ගීතාවලිය 36:1-12
සංගීත අධ්‍යක්ෂක වෙතය. යෙහෝවා දෙවිගේ සේවකයෙකු වූ දාවිත් රචනා කළ ගීතයකි.
36 පව්කාර සිතුවිලි දුෂ්ටයාගේ හදවත තුළින්ම උපදින්නේය.+දෙවි කෙරෙහි ඔහුට කිසි ගරුබියක් නැත.+
2 ඔහු තමා ගැන ඕනෑවට වඩා සිතීමෙන් තමාවම රවටාගනියි.+තමා වරදක් කරන බව ඔහුට නොතේරෙයි. එබැවින් වරදට ද්වේෂ කිරීමට ඔහුට නොහැක.+
3 ඔහු පවසන වචන වේදනාකාරීය. මුළාකරවනසුලුය.+යහපත කිරීමට ඔහු තුළ කිසි පෙලඹීමක් නැත.+
4 ඔහු යහනේ සිටින විටදී පවා යමෙකුට හානියක් කිරීමට සිතින් සැලසුම් යොදයි.+ඔහු නරක මාර්ගයේ දිගටම ගමන් කරයි.+නපුර කිසිවිටක ප්‍රතික්ෂේප නොකරයි.+
5 යෙහෝවා දෙවියනි, ඔබ පෙන්වන මහත් ප්‍රේමය* ස්වර්ගය දක්වාම නැඟ තිබේ.+ඔබේ විශ්වාසවන්තකම අහසේ වලාකුළු දක්වාම විහිදී තිබේ.+
6 ඔබේ ධර්මිෂ්ඨකම ඔබ සෑදූ උස් කඳු මෙනි.+ඔබේ විනිශ්චයන් ගැඹුරු ජලය මෙනි.+යෙහෝවා දෙවියනි, ඔබ මිනිසුන්ව හා සතුන්ව ආරක්ෂා කරන්නෙහිය.+
7 දෙවියනි, ඔබ පෙන්වන ප්‍රේමය* මොන තරම් අනර්ඝද!+ඔබේ පියාපත් සෙවණේ සිටිමින් මනුෂ්‍යයෝ රැකවරණය ලබන්නෝය.+
8 තෘප්තියට පැමිණෙන තෙක්ම ඔබේ ගෘහයේ ඇති අනර්ඝ දේවලින් ඔවුහු පානය කරති.+ඔවුන් වෙතට ගලා බසින ප්‍රීතිය නමැති ඔබේ ගංගාවෙන් ඔවුහු පානය කරති.+
9 ජීවිතයේ උල්පත ඔබය.+ඔබෙන් ලැබෙන ආලෝකය නිසා ආලෝකය යනු කුමක්ද කියා අපි හඳුනාගන්නෙමු.+
10 ඔබව හඳුනාගත් අයට ඔබේ නොමියන ප්‍රේමය* සැමදා පෙන්වන්න.+අවංක සිත් ඇත්තන්ට ඔබේ ධර්මිෂ්ඨකම පෙන්වන්න.+
11 උඩඟු අයට මාව පාගා දැමීමට ඉඩ නොදෙන්න.+දුෂ්ටයන්ට මාව පන්නා දැමීමට ඉඩ නොදෙන්න.+
12 බලන්න! අනුන්ට හානි පමුණුවන්නෝ වැටී සිටිති.+ආපසු නැඟිටීමට නොහැකි වන සේ ඔවුන්ව බිමට හෙළා ඇත.+
