dandaanno. Aananno birxichira mite addu xagge laˈneemmo.
