aProverbe 16:1-33
16 Zo ayeke leke apensé ti bê ti lo,*me kiringo tënë so lo mû* alondo na Jéhovah.+
2 Na lê ti zo, alege ti lo kue ayeke na lege ni,*+me Jéhovah ayeke bâ ye so apusu zo ti sara ye.+
3 Ye kue so mo ye ti sara, zia ni na maboko ti Jéhovah,*+na aye so mo leke ti sara ayeke ga nzoni.
4 Jéhovah asara si ye kue amû lege ti tene ye so lo leke na bê ti lo ti sara asi,même ti tene a futi azo ti sioni na ngoi ti ye ti ngangu.+
5 Zo kue so bê ti lo apusu lo ti sara ye na fandara ayeke sioni mingi na lê ti Jéhovah.+
Hinga so lo yeke ngbâ senge pëpe, a yeke punir lo.
6 Tâ ndoye nga na dutingo be-ta-zo asara si a zi afaute,+nga kpengo mbeto ti Jéhovah asara si zo azia lege ti ye ti sioni.+
7 Tongana sarango ye ti mbeni zo anzere na Jéhovah,Lo sara si même awato ti zo ni aduti na siriri na lo.+
8 A yeke nzoni ti duti na kete ye na ti sara ye ti mbilimbili+ahon ti duti na gbâ ti mosoro na ti sara ye ti kirikiri.+
9 Zo alingbi ti leke na bê ti lo ti sara mbeni ye,me Jéhovah la afa na lo lege so a lingbi lo mû.+
10 A yeke nzoni desizion ti Nzapa la asigi na yanga ti gbia;+lo doit ti fâ ngbanga kirikiri lâ oko pëpe.+
11 Kilo nga na asembe ti kilo so ayeke mbilimbili alondo na Jéhovah;awen kue ti ndö ti kilo so ayeke na yâ ti bozo ni ayeke kusala ti maboko ti lo.+
12 Asioni ye so azo ayeke sara ayeke sioni mingi na lê ti agbia,+ndali ti so a yeke grâce na sarango ye ti mbilimbili la trône aluti nzoni.+
13 Atënë so ayeke mbilimbili anzere na agbia.
Ala ye zo so ayeke tene tâ tënë.+
14 Ngonzo ti gbia ayeke tongana zo so a tokua lo ti fâ zo,+me zo ti ndara asara si ngonzo ni adë.*+
15 Tongana gbia abâ mbeni zo na nzoni lê, gigi ti zo ni ayeke duti nzoni;nzoni bê ti gbia ni ayeke tongana atanga ti ngu-nzapa.+
16 Ti wara ndara ayeke nzoni mingi ahon ti wara lor.+
Ti soro hingango ndo ayeke nzoni ahon ti soro argent.+
17 Lege so zo ti mbilimbili amû azia lo yamba na ye ti sioni.
Zo so abata lege ti lo abata fini* ti lo.+
18 Baba ague na zo ti tï sioni,nga ti sara ye na fandara ague na zo ti tï.+
19 Ti sara terê kete na popo ti azo so asara terê ti ala kete+ayeke nzoni ahon ti wara mbage ti aye so azo ti fandara agbu na ngangu.
20 Zo so ahinga ti bâ yâ ti aye nzoni, lo yeke wara nzoni,nga ngia ayeke na zo so azia bê ti lo na ndö ti Jéhovah.
21 Zo so ayeke na ndara, a yeke iri lo zo so ahinga ndo;+zo so ayeke sara tënë na nzoni bê,* lo gue na azo ti yeda na mbeni ye.+
22 Tongana zo ahinga ti bâ yâ ti aye nzoni, a yeke tongana dungu ti fini ndali ti lo,me ye ti buba ti azo ti buba la ayeke punir ala.
23 Zo so ayeke na bê ti ndara, atënë ti yanga ti lo afa so lo hinga ti bâ yâ ti aye nzoni,+nga atënë ti lo ague na azo ti yeda na mbeni ye.
24 Anzerengo tënë ayeke tongana mafuta ti otoro,a nzere na âme* ti zo nga a sara si abio ti zo akiri aga nzoni.+
25 Mbeni lege ayeke dä so na lê ti zo akpa nzoni lege,me a gue ngbii a si na kuâ.+
26 Nzara apusu zo ti kua ti sara kua ngangu,ndali ti so nzara* ayeke sara si lo sara gï kua ni.+
27 Sioni zo ahasa ye ti sioni asigi na ni;+tënë ti yanga ti lo ayeke tongana wâ so agbi ye.+
28 Zo ti bingo kpale* abi kangbi na popo ti azo,+na zo ti pango ndo asara si akota kamarade akangbi.+
29 Zo ti sarango ye ti ngangu na zo agi ti handa mba ti lo,na lo sara si lo mû sioni lege.
30 Lo te lê ti lo na ngoi so lo yeke gi ti sara sioni na zo.
Lo te poro ti yanga ti lo na ngoi so lo yeke sara ye ti sioni.
31 Vuru kuä ti li ayeke couronne ti baba*+tongana zo awara ni na mungo lege ti mbilimbili.+
32 Zo so asara ngonzo hio pëpe+ ayeke nzoni ahon wangangu,nga zo so azia si ngonzo ahon ndö ti lo pëpe* ayeke nzoni ahon zo so amû mbeni gbata.+
33 Azo abi mbeni ye ti hinga na nda ti ye,+me desizion kue so a mû na peko ti bingo ye ni alondo na Jéhovah.+
Akete tënë na terê ni
^ Wala “kiringo tënë so ayeke na lege ni.” Na Hébreu: “kiringo tënë ti menga.”
^ Na Hébreu: “A yeke na zo ti leke aye so ayeke na yâ ti bê ti lo.”
^ Na Hébreu: “sioni ayeke dä pëpe.”
^ Na Hébreu: “Bi akusala ti mo aroulé ague na Jéhovah.”
^ Wala “akpe ni.”
^ Wala “âme.”
^ Wala “atene anzerengo tënë.”
^ Wala “yanga.” Bâ na kete bakari.
^ Na Hébreu: “yanga ti lo.”
^ Wala “Zo so aleke aye ti sioni ti sara ni.”
^ Wala “ayeke gloire.”
^ Na Hébreu: “akomande yingo ti lo.”
