Apocalypse 3:1-22
3 “Sû mbeti na ange ti congrégation so ayeke na Sardes, mo tene: Bâ aye so lo so ayeke na ayingo mbasambala ti Nzapa+ na atongoro mbasambala+ atene la: ‘Mbi hinga aye so mo sara, mbi hinga so azo abâ atene mo yeke na fini, andâ mo kui awe.+
2 Zia lê ti mo akpengba,+ na mo mû ngangu na aye so angbâ me so aga nduru ti kui awe, ndali ti so mbi bâ so aye so mo sara, mo sara ni ahunzi kue pëpe na gbele Nzapa ti mbi.
3 Tongaso, ngbâ ti dabe ti mo tongana nyen mo wara ni nga tongana nyen mo mä ni, na ngbâ ti bata ni, nga changé bê ti mo.+ Biani, mbi yeke ga ande tongana zo ti nzi+ na mo yeke hinga oko pëpe na ngoi wa la mbi yeke si na ndö ti mo; tongana mo zingo na lango, mbi yeke sara tongaso pëpe.+
4 “‘Me mo yeke na ambeni zo oko oko* na Sardes so ala sara si abongo ti ala aga sioni pëpe,+ na ala yeke tambela ande na terê ti mbi na avuru bongo,+ ngbanga ti so ala lingbi biani.
5 Zo so asö benda,+ a yeke yü na lo avuru bongo ande;+ na mbi yeke zi iri ti lo na yâ ti mbeti ti fini pëpe,+ me na lê ti Babâ ti mbi nga na lê ti a-ange ti lo, mbi yeke tene ande so mbi hinga iri ti lo.+
6 Zia zo so ayeke na mê amä ye so yingo atene na acongrégation.’
7 “Sû mbeti na ange ti congrégation so ayeke na Philadelphie, mo tene: Bâ aye so lo so ayeke nzoni-kue,+ lo so ayeke biani ye so lo tene ni yeke ni,+ lo so ayeke na clé ti David,+ so tongana lo zi ye zo ti kangango ni ayeke dä pëpe, nga tongana lo kanga ye zo ti zingo ni ayeke dä pëpe, atene la:
8 ‘Mbi hinga aye so mo sara. Bâ mbi zia na gbele mo mbeni yanga-da so azi,+ so mbeni zo alingbi ti kanga ni pëpe, mbi hinga so mo yeke na ngangu kete, mo bata tënë ti mbi nga mo bere iri ti mbi pëpe.
9 Bâ, mbi yeke mû ande ala so ayeke ti synagogue ti Satan, ala so atene ala yeke aJuif, andâ ala yeke aJuif pëpe,+ me ala yeke azo ti mvene . . . bâ, mbi yeke sara si ala ga na ala ba li ti ala na gbe ti mo na mbi yeke sara si ala hinga so mbi ndoye mo.
10 So mo bata tënë ti gbungo ngangu so mbi gbu,*+ mbi nga mbi yeke bata mo ande na yâ ti ngoi ti tara+ so ayeke ga na ndö ti sese kue so azo ayeke dä, ti tara azo so asara kodro na ndö ti sese.
11 Mbi yeke ga fafadeso.+ Ngbâ ti gbu ye so mo yeke na ni so ngangu, si mbeni zo amû couronne ti mo pëpe.+
12 “‘Zo so asö benda, mbi yeke sara ande si lo ga mbeni pilier na yâ ti temple ti Nzapa ti mbi, lo yeke sigi na yâ ni lâ oko pëpe, na mbi yeke sû na ndö ti lo iri ti Nzapa ti mbi+ na iri ti gbata ti Nzapa ti mbi, Fini Jérusalem,+ so alondo na Nzapa ti mbi na yayu si ayeke descend, nga na fini iri ti mbi wani.+
13 Zia zo so ayeke na mê amä ye so yingo atene na acongrégation.’
14 “Sû mbeti na ange ti congrégation so ayeke na Laodicée,+ mo tene: Bâ aye so Amen,+ lo so lo yeke témoin+ so ayeke be-ta-zo si ayeke tene gï tâ tënë,+ lo so lo yeke tongo nda ti aye so Nzapa asara,+ atene la:
15 ‘Mbi hinga aye so mo sara, mbi hinga so mo yeke dê pëpe nga mo yeke wâ pëpe. Mbi ye fade si mo yeke dê wala mo yeke wâ.
16 Tongaso, so mo yeke wâ gï kete nga mo yeke wâ pëpe+ wala dê pëpe so,+ mbi yeke dë mo na yanga ti mbi na gigi.
17 Ndali ti so mo tene: “Mbi yeke zo ti mosoro,+ mbi wara amosoro na mbi yeke na bezoin ti mbeni ye oko pëpe,” me mo hinga pëpe so pasi ti mo ahon ndö ni, mawa ti mo ayeke mingi, mo yeke wayere, mo yeke waziba nga terê ti mo ayeke senge,
18 mbi wa mo ti vo na tïtî mbi lor so a tö ni na wâ si a zi saleté ni awe, si mo ga zo ti mosoro; mbi wa mo nga ti vo na tïtî mbi avuru bongo si mo yü ni na a bâ kamene ti mo pëpe ndali ti so terê ti mo ayeke senge;+ mbi wa mo ti vo na tïtî mbi yorö ti lê+ ti zia na lê ti mo si mo bâ ndo.+
19 “‘Azo kue so mbi ye ala mingi, mbi suku na ala nga mbi gboto mê ti ala.+ Tongaso, yapu na sarango ye nga changé bê ti mo.+
20 Bâ, mbi luti na yanga-da na mbi yeke pika ni. Tongana mbeni zo amä go ti mbi na lo zi yanga-da ni, mbi yeke lï na da ti lo nga mbi yeke te kobe ti lakui legeoko na lo, na lo nga lo yeke te ni legeoko na mbi.
21 Zo so asö benda,+ mbi yeke mû ande lege na lo ti duti legeoko na mbi na ndö ti trône ti mbi,+ gï tongana ti so mbi sö benda si mbi duti+ legeoko na Babâ ti mbi na ndö ti trône ti lo.
22 Zia zo so ayeke na mê amä ye so yingo atene na acongrégation.’”
Akete tënë na terê ni
^ Na Grec: “ambeni iri oko oko.”
^ A lingbi nga ti tene “So mo mû tapande ti gbungo ngangu so mbi gbu.”
